រាជធានីភ្នំពេញ ៖ បុរសបីនាក់ជិះម៉ូតូឆ្លងបញ្ច្រាសទិសទៅចរាចរណ៍ ត្រូវរថយន្តសណ្តោងរ៉ឺម៉កដឹកទំនិញបើកចុះពីលើស្ពានព្រះមុនីវង្ស ចាប់ហ្វ្រាំងមិនទាន់ បានជ្រុលទៅបុកចំពីមុខពេញទំហឹង បណ្តាលឲ្យអូសម៉ូតូចូលក្រោមរថយន្តជិត១០ម៉ែត្រ និងធ្វើឲ្យមនុស្សរងរបួសធ្ងន់ស្រាលបីនាក់ ហេតុការណ៍នេះដែរ បានកើតឡើងនៅវេលាម៉ោង១២និង១០នាទីរំលងអធ្រាត្រឈានចូលថ្ងៃទី១០ ខែតុលា ឆ្នាំ២០១៧ ចំណុចគល់ស្ពានព្រះមុនីវង្សថ្មីត្រើយខាងកើត ផ្លូវជាតិលេខ១ កែងនិងផ្លូវ៣៦៩ សង្កាត់ច្បារអំពៅ១ ខណ្ឌច្បារអំពៅ ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ បុរសបីនាក់មិនដឹងថាចេញពីផឹកស៊ីនៅកន្លែងណានោះទេ គឺបានជិះម៉ូតូម៉ាកហុងដាឌ្រីម ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ ១CM-២៥២៨ បានធ្វើដំណើរតាមផ្លូវ៣៦៩ ហៅផ្លូវព្រែកប្រា ក្នុងទិសដៅពីត្បូងទៅជើង ខណៈមកដល់ចំណុចកើតហេតុ បានបត់ឆ្វេងឆ្លងបញ្ច្រាសផ្លូវឡើងទៅស្ពានព្រះមុនីវង្សថ្មីវិញ ស្របពេលនោះដែរ ក៏ស្រាប់តែបុរសម្នាក់បានបើករថយន្តសណ្តោង ពណ៌ក្រហម ពាក់ស្លាកលេខ ភ្នំពេញ ៣B-៩១៧២ ធ្វើដំណើរចុះពីលើស្ពានព្រះមុនីវង្សថ្មីវិញ ក្នុងទិសដៅពីលិចទៅកើត ក្នុងល្បឿនលឿន ចាប់ហ្រាំងមិនទាន់ ក៏ជ្រុលទៅបុកចំពីមុខពេញទំហឹង បណ្តាលឲ្យម៉ូតូអូសចូលក្រោមរថយន្ត១០ម៉ែត្រ បណ្តាលឲ្យអ្នកជិះម៉ូតូរងរបួសធ្ងន់២នាក់ ត្រូវបានរថយន្តសង្គ្រោះបានមកដឹកយកទៅសង្គ្រោះនៅមន្ទីពេទ្យកាល់ម៉ែត ។ ចំណែកម្នាក់ទៀតរងរបួសដាច់មុខដាច់មាត់ស្រាល ត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លីនិកឯកជន ចំនែកម៉ូតូវិញរងការខូចខាតខ្ទេចផ្នែកខាងមុខ កល់ជាប់នឹងក្រោមរថយន្ត ។
ដោយឡែកខាងរថយន្តរងការខូចខាតខ្ទេចផ្នែកខាងមុខបន្តិចបន្តួច ចំណែកអ្នកបើកបរវិញត្រូវបានសមត្ថកិច្ចឃាត់ខ្លួនយកទៅសាកសួរ នៅអធិការដ្ឋានខណ្ឌច្បាអំពៅ ។ ក្រោយពេលកើតហេតុ រថយន្ត និងម៉ូតូព្រមទាំងអ្នកបើក ត្រូវបានសមត្ថកិច្ចជំនាញបានមកធ្វើការវាស់វែងយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