ខេត្តរតនគិរី ៖ ក្រុមហ៊ុនចម្ការចេកវៀតណាម «ហ័ងអញយ៉ាឡាយ» បានកាយផ្ដាច់ផ្លូវអ្នកភូមិមិនឱ្យធ្វើដំណើរចេញ-ចូលឆ្លងកាត់ជាយូរមកហើយនោះ ពេលនេះ ប្រជាពលរដ្ឋជាង២០០គ្រួសារ នៅភូមិស្រែឈូក ស្រុកលំផាត់ ខេត្តរតនគិរី មានចប មានប៉ែល និងគ្រឿងចក្រត្រាក់ទ័រចំនួនពីរគ្រឿងផងដែរ នាំគ្នាទៅកាយដីលុបប្រឡាយ និងដាក់លូចំនួនពីរកន្លែង ដើម្បីធ្វើដំណើចេញ-ចូលវិញ ។
សកម្មភាពប្រជាពលរដ្ឋប្រមូលផ្តុំគ្នាកាយដីលុបប្រឡាយនោះ នៅព្រឹកថ្ងៃទី១៥ ខែមីនា ឆ្នាំ២០២៣ ត្រង់ចំណុចក្រុមហ៊ុនចម្ការចេកវៀតណាម «ហ័ងអញយ៉ាឡាយ» ដែលកាយផ្ដាច់ផ្លូវរបស់ពួកគាត់មិនឱ្យធ្វើដំណើរឆ្លងកាត់ចេញ-ចូលភូមិតាំងពីកំឡុងខែ១១ឆ្នាំ ២០២២ មកម្ល៉េះ ទើបពេលនេះ ពួកគាត់នាំគ្នាទៅលុបបំពេញដើម្បីបានប្រើប្រាស់ផ្លូវឡើងវិញ ។
លោកឌី ចាន់ វ័យជាង៨៣ឆ្នាំ តំណាងប្រជាពលរដ្ឋ២១៧គ្រួសារ បានប្រាប់ថា ក្រុមហ៊ុនចម្ការចេករបស់វៀតណាម«ហ័ងអញយ៉ាឡាយ» មានទីតាំងនៅជិតភូមិស្រែឈូក ស្រុកលំផាត់នោះ បានកាយផ្ដាច់ផ្លូវចំនួនពីរកន្លែងឱ្យក្លាយទៅជារណ្ដៅជ្រៅៗមិនឱ្យពួកគាត់បានធ្វើដំណើរដូចមុនឡើយ ។
លោកបន្ដថា ផ្លូវនោះពួកគាត់ធ្លាប់ប្រើប្រាស់ចេញ-ចូលទៅស្រែចម្ការតាំងពីឆ្នាំ១៩៧៩រៀងមក តែមកដល់ឆ្នាំ២០១០ ក៏មានក្រុមហ៊ុនវៀតណាម មកវិនិយោគដាំដើមចេក ហើយក្រុមហ៊ុនថានឹងរៀបចំធ្វើមន្ទីរពេទ្យសាលារៀន រួមនិងផ្លូវជូនប្រជាពលរដ្ឋនៅទីនោះប្រើប្រាស់ផងដែរ ប៉ុន្ដែសន្យាខ្យល់ ទីបំផុតអ្វីដែលក្រុមហ៊ុនបានសន្យានោះ គេមិនបានធ្វើឡើយផ្ទុយទៅវិញ ក្រុមហ៊ុននេះបែរជាកាត់ផ្ដាច់បិទផ្លូវមិនឱ្យពលរដ្ឋប្រើប្រាស់ទៅវិញជាច្រើនខែមកហើយ។ តែបើពលរដ្ឋណាចង់ចេញ-ចូល ត្រូវពាក់កាតរបស់ក្រុមហ៊ុន ទើបអនុញ្ញាត ។
អ្នកតវ៉ាប្រាប់កោះសន្តិភាពថា ដោយសារអស់ជម្រើសទើបពួកយើងរ៉ៃលុយគ្នាទិញលូ៩កង់ យកទៅដាក់ប្រឡាយពីរកន្លែង ដែលគេកាយផ្ដាច់នោះ ដើម្បីចាក់ដីលុបបំពេញវិញងាយស្រួលធ្វើដំណើរទៅស្រែចម្ការបង្ករបង្កើនផលដូចសព្វដង ។ លោកយ៉ាត ណាគ្រី មេឃុំជ័យឧត្ដមបានប្រាប់នៅព្រឹកថ្ងៃទី១៦ ខែមីនា ឆ្នាំ២០២៣នេះថា សកម្មភាពរបស់ប្រជាពលរដ្ឋជាង២០០គ្រួសារ ដែលនាំគ្នាទៅលុបរណ្ដៅដីក្រុមហ៊ុនកាយផ្ដាច់ផ្លូវនោះ លោកមិនទទួលដឹងឮទេ ដោយសាររឿងនេះ លោកបានបញ្ជូនសំណុំរឿងទៅដល់ដៃសាលាស្រុកលំផាត់ជាច្រើនខែហើយ ដើម្បីរង់ចាំធ្វើការដោះស្រាយ ។
ឯលោកនូ ថេរ អភិបាលស្រុកលំផាត់ក៏បានបញ្ជាក់ផងដែរថា ករណីដែលក្រុមហ៊ុនចម្ការចេកវៀតណាមបានកាយផ្ដាច់ផ្លូវនោះ ព្រោះគេមិនចង់ឱ្យប្រជាពលរដ្ឋយើងដើរឆ្លងកាត់ទីនោះតទៅទៀតទេ ព្រោះខ្លាចមានជំងឺឆ្លងប៉ះពាល់ផលដំណាំចេករបស់ក្រុមហ៊ុនគេ ។
លោកបន្ដថា រឿងនេះយើងនិងអភិបាលរងខេត្ដ ធ្លាប់បានជួបជាមួយអគ្គនាយកក្រុមហ៊ុនជជែកដោះស្រាយដែរ ហើយខាងក្រុមហ៊ុនគេថានឹងរៀបចំធ្វើតាមប្រព័ន្ធប្លង់មេ និងធ្វើផ្លូវថ្មីឱ្យពលរដ្ឋប្រើប្រាស់ដាច់ដោយឡែក មួយវាងក្រុមហ៊ុនគឺទៅតាមផ្លូវជាតិលេខ៧៦ ប៉ុន្តែប្រជាពលរដ្ឋមិនព្រមទទួលយកព្រោះវាងឆ្ងាយទៅចម្ការស្រែ ត្រូវប្រើពេល៦ទៅ៧ម៉ោង បើទៅតាមផ្លូវចាស់តែជាង១ម៉ោងទេ។ ចំណែកខាងតំណាងក្រុមហ៊ុនចម្ការចេកវៀតណាម «ហ័ងអញយ៉ាឡាយ» មិនមានការបំភ្លឺអ្វីទេ។
ឯអ្នកភូមិថ្មីឃុំជ័យឧត្ដម ស្រុកលំផាត់ប្រមាណ២០០គ្រួសារ ក៏កំពុងប្រឈមជាមួយក្រុមហ៊ុនចម្ការចេកកាយផ្លូវផ្ដាច់មិនឱ្យធ្វើដំណើរឆ្លងកាត់ចេញ-ចូលដូចគ្នាដែរ ។ ផ្ដើមចេញពីក្រុមហ៊ុនមួយនេះ ធ្វើឱ្យពលរដ្ឋនៅស្រុកលំផាត់ដែលភាគច្រើនជាបងប្អូនជនជាតិឡាវ មានការក្តៅក្រហាយខ្លាំងណាស់ និងព្រួយបារម្ភ ហើយក៏បានសំណូមពរយ៉ាងទទូចទៅសម្ដេចពុក និងសម្ដេចកិត្តិព្រិទ្ធបណ្ឌិតប៊ុន រ៉ានី ហ៊ុន សែន មេត្តាជួយអន្ដរាគន៍ផង ដើម្បីបើកផ្លូវឱ្យពួកគាត់បានប្រើប្រាស់ចេញ-ចូលជាធម្មតាវិញ និងដឹកកសិផលមកកាន់ទីផ្សារលក់ដូរដោះស្រាយជីវភាពប្រចាំថ្ងៃផង។
ចែករំលែកព័តមាននេះ