ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលប្រព្រឹត្តទៅរយៈពេល៣ថ្ងៃ គឺចាប់ពីថ្ងៃទី១៤ រហូតដល់ថ្ងៃ១៦ ខែមេសា ឆ្នាំ២០២៣ ភ្ញៀវទេសចរជាតិ និងអន្តរជាតិមកលេងកម្សាន្តខេត្តកំពង់ចាម មានសរុបរហូតដល់ជិត២លាននាក់។ ជាមួយគ្នានោះ
ខេត្តកំពង់ចាម ៖ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលប្រព្រឹត្តទៅរយៈពេល៣ថ្ងៃ គឺចាប់ពីថ្ងៃទី១៤ រហូតដល់ថ្ងៃ១៦ ខែមេសា ឆ្នាំ២០២៣ ភ្ញៀវទេសចរជាតិ និងអន្តរជាតិមកលេងកម្សាន្តខេត្តកំពង់ចាម មានសរុបរហូតដល់ជិត២លាននាក់។ ជាមួយគ្នានោះ គេឃើញឯកឧត្តម អ៊ុន ចាន់ដា អភិបាលខេត្តដឹកនាំប្រតិភូ អញ្ជើញទៅបួងសួងនៅប្រាសាទនគរបាជ័យផងដែរ ស្ថិតក្នុងស្រុកកំពង់សៀម ដែលជាកន្លែងមានបារមីស័ក្តិសិទ្ធ សុំសេចក្តីសុខពីម្ចាស់ទឹកម្ចាស់ដី។ ក្នុងនោះផងដែរ នៅតាមទីវត្តរាមនានា ក៏រៀបចំសង្ក្រាន្ត ដើម្បីទទួលទេវតាឆ្នាំថ្មី ព្រមទាំងរៀបចំកម្មវិធីសប្បាយៗជូនដល់ប្រជាពលរដ្ឋ។
បើតាមព្រះតេជគុណ សេង រដ្ឋា ចៅអធិការវត្តនគរបាជ័យក្រៅ មានសង្ឃដីកាថា ដើម្បីអបអរសាទរក្នុងឱកាសបុណ្យចូលឆ្នាំខ្មែរប្រពៃណីជាតិចំនួន៣ថ្ងៃ នៅក្នុងបរិវេណវត្តនគរបែកជ័យ បានរៀបចំស្តង់ពិព័រណ៍ឃុំទាំង១៥ ក្នុងស្រុកកំពង់សៀម ពីផលិតផលកសិកម្ម និងដំណាំកសិករឧស្សាហកម្ម ព្រមទាំងសិប្បកម្មផលិតដោយដៃផ្ទាល់ ដើម្បីដាក់បង្ហាញឲ្យប្រជាពលរដ្ឋដែលមកកម្សាន្តលេង បានឃើញ និងមានចំណាប់អារម្មណ៍។
ព្រះចៅអធិការវត្តនគរបាជ័យក្រៅ មានដីកាបន្តថា ក្រោមការដឹកនាំរបស់ប្រមុខរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខធ្វើឲ្យប្រទេសកម្ពុជា មានសុខសន្តិភាពហើយប្រជាពលរដ្ឋអាចធ្វើដំណើរទៅណាមកណាគ្រប់ទិសទី ដោយមិនមានការព្រួយបារម្ភឡើយ។ ហើយសម្រាប់វត្តនគរបាជ័យក្រៅ គឺរៀបចំសង្ក្រាន្តទទួលទេវតាឆ្នាំថ្មី ជាមួយនោះក៏រៀបចំលេងល្បែ.ងប្រជាប្រិយដូចជា ទាញព្រាត់ វា.យក្អម ការប្រគំតន្ត្រីសម័យនាពេលរាត្រីដើម្បីឱ្យពុទ្ធបរិស័ទចំណុះជើងវត្តទាំងនៅទីជិត ទីឆ្ងាយ មករាំកម្សាន្តយ៉ាងសប្បាយលេង។ ហើយក៏មានកម្លាំងប្រជាការពារ កម្លាំងនគរបាល សហការការពារពង្រឹងសន្តិសុខ និងសណ្ដាប់ធ្នាប់បានល្អទៀតផង។
ព្រះចៅអធិការវត្តនគរបាជ័យក្រៅ មានដីកាបន្តទៀតថា ប្រាសាទនគរបាជ័យ ដែលត្រូវបានស្ថាបនាឡើងមកដល់បច្ចុប្បន្ននេះគឺមានអាយុកាលរាប់ពាន់ឆ្នាំមកហើយ ហើយត្រូវបានឯកឧត្តម អ៊ុន ចាន់ដា អភិបាលខេត្ត ដឹកនាំមន្ត្រីរាជការអញ្ជើញមកក្រុងពាលីបួងសួងសុំសេចក្តីសុខ សម្រាប់មន្ត្រីរាជការ ក៏ដូចជា ប្រជាពលរដ្ឋរស់នៅក្នុងខេត្តកំពង់ចាមទាំងមូល។ ហើយនៅឆ្នាំ២០២៤ ខាងមុខនេះ ក្នុងឱកាសបុណ្យចូលឆ្នាំថ្មីប្រពៃណីជាតិ នឹងមានការរៀបចំសង្ក្រាន្តឱ្យបានធំជាងឆ្នាំ២០២៣ អាស្រ័យលើធនធានដែលមាន។
ចំណែកឯកឧត្តម អ៊ុន ចាន់ដា អភិបាលខេត្ត មានប្រសាសន៍ដោយលើកឡើងដែរថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរមកដល់ គឺរដ្ឋបាលខេត្តតែងតែរៀបចំពិធីសំណេះសំណាលជាមួយមន្ត្រីរាជការ កងកម្លាំងប្រដាប់អាវុធទាំង៣ ព្រមទាំងមន្ត្រីចូលនិវត្តន៍ ដោយធ្វើឡើងនៅសល់សន្និសីទសាលាខេត្ត។ ជាមួយនោះ ត្រូវរក្សាប្រពៃណីសាមគ្គីភាពនេះ ឲ្យបានយូរអង្វែងតទៅមុខទៀត សំខាន់គឺប្រជាជនមានទំនុកចិត្តមកលើអាជ្ញាធរ។
ឯកឧត្តម អ៊ុន ចាន់ដា អភិបាលខេត្ត មានប្រសាសន៍បន្តថា ដើម្បីពង្រឹងចំណេះដឹងដល់មន្ត្រីរាជការឱ្យកាន់តែមានភាពរឹងមាំ គឺមានការបើកវគ្គបំប៉នចំណេះដឹងឱ្យកាន់តែមានលក្ខណៈល្អប្រសើរបន្ថែមទៀត។ តាមរយៈការបម្រើសេវាជូនដល់ប្រជាពលរដ្ឋមិនប្រកាន់ពូជសាសន៍ពណ៌សម្បុរ ឬនិន្នាការនយោបាយឡើយ។ ហើយសម្រាប់នៅក្នុងអាណត្តិទី២ ដែលព្រះមហាក្សត្របានតែងតាំងឯកឧត្តមជាអភិបាលខេត្តកំពង់ចាមបន្តទៀត គឺប្តេជ្ញាខិតខំប្រឹងប្រែងធ្វើយ៉ាងណាឲ្យល្អជាងអាណត្តិទី១។ នៅខែកក្កដាខាងមុខ ដល់ពេលវេលាដែលត្រូវបោះឆ្នោតដូច្នេះសូមបោះឆ្នោតជូនសម្ដេចតេជោ ជាបេក្ខជននាយករដ្ឋមន្ត្រី និងបន្តគាំទ្រឯកឧត្តម ហ៊ុន ម៉ាណែត ជាបេក្ខជននាយករដ្ឋមន្ត្រីនាអាណត្តិក្រោយ។ មន្ត្រីរាជការត្រូវតែមានការអត់ធ្មត់ធ្វើយ៉ាងណា ខិតខំបម្រើសេវាជូនដល់ប្រជាពលរដ្ឋ ដើម្បីឲ្យពួកគាត់ចូលចិត្តស្រឡាញ់ ហើយត្រូវខិតខំដោះស្រាយបញ្ហាវិវាទដីធ្លីនៅមូលដ្ឋានឱ្យបានចប់សព្វគ្រប់ ឬក៏ដោះស្រាយក្រៅប្រព័ន្ធតុលាការ។
ចំណែកលោកស៊ាន សុគុណ ប្រធានមន្ទីរទេសចរណ៍ខេត្តវិញ បានលើកឡើងឲ្យដឹងដែរថា នៅក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ចាប់ពីថ្ងៃទី១៤ រហូតដល់ថ្ងៃទី១៦ ខែមេសា ឆ្នាំ២០២៣ ភ្ញៀវទេសចរជាតិ និងអន្តរជាតិ នាំគ្នាមកកម្សាន្តលេងតាមរមណីយ៍ដ្ឋាននានា ក្នុងនោះរួមមាន ៖ ទឹកឆា ប្រាសាទនគរបាជ័យ រមណីយ៍ដ្ឋានភ្នំហាន់ជ័យ និងតំបន់មួយចំនួនទៀតក្នុងខេត្តកំពង់ចាម ភ្ញៀវទេសចរសរុបមានចំនួន ១,៨៣៨,៨១១ នាក់ ក្នុងនោះភ្ញៀវជាតិចំនួន ១,៨៣៨,១៣៥នាក់ និងភ្ញៀវបរទេសចំនួន ៦៧៦នាក់។
ចែករំលែកព័តមាននេះ