តារាកំប្លែងដ៏ល្បីល្បាញរបស់ហុងកុង លោកស្ទីហ្វឹន ចូវ (Stephen Chow) ដែលគេច្រើនស្គាល់ថាទិនហ្វ៊ី ក្រៅពីជាតារាភាពយន្ត លោកក៏ជាអ្នកដឹកនាំខ្សែភាពយន្តផងដែរ។ តាមព័ត៌មានចុងក្រោយនេះបង្ហាញថាលោកកំពុងសហការគ្នាជាមួយក្រុមចម្រៀងតៃវ៉ាន់ម៉េដេ (Mayday)…
តារាកំប្លែងដ៏ល្បីល្បាញរបស់ហុងកុង លោកស្ទីហ្វឹន ចូវ (Stephen Chow) ដែលគេច្រើនស្គាល់ថាទិនហ្វ៊ី ក្រៅពីជាតារាភាពយន្ត លោកក៏ជាអ្នកដឹកនាំខ្សែភាពយន្តផងដែរ។ តាមព័ត៌មានចុងក្រោយនេះបង្ហាញថាលោកកំពុងសហការគ្នាជាមួយក្រុមចម្រៀងតៃវ៉ាន់ម៉េដេ (Mayday) ដើម្បីបង្កើតក្រុមថ្មី១ទៀតដែលលោកឱ្យឈ្មោះថា «ក្រុមចម្រៀងមានពេលវេលាកំណត់»។
តាមរយៈការបង្ហោះនៅលើអ៊ីនស្តាក្រាមកាលពីថ្ងៃសៅរ៍, តារាកំប្លែងដែលមានវ័យ៦០ឆ្នាំរូបនេះបានផ្សព្វផ្សាយរូបថតរបស់លោកថតជុំគ្នាជាមួយសមាជិកក្រុមម៉េដេដែលមានចំនួនបួននាក់។ ប៉ុន្តែអ្នកវាយស្គរដៃឯក លោកក័នយូ (Guan You) មិនបានមានវត្តមាននៅក្នុងពិធីថតរូបនោះទេ។ ទិនហ្វ៊ី និងក្រុមតន្ត្រីករទាំងនោះបានព្រមព្រៀងគ្នាបង្កើតក្រុមថ្មី១ឈ្មោះជូនដេ (Juneday)។
ទិនហ្វ៊ីនិយាយបែបកំប្លែងនៅលើស្ទេថឺសអ៊ីនស្ត្រាក្រាម (Instagram status) របស់លោកថាក្រុមថ្មីនេះបង្កើតឡើងយ៉ាងហោចណាស់ក៏បានលើសពី២៤ម៉ោងដែរ។ លោកថាយើងកំពុងខិតខំធ្វើការយ៉ាងដុតដៃដុតជើងដើម្បីកំណត់ប្រភេទបទភ្លេង និងដើម្បីធ្វើម៉េចចេញបទចម្រៀងទី១ភ្លាម មិនឱ្យរង់ចាំយូរទេ ត្រូវតែទទួលបានការនិយមគាំទ្រភ្លូកទឹកភ្លូកដីតែម្ដង។
កាលពីថ្ងៃអាទិត្យ, ប្រធានក្រុមតន្ត្រីម៉េដេ លោកអាស៊ីន (Ashin) វ័យ៤៧ឆ្នាំ បានបង្ហោះរូបថតនៅក្នុងឱកាសជួបជុំគ្នាជាមួយទិនហ្វ៊ី។ គាត់ក៏បង្ហោះរូបថតដទៃទៀតជាមួយនឹងទិនហ្វ៊ីតាំងពីមុននោះផងដែរ។ ទិនហ្វ៊ីបានជួបសមាជិកក្រុមម៉េដេដោយឥតព្រាងទុកកាលពីសប្ដាហ៍មុន, នៅពេលសមាជិកក្រុមម៉េដេធ្វើដំណើរទស្សនាចរណ៍កម្សាន្តនៅទីក្រុងហុងកុង។
គ្រាន់តែពួកគេជួបគ្នាភ្លាម ក៏និយាយត្រូវចិត្តគ្នាភ្លែត ហាក់ដូចជាមាននិស្ស័យជាមួយគ្នាតាំងពីយូរមកហើយ។ ដោយមិនចង់រង់ចាំយូរទេតទៅទៀត, ទិនហ្វ៊ីជាមនុស្សល្បីស្រាប់។ ពួកគេក៏ផ្ដួចផ្ដើមបង្កើតក្រុមផលិតកម្មសម្ដែងថ្មីភ្លាមៗតែម្ដង។
ទិនហ្វ៊ីបង្ហោះស្ទេថឺស (status) នៅលើអ៊ីនស្ត្រាក្រាមថា «សមាជិកទាំង៤រូបដែលបានជួបគាត់នោះបានកោតសរសើរគាត់មិនដាច់ពីមាត់ចំពោះសមត្ថភាពសម្ដែងរបស់គាត់។ មិនតែប៉ុណ្ណោះ, ពួកគេបានជូនកាដូសម្រាប់គាត់នៅក្នុងការជួបគ្នាគ្រាដំបូងនូវនំដំណាប់ម្នាស់១ចំនួនផងដែរ។ ពួកគេគួរសមណាស់ និងបានជម្រាបជូនគាត់ឱ្យរង់ចាំដំណឹងល្អ។ មិនយូរទេ, ពួកគេនឹងហៅទូរស័ព្ទទៅរកគាត់»។
មិនយូរប៉ុន្មាន ទិនហ្វ៊ីក៏បានបង្ហោះស្ទេថឺសនៅលើអ៊ីនស្តាក្រាម អមដោយរូបថត១សន្លឹកបង្ហាញនំស្នូលដំណាប់ម្នាស់ដែលពួកគេជូនគាត់ជាកាដូ។ ទិនហ្វ៊ីសរសេររៀបរាប់ថា «សង្ឃឹមថាពេលខ្ញុំញ៉ាំនំនេះមិនទាន់អស់ទេ ពួកគេមុខតែហៅទូរស័ព្ទមកខ្ញុំជាក់ជាមិនខានឡើយ»។ គ្រាន់តែឮថាទិនហ្វ៊ី និងក្រុមតន្ត្រីតៃវ៉ាន់ត្រៀមបើកផលិតកម្មសម្ដែងថ្មី, ក្រុមអ្នកប្រើប្រាស់បណ្ដាញសង្គមសម្ដែងការអបអរសាទរយ៉ាងច្រើនលើសលប់ ។ ប្រធានក្រុមនេះ គឺលោកអាស៊ីន (Ashin)មិនរង់ចាំយូរទេ។
គាត់ក៏សួរប្រិយមិត្តអ្នកគាំទ្រថាតើពួកគេចង់ឱ្យទិនហ្វ៊ីថតឈុតសម្ដែងនៅក្នុងបទចម្រៀងមួយណា។ ត្រឹមតែរយៈពេលបីម៉ោងប៉ុណ្ណោះ អ្នកប្រើប្រាស់បណ្ដាញសង្គមបានសរសេរខំមឹនឆ្លើយតបរហូតដល់ជាង៤៧ខេ (47K)។ នៅក្នុងចំណោមនោះ, អ្នកខ្លះចង់ឱ្យទិនហ្វ៊ីសម្ដែងនៅក្នុងបទចម្រៀងតាំងពីយូរមកហើយ គឺបទជាភាសាអង់គ្លេសដែលមានចំណងជើងថាអូនលីយូ (Only You) ជាបទចម្រៀងដើមរបស់ក្រុមដឹផ្លេតថឺ (The Platters) និងត្រូវបានថតឡើងវិញកាលពីឆ្នាំ១៩៩៥។
បទចម្រៀងអូនលីយូ ត្រូវបានដាក់បញ្ចូលនៅក្នុងខ្សែភាពយន្តរឿង ស្ដេចស្វាទិនហ្វ៊ីវគ្គ២ (A Chinese Odyssey: Part 2) ចេញផ្សាយឆ្នាំ១៩៩៥។ រឿងនេះសម្ដែងដោយទិនហ្វ៊ី និងតារាជើងចាស់លោកឡាវកាយីង (Law Kar Ying)៕
ប្រភព៖ The Strait Times
ចែករំលែកព័តមាននេះ