សម្តេចតេជោ ហ៊ុន សែន នាយករដ្ឋមន្ត្រី បានគូសបញ្ជាក់ជាសាធារណៈថា ត្រកូល «ហ៊ុន» ជាត្រកូលការពារព្រះមហាក្សត្រ ដែលមិនដូចអ្នកខ្លះក្បត់ជាតិ៣ជំនាន់
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី បានគូសបញ្ជាក់ជាសាធារណៈថា ត្រកូល «ហ៊ុន» ជាត្រកូលការពារព្រះមហាក្សត្រ ដែលមិនដូចអ្នកខ្លះក្បត់ជាតិ៣ជំនាន់។
ថ្លែងក្នុងពិធីប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យភូមិន្ទកសិកម្ម, វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម នាព្រឹកថ្ងៃទី១៥ ខែឧសភា ឆ្នាំ២០២៣ នៅសាលសន្និបាតកោះពេជ្រ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា ត្រកូល «ហ៊ុន» តាំងពីដើមមក គឺជាត្រកូលការពារព្រះមហាក្សត្រ។ ហើយអនាគតនាយករដ្ឋមន្ត្រីរបស់គណបក្សប្រជាជន ក៏ជាអ្នកការពារព្រះមហាលក្សត្រ មិនដូចត្រកូលមនុស្សមួយចំនួននោះទេ គឺជាត្រកូលក្បត់ជាតិ រហូតដល់៣ជំនាន់ផងដែរ។ ជាងនេះ ជាអ្នកជេរប្រមា.ថព្រះមហាក្សត្រ និងឲ្យព្រះមហាក្សត្រចុះចេញពីតំណែង។
ការលើកឡើងរបស់សម្តេចតេជោ ទំនងចង់សំដៅដល់ទណ្ឌិត សម រង្ស៊ី ដែលបានជាប់ឈ្មោះថា «កូនក្បត់ជាតិ៣ជំនាន់»។
សម្តេចតេជោបានប្តេជ្ញាថា នឹងការពារព្រះមហាក្សត្រ ទោះស្ថិតក្នុងតម្លៃណាក៏ដោយ។ សម្តេចក៏បានចំអកទៅកាន់ក្រុមប្រឆាំងថា ដោយសារតែមេដឹកនាំរបស់ខ្លួនល្ងង់ បានជាចាញ់រហូត ហើយគណបក្សប្រជាជនកម្ពុជា ប្រកាសស្វាគមន៍រាល់ការចង់ចូលរួមពីគ្រប់បណ្តាគណបក្សនយោបាយផងដែរ៕
ចែករំលែកព័តមាននេះ