តារាសម្តែងថ្មីវ័យក្មេង កញ្ញា សាំង នរៈមនោរា បានប្រកាសពីការតាំងចិត្តរបស់ខ្លួន ដោយព្យាយាមអភិវឌ្ឍន៍សមត្ថភាពសម្តែងអោយកាន់តែល្អប្រសើរ ដើម្បីបំពេញក្តីស្រមៃក្នុងវិថីសិល្បៈដែលខ្លួនស្រឡាញ់ និងចូលចិត្តតាំងពី
រាជធានីភ្នំពេញ ៖ តារាសម្តែងថ្មីវ័យក្មេង កញ្ញា សាំង នរៈមនោរា បានប្រកាសពីការតាំងចិត្តរបស់ខ្លួន ដោយព្យាយាមអភិវឌ្ឍន៍សមត្ថភាពសម្តែងអោយកាន់តែល្អប្រសើរ ដើម្បីបំពេញក្តីស្រមៃក្នុងវិថីសិល្បៈដែលខ្លួនស្រឡាញ់ និងចូលចិត្តតាំងពីយូរណាស់មកហើយ។
ក្នុងវ័យ១៨ឆ្នាំស្រីស្អាត សាំង នរៈមនោរា បានកសាងស្នាដៃក្នុងអាជីពសិល្បៈមួយនេះបានជាបណ្តើរហើយ តាមរយៈការថតម៉ូតសម្អាងការ ស្ពតពាណិជកម្ម និងការសម្តែងក្នុងបទចម្រៀង ខណៈពេលខាងមុខ នាងក៏នឹងត្រៀមខ្លួនបង្ហាញការសម្តែងថ្មីៗបន្ថែមទៀតផងដែរ។
ថ្លែងប្រាប់កោះសន្តិភាពតាមសារអេឡិចត្រូនិច តារាសម្តែងដែលមានដើមកំណើតពីក្រុងតាខ្មៅ ខេត្តកណ្តាល ស្រីស្អាត សាំង នរៈមនោរា បានឲ្យដឹងថា នាងបានវិវត្តន៍ខ្លួនមកជាតារាសម្តