សហគ្រាសធុនតូច និងមធ្យមកម្ពុជាកំពុងប្រឈមនឹងការប្រកួតប្រជែង
រាជធានីភ្នំពេញ ៖ ទន្ទឹមនឹងសមាជិកប្រទេសអាស៊ានធ្វើសមាហរណកម្មសេដ្ឋកិច្ចជាង១ឆ្នាំកន្លងមកនេះ បានផ្តល់ទាំងឱកាស និងបញ្ហាប្រឈមដល់សមាជិកអាស៊ានថ្មី ដែលមិនបានរៀប
រាជធានីភ្នំពេញ ៖ ទន្ទឹមនឹងសមាជិកប្រទេសអាស៊ានធ្វើសមាហរណកម្មសេដ្ឋកិច្ចជាង១ឆ្នាំកន្លងមកនេះ បានផ្តល់ទាំងឱកាស និងបញ្ហាប្រឈមដល់សមាជិកអាស៊ានថ្មី ដែលមិនបានរៀប
រាជធានីភ្នំពេញ ៖ ទន្ទឹមនឹងសមាជិកប្រទេសអាស៊ានធ្វើសមាហរណកម្មសេដ្ឋកិច្ចជាង១ឆ្នាំកន្លងមកនេះ បានផ្តល់ទាំងឱកាស និងបញ្ហាប្រឈមដល់សមាជិកអាស៊ានថ្មី ដែលមិនបានរៀបចំហេដ្ឋារចនាសម្ព័ន្ធរឹងមាំ ពិសេសទៅលើសហគ្រាសធុនតូច និងមធ្យម (SMEs)។ តួយ៉ាង វិស័យមួយនេះរបស់កម្ពុជាបាននិងកំពុងជួបបញ្ហាប្រឈមជាមួយការប្រកួតប្រជែងពីលំហូរចូលទំនិញដោយសេរី ក្រោមលក្ខខណ្ឌនៃសមាហរណកម្មសេដ្ឋកិច្ចអាស៊ាន ។
បើតាមមន្ត្រីជាន់ខ្ពស់ក្រសួងឧស្សាហកម្ម និងសិប្បកម្មបានឱ្យដឹងថា ពេលប្រទេសអាស៊ានទាំងអស់ធ្វើសមាហរណកម្មសេដ្ឋកិច្ច នឹងធ្វើឱ្យមានលំហូរចូលដោយសេរីនូវទំនិញ, សេវាកម្ម, ការវិនិយោគ និងកម្លាំងពលកម្មជំនាញ ។ លើសពីនេះ វាផ្តល់នូវឱកាស និងបញ្ហាប្រឈមនានាដល់ប្រទេសជាសមាជិកអាស៊ានថ្មី ដែលមិនទាន់មានការរៀបចំហេដ្ឋារចនាសម្ព័ន្ធរឹងមាំ ជាពិសេស ទៅលើសហគ្រាសធុនតូច និងមធ្យម ។
លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម មានប្រសាសន៍ឱ្យដឹងកាលពីថ្ងៃទី៤ កញ្ញា ម្សិលមិញថា ៖« លំហូរចូលដោយសេរីនូវមុខទំនិញ គឺជាបញ្ហាមួយដែលកម្ពុជាជួបប្រទះ និងប្រឈម ដោយសារទំនិញកម្ពុជាមួយចំនួនមិនទាន់មានលក្ខណៈស្តង់ដា គុណភាពនៅមានកម្រិត ការគ្រប់គ្រងអាជីវកម្មនៅមានលក្ខណៈគ្រួសារ ការផលិតនៅមានបរិមាណទាប ដែលធ្វើឱ្យមានតម្លៃថ្លៃ។ អីចឹងនៅពេលមានទំនិញពីគេហូរចូលមកមានគុណភាពល្អ ហើយតម្លៃសមរម្យជាងយើង គឺអាចបង្កើតជាបញ្ហាប្រឈមសម្រាប់ SMEs កម្ពុជា » ។
លោកស្រី កែវ មុំ នាយិកាក្រុមហ៊ុនផលិតនំស្រួយលីលី មានប្រសាសន៍ថា ៖« ពិតណាស់នៅពេលអាស៊ានធ្វើសមាហរណកម្មសេដ្ឋកិច្ចមក លំហូរចូលដោយសេរីនូវមុខទំនិញនេះបានធ្វើឱ្យឧស្សាហកម្មក្នុងស្រុករបស់យើងពិបាកប្រកួតប្រជែងតម្លៃជាមួយផលិតផលនាំចូល ។ ទីផ្សាររបស់គេហាក់មានការចែកចាយទូលំទូលាយ តែការចែកចាយរបស់ឧស្សាហកម្មក្នុងស្រុកនៅមានកម្រិត និងជួបបញ្ហាច្រើន » ។
លោកស្រីលើកឡើងថា ក្នុងដំណាក់កាលអាស៊ានធ្វើសមាហរណកម្មសេដ្ឋកិច្ចជាង១ឆ្នាំកន្លងមក ក្រុមហ៊ុនលីលី តែងតែពង្រឹងសមត្ថភាព ស្តង់ដា លទ្ធភាព តាមរយៈទទួលបានការគាំទ្រពីស្ថាប័នពាក់ព័ន្ធ ជាហេតុធ្វើឱ្យផលិតផលរបស់ក្រុមហ៊ុនមានលទ្ធភាពប្រកួតប្រជែងទាំងនៅក្នុង និងក្រៅតំបន់ ។ ប៉ុន្តែយើងព្រួយបារម្ភពីឧស្សាហកម្មដទៃទៀត ដែលមិនអាចឆ្លើយតបទៅនឹងលក្ខខណ្ឌតម្រូវលើទីផ្សារ គឺមិនអាចធ្វើការនាំចេញបាន ។
