ថ្មីៗនេះ មានរឿងគួរឱ្យភ្ញាក់ផ្អើល១កើតឡើងនៅក្នុងយន្តហោះរបស់ក្រុមហ៊ុនអាកាសចរណ៍អេស៊ាណា អ៊ែឡាញ (Asiana Airlines) ដែលធ្វើដំណើរពីកោះជេជូ (Jeju) ទៅទីក្រុងដេគូ (Daegu) ប្រទេសកូរ៉េខាងត្បូង, នៅរយៈកម្ពស់ជាង២រយម៉ែត្រពីដី។ កំពុងជិះយន្តហោះកណ្ដាលអាកាសសុខៗ, បុរសចម្លែកម្នាក់ស្រាប់តែងើបពីកៅអី និងដើរទៅបើកទ្វារក្រោយយន្តហោះ ដែលជាប្រភេទច្រកទ្វារសម្រាប់គ្រាអាសន្ន។ ទ្វារនេះត្រូវគេហាមប៉ះពាល់ដាច់ខាត។ អនុញ្ញាតឱ្យប្រើប្រាស់សម្រាប់តែគ្រាអាសន្នប៉ុណ្ណោះ។
![](https://kohsantepheapdaily.com.kh/wp-content/uploads/2023/05/1255b5c6680bd9525cdafbbc08f69508-2.jpg)
នៅពេលទ្វារចាប់ផ្ដើមបើកជាបណ្ដើរៗ, ខ្យល់ក៏ចាប់ផ្ដើមបក់ចូលទៅក្នុងយន្តហោះ។ សាក្សីនិយាយថានៅពេលមើលក្រឡាមិនស្រួល, អ្នកដំណើរខ្លះស្ទុះទៅឃាត់គាត់ ទាន់ពេលទ្វារមិនទាន់បើកចំហទាំងស្រុង។ ប៉ុន្តែជាការឥតអំពើ, ទ្វារបើកចំហទាំងស្រុង។ ពេលនោះ, គាត់ដើរទៅឈរនៅមាត់ទ្វារយន្តហោះ និងសម្លឹងមើលទៅខាងក្រៅធ្វើប្រហើរ។ ហាក់ដូចជាគាត់កំពុងតែឈរនៅមាត់ទ្វារផ្ទះរបស់ខ្លួនឯង។ មិនតែប៉ុណ្ណោះ, គាត់ហាក់ដូចជាចង់ហក់ចេញពីយន្តហោះបន្តិច អីបន្តិច។
![](https://kohsantepheapdaily.com.kh/wp-content/uploads/2023/05/348eeb4fd536ee5ffbed86079e8d1c65.jpg)
នៅពេលទ្វារបើកចំហ, ខ្យល់ក៏ចាប់ផ្ដើមបក់វូៗចូលទៅក្នុងយន្តហោះប្រៀបបាននឹងខ្យល់កន្ត្រាក់។ អ្នកដំណើរចាប់ផ្ដើមមានអារម្មណ៍ជ្រួលច្របល់។ ជួបនឹងស្ថានការណ៍អីចឹងៗធ្វើឱ្យអ្នកខ្លះវេទនាផ្លូវចិត្តបំផុត។ នៅក្នុងយន្តហោះនោះគ្មាននរណាអង្គុយបានសុខទេ។ គ្រប់គ្នាចាប់ផ្ដើមផ្អើលឈូឆរ។ សូម្បីតែពីឡុតដែលកំពុងតែបញ្ជាដៃចង្កូតក៏ងាកមើលក្រោយផងដែរ។
អ្នកដំណើរដែលអង្គុយនៅក្បែរច្រកចេញនោះខំទប់ខ្លួន ខ្លាចធ្លាក់ចេញពីយន្តហោះអ្នកដំណើរម្នាក់ប្រាប់ថា «ពេលនោះ, ពួកយើងហាក់ដូចជាអស់ព្រលឹងព្រលះពីក្នុងខ្លួនតែម្ដង។ នៅពេលភ័យខ្លាំងពេក, អ្នកដំណើរចាប់ផ្ដើមបាត់មាត់បាត់កជាបន្តបន្ទាប់។ ជាពិសេស, អ្នកដែលអង្គុយកៀកនឹងទ្វារយន្តហោះ។ បុគ្គលិកយន្តហោះក៏វ៉ៃអាយកូមហៅគ្រូពេទ្យសង្គ្រោះបន្ទាន់»។ អ្នកដំណើរម្នាក់ទៀតប្រាប់ថា «ពេលនោះ, គាត់គិតថាប្រហែលជាគាត់មិនរស់ទេមើលទៅ, យន្តហោះផ្ទុះឆេះតែឥឡូវហ្នឹងហើយ,ក្មេងៗស្រែកយំកងរំពងពេញយន្តហោះដោយសេចក្ដីភ័យខ្លាច»។
អ្នកអង្គុយនៅមាត់ទ្វារចំហនោះ ខំទប់ខ្លួន ខ្លាចធ្លាក់ចេញពិយន្តហោះទាំងអ្នកដំណើរ និងពីឡុត គិតថាទោះបីស្លាប់ក៏ដោយ រស់ក៏ដោយ, ពួកគេត្រូវតែខិតខំពុះពារហែលឆ្លងស្ថានភាពដ៏លំបាកនេះ រហូតដល់បានចុះចតនៅព្រលានយន្តហោះទីក្រុងដេគូ (Daegu)។ នៅទីបំផុត, អ្នកដំណើរទាំង១៩៤នាក់បានសុខសប្បាយទាំងអស់គ្នា។ ប៉ុន្តែមុននឹងបានសុខសប្បាយ, អ្នកខ្លះត្រូវគេដឹកទៅពេទ្យ, អ្នកខ្លះមានបញ្ហាថប់ដង្ហើម, ស្រឺតផ្លូវដង្ហើម និងបាត់មាត់បាត់ក។ នេះបើយោងតាមសារព័ត៌មានក្នុងស្រុក។
អ្នកដំណើរយ៉ាងតិច១២នាក់ត្រូវបានគេដឹកតាមរថយន្តគិលានសង្គ្រោះទៅមន្ទីរពេទ្យ ដោយសារពួកគេមានអារម្មណ៍ស្រឺត បាត់មាត់បាត់កនៅពេលយន្តហោះចុះចតដល់ដី, សមត្ថកិច្ចក៏ចូលទៅចាប់គាត់ភ្លាមៗតែម្ដង។ គាត់មានសតិមិនសូវល្អប៉ុន្មានទេ។ នៅពេលសួរនាំច្រើនពេក, គាត់ហាក់ដូចជាវិលក្បុង, និយាយឥតដឹងក្បាល ឥតដឹងកន្ទុយ។ ដូច្នេះ សមត្ថកិច្ចក៏ផ្អាកសួរត្រឹមនេះសិន។ បុរសវ័យ៣៣ឆ្នាំរូបនេះប្រាប់ថានៅពេលនោះ, គាត់ហាក់ដូចជាមានអារម្មណ៍អន្ទះអន្ទែង ចង់ចេញជាប្រញាប់។ គាត់ប្រាប់បន្តទៀតថាគាត់មានអារម្មណ៍ស្ត្រែសខ្លាំងមែនទែន បន្ទាប់ពីអស់ការងារធ្វើទាំងកណ្ដាលទី។ សមត្ថកិច្ចចង់ឃុំឃាំងគាត់ជាបណ្ដោះអាសន្នសិន ដើម្បីបន្តការស៊ើបអង្កេតឱ្យបានអស់អាចម៍ អស់នោម, មុននឹងប្ដឹងគាត់ទៅតុលាការ។ បើតុលាការរកឃើញថាគាត់មានកំហុស, គាត់អាចនឹងជាប់ពន្ធនាគារដប់ឆ្នាំ។
![](https://kohsantepheapdaily.com.kh/wp-content/uploads/2023/05/208069a13d363bcb621179da091cc810.jpg)
កាលពីឆ្នាំ២០២០, នារីជនជាតិអង់គ្លេសម្នាក់ត្រូវតុលាការផ្ដន្ទាទោសឱ្យជាប់ពន្ធនាគារ២ឆ្នាំ ដោយសារនាងព្យាយាមបើកទ្វារក្រោយយន្តហោះ។ កាលនោះ នាងគ្រាន់តែចង់ព្យាយាមបើក, ប៉ុន្តែមិនទាន់បើកបានបានសម្រេចនៅឡើយទេ។ នេះបើយោងតាមការផ្សាយរបស់ទូរទស្សន៍អេប៊ីស៊ីអូស្ត្រាលី។
នារីជនជាតិអង់គ្លេសឈ្មោះ Chloe Haines ដែលត្រូវតុលាការផ្ដន្ទាទោសឱ្យជាប់ពន្ធនាគារ២ឆ្នាំ ពីបទព្យាយាមបើកទ្វារក្រោយយន្តហោះសមត្ថកិច្ចយល់ថាសំណុំរឿងនេះមានភាពមិនប្រក្រតី១ចំនួន។ ឧទាហរណ៍ តើគាត់បើកទ្វារក្រោយយន្តហោះដើម្បីអ្វី? និងទី២- ហេតុអ្វីបានជាគាត់អាចបើកច្រកនេះបានងាយស្រួលម៉្លេះ? ធម្មតា, ទ្វារក្រោយយន្តហោះមិនអាចបើកបានដោយងាយស្រួលទេ ព្រោះវាត្រូវការកូនសោពិសេស ដែលមានតែបុគ្គលិកក្រុមហ៊ុនទើបអាចបើកបាន។
![](https://kohsantepheapdaily.com.kh/wp-content/uploads/2023/05/2f83fb4de14342ab01568ce545abb653.jpg)
កាលពីពេលកន្លងមក ក៏ធ្លាប់មានមនុស្សបើកទ្វារក្រោយយន្តហោះផងដែរ។ ប៉ុន្តែពួកគេបើកនៅពេលយន្តហោះឈប់ស្ងៀម ឬពេលយន្តហោះកំពុងរត់នៅលើដី។ ចំពោះករណីបើកទ្វារកណ្ដាលអាកាសបែបនេះគឺពុំដែលមានទេពីមុនមក៕
ប្រភព៖ រ៉យទ័រ, ប៊ីប៊ីស៊ី និងនិងប្រភពដទៃទៀត
https://www.malaymail.com/news/world/2023/05/27/report-man-who-opened-asiana-plane-door-in-mid-air-tells-south-korean-police-he-was-uncomfortable/71165
https://www.bbc.com/news/world-asia-65705276
https://abcnews.go.com/Politics/after-man-opens-plane-door-mid-flight-flyers/story?id=99628573
https://www.bbc.com/news/av-embeds/65705276/vpid/p0fqm1mb (Video)
![](https://kohsantepheapdaily.com.kh/wp-content/uploads/2023/05/13264068d108c6901b3592ea654fcd57-12.jpg)
សមត្ថកិច្ចកូរ៉េខាងត្បូងដែលកាន់សំណុំរឿងនេះ កំពុងផ្ដល់បទសម្ភាសសង្ខេបៗដល់អ្នកកាសែត
ចែករំលែកព័តមាននេះ