មន្ត្រីមន្ទីរទេសចរណ៍ខេត្តសៀមរាប បានឱ្យដឹងនៅរសៀលថ្ងៃទី១៧ ខែមេសា ឆ្នាំ២០២៣នេះថា ភ្ញៀវទេសចរជាតិ និងអន្តរជាតិ ព្រមទាំងបងប្អូនប្រជាពលរដ្ឋបានមកដើរលេងកម្សាន្តក្នុងព្រឹត្តិការណ៍អង្គរសង្ក្រាន្ត
ខេត្តសៀមរាប ៖ មន្ត្រីមន្ទីរទេសចរណ៍ខេត្តសៀមរាប បានឱ្យដឹងនៅរសៀលថ្ងៃទី១៧ ខែមេសា ឆ្នាំ២០២៣នេះថា ភ្ញៀវទេសចរជាតិ និងអន្តរជាតិ ព្រមទាំងបងប្អូនប្រជាពលរដ្ឋបានមកដើរលេងកម្សាន្តក្នុងព្រឹត្តិការណ៍អង្គរសង្ក្រាន្ត នៅថ្ងៃទី១៦ ខែមេសា ឆ្នាំ២០២៣ មានចំនួនប្រមាណ ១.០៣០. ០២៤ នាក់ ក្នុងនោះភ្ញៀវទេសចរជាតិ និងបងប្អូនប្រជាពលរដ្ឋមានចំនួនប្រមាណ ១.០២៧.០០០ នាក់។
មន្ត្រីមន្ទីរទេសចរណ៍ខេត្តសៀមរាប បានបន្តថា ពួកគាត់បានអញ្ជើញទៅកម្សាន្តនៅក្នុងព្រឹត្តិការណ៍អង្គរសង្ក្រាន្តក្នុងតំបន់អង្គរ និងក្នុងក្រុងសៀមរាប មានចំនួនប្រមាណ ៨៥០.០០០ នាក់, នៅរមណីយដ្ឋានឧទ្យានជាតិភ្នំគូលែន ចំនួប្រមាណ ១៥.០០០ នាក់, តំបន់ទន្លេសាប ចំនួនប្រមាណ ១២.០០០ នាក់ និងនៅក្នុងសហគមន៍ទេសចរណ៍ ព្រមទាំងតំបន់រមណីយដ្ឋានផ្សេងៗទៀត ចំនួនប្រមាណ ១៥០.០០០ នាក់ ក្នុងនោះក៏មានភ្ញៀវទេសចរបរទេសចំនួន ៣.០២៤ នាក់ផងដែរ។
ប្រភពពីមន្ត្រីនៃមន្ទីរទេសចរណ៍ខេត្ត បញ្ជាក់ថា សម្រាប់រយៈពេល៣ថ្ងៃ នៃព្រឹត្តិការណ៍អង្គរសង្ក្រាន្ត ចាប់ពីថ្ងៃទី១៤-១៥-១៦ ខែមេសា ឆ្នាំ២០២៣នេះ មានភ្ញៀវទេសចរជាតិ និងអន្តរជាតិ ព្រមទាំងបងប្អូនប្រជាពលរដ្ឋបាននាំគ្នាដើរកម្សាន្ត ចំនួន ២.១២០.៣៧៣នាក់ រួមមាន ៖ ភ្ញៀវទេសចរជាតិ និងបងប្អូនប្រជាពលរដ្ឋ ចំនួនប្រមាណ ២.១០៧.០០០ នាក់ ក្នុងនោះ នៅក្នុងព្រឹត្តិការណ៍អង្គរសង្ក្រាន្តក្នុងតំបន់អង្គរ និងក្នុងក្រុងសៀមរាប ចំនួនប្រមាណ ១.៧៥០.០០០ នាក់, នៅរមណីយដ្ឋានឧទ្យានជាតិភ្នំគូលែន ចំនួនប្រមាណ ៣៨.០០០ នាក់, តំបន់ទន្លេសាប ចំនួនប្រមាណ ២៤.០០០ នាក់, នៅសហគមន៍ទេសចរណ៍ និងតំបន់រមណីយដ្ឋានផ្សេងៗមានចំនួនប្រមាណ ២៩៥.០០០ នាក់ និងភ្ញៀវទេសចរបរទេសផ្ទៃក្នុងមានចំនួន ១៣.៣៧៣ នាក់ផងដែរ៕
ចែករំលែកព័តមាននេះ