តាមប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជា ធ្លាប់លើកឡើងក្នុងសិក្ខាសាលាពិគ្រោះយោបល់រវាងអ្នកផលិត និងអ្នកផ្គត់ផ្គង់ ផលិតផលខ្មែរ ជាមួយអ្នកប្រើប្រាស់ និងចែកចាយបន្ត កាលពីថ្ងៃទី១៧ សីហា ថា SMEs ក្នុងស្រុកបានពង្រីកគុណភាពផលិតផលបោះជំហានទៅមុខគួរឱ្យកត់សម្គាល់ ដោយកម្ពុជាបានកែសម្រួលស្តង់ដាអន្តរជាតិ មកធ្វើជាស្តង់ដាជាតិសម្រាប់ជាមូលដ្ឋានឱ្យសហគ្រាសធុនតូច និងមធ្យម គោរព និងអនុវត្តតាម ។ ទាំងនេះជាសញ្ញាវិជ្ជមាននៃការបោះជំហានទៅមុខរបស់ SMEs ជាពិសេស ការរៀបចំខ្លួនក្នុងដំណាក់កាលសមាហរណកម្មសេដ្ឋកិច្ចអាស៊ានពេញលេញនៅពេលខាងមុខ ។
លោកឧកញ៉ា តែ តាំងប៉ បញ្ជាក់ថា ស្របពេលភាពរីកចម្រើននេះ សហគ្រាសធុនតូច និងមធ្យមក៏បានជួបបញ្ហាប្រឈមមួយចំនួនផងដែរ ក្នុងនោះរួមមាន ៖
១-ការប្រកួតប្រជែងមិនស្មើភាពជាមួយទំនិញនាំចូល ដោយយើងសង្កេតឃើញថា មានការចូលមកតាំងពិព័រណ៍ជាច្រើនពីប្រទេសជិតខាង ធ្វើឱ្យប៉ះពាល់ដល់ការលក់របស់សហគ្រាសក្នុងស្រុក ។
២-ការបញ្ជៀបចូលផលិតផលរបស់សហគ្រាសធុនតូច និងមធ្យមនៅតាមទីផ្សារទំនើប ក៏ដូចជាសណ្ឋាគារ ភោជនីយដ្ឋាន ហាក់មានការលំបាក ដោយសារស្ថាប័នខាងលើនៅនិយមផលិតផលបរទេស ហើយនិតីវិធីដាក់ផលិតផលនៅតាមផ្សារទំនើបមានភាពស្មុគស្មាញ ដែលនេះជារបាំងរាំងស្ទះដល់ការពង្រីកទីផ្សារសហគ្រាសធុនតូច និងមធ្យម ។
៣-ក្រសួងពាណិជ្ជកម្មរកទីផ្សារថ្មីៗបានច្រើន តែក្នុងនោះរបាំងបច្ចេកទេសបានក្លាយជាបញ្ហាដ៏ធំ ក្នុងការនាំចេញរបស់សហគ្រាសធុនតូច និងមធ្យម ។
ទន្ទឹមនឹងការជួបបញ្ហានេះ ប្រធានសម្ព័ន្ធសមាគមសហគ្រាសធុនតូច និងមធ្យម លើកឡើងថា ចង់ឱ្យក្រសួងពាក់ព័ន្ធបង្កើតជាក្រុមការងារបច្ចេកទេស ដែលមានការចូលរួមពីវិស័យឯកជន ដើម្បីពិនិត្យ និងដោះស្រាយចំពោះមុខលើផលិតផលណា ដែលមានលទ្ធភាពនាំចេញគ្រប់គ្រាន់ ប៉ុន្តែនៅជាប់របាំងបច្ចេកទេស ដែលត្រូវស្វែងរកដំណោះស្រាយទាំងអស់គ្នា ហើយយន្តការនេះអាចដោះស្រាយបញ្ហាចំពោះមុខបាន ។ បង្កើតក្រុមការងារចូលរួមពីស្ថាប័នរដ្ឋ និងតំណាងវិស័យឯកជនផ្សេងៗទៀតដើម្បីធ្វើការផ្ទាល់ជាមួយប្រទេសអាស៊ាន អាមេរិក ចិន និងសហភាពអឺរ៉ុប ដើម្បីឱ្យប្រទេសទាំងនោះអនុញ្ញាតឱ្យផលិតផលខ្មែរដែលគេហាមនាំចូល អាចនាំចូលបានឡើងវិញ។
ដើម្បីឲ្យវិស័យមួយនេះអាចប្រកួតប្រជែងពីលំហូរចូលទំនិញដោយសេរីពីខាងក្រៅ លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម មានប្រសាសន៍ថា ៖«យើងត្រូវបង្កើននូវខ្សែតម្លៃនៃសង្វាក់ផលិតកម្មរបស់យើងឱ្យវែង ជាពិសេស លើកកម្ពស់គុណភាព និងផលិតភាពនៃផលិតផលឱ្យបានខ្ពស់ ជាកត្តាអាចឱ្យ SMEs មានលទ្ធភាពប្រកួតប្រជែង និងរៀបចំនូវកិច្ចការទាំងអស់ហ្នឹងបាន » ៕
ចែករំលែកព័តមាននេះ