ហាងផឹកស៊ីពេលរាត្រីនៅភ្នំពេញកំពុងកើនឡើង
រាជធានីភ្នំពេញ ៖ បច្ចុប្បន្ន មិនថាយុវវ័យ និងវ័យកណ្ដាលនោះទេ ភាគច្រើនតែងយកហាងផឹកស៊ី ដោយប៉ុន្មានឆ្នាំចុងក្រោយនេះ គេសង្កេតឃើញថា
រាជធានីភ្នំពេញ ៖ បច្ចុប្បន្ន មិនថាយុវវ័យ និងវ័យកណ្ដាលនោះទេ ភាគច្រើនតែងយកហាងផឹកស៊ី ជាកន្លែងប្រមូលផ្ដុំណាត់ជួបគ្នាដើម្បីជជែកពិភាក្សាការងារ ឬបង្កើនចំណងមិត្តភាពជាដើម ដោយប៉ុន្មានឆ្នាំចុងក្រោយនេះ គេសង្កេតឃើញវត្តមានហាងផឹកស៊ីកើនឡើងជាបន្ដបន្ទាប់នៅបណ្ដាផ្លូវ និងតំបន់សំខាន់ៗមួយចំនួនក្នុងរាជធានីភ្នំពេញ ។
តាមបណ្ដាហាងនីមួយៗ មិនថាថ្ងៃឈប់សម្រាក ឬមានភ្លៀងរលឹមបែបណាទេ គឺតែងតែមានភ្ញៀវចូលរាល់ថ្ងៃ មិនចេះដាច់ បើទោះបីជាហាងទាំងនោះនៅក្បែរៗគ្នាក៏ដោយ ។ ជាក់ស្តែង ដូចជាហាងនៅតំបន់ផ្លូវកម្ពុជាក្រោមជាដើម ចាប់ពីម៉ោង៧យប់ឡើងទៅ នៅតាមចិញ្ចើមផ្លូវសម្បូរដោយម៉ូតូចតតម្រៀបគ្នាយ៉ាងស្អេកស្កះ និងមានបុគ្គលិកចាំស្ទាក់ហៅម៉ូយទៀតផង ។
បើតាមទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានមើលឃើញថា កំណើននៃហាងផឹកស៊ីកើនឡើង គឺមានកត្តា២យ៉ាងធំៗ ។
លោក ង៉ែត ជូ ទីប្រឹក្សាជាន់ខ្ពស់រូបនេះបានថ្លែងកាលពីថ្ងៃទី១៦ តុលា ម្សិលមិញថា ៖«មានកត្តាសំខាន់ចំនួន២ ដែលនាំឲ្យហាងផឹកស៊ីកើតឡើងច្រើន គឺយុវវ័យនិយមផឹកស៊ីនៅក្រៅផ្ទះកាន់តែច្រើន ដោយសារតែពួកគេមានប្រាក់ចំណូលសមរម្យ និងការនិយមបើកមុខរបរតាមគ្នារបស់សហគ្រិន ដោយសារសមត្ថភាពយល់ដឹងរបស់ពួកគេនៅមានកម្រិតនៅឡើយ។ ចំណែកយុវវ័យដែលនិយមចូលចិត្តណាត់គ្នាផឹកស៊ីពេលល្ងាចជាមួយក្រុមការងារនៅតាមហាងនោះ ភាគច្រើនជាអ្នកដែលមានប្រាក់ខែចាប់ពី៨០០ដុល្លារចុះក្រោម តែបើប្រាក់ខែពី៨០០ដុល្លារឡើងទៅ ហាក់ដូចមិនសូវចូលហាងអីចឹងៗប៉ុន្មានទេ ព្រោះពួកគេបារម្ភពីសុខភាពច្រើនជាង » ។
លោកថា ៖« អនាម័យនៃការធ្វើម្ហូបអាហារនៅតាមហាងខ្លះ អាចធ្វើឱ្យប៉ះពាល់ដល់អ្នកបរិភោគ ដោយសារកម្ពុជាពុំទាន់មានបទដ្ឋានត្រួតពិនិត្យបានច្បាស់លាស់នៅឡើយ » ៕
ចែករំលែកព័តមាននេះ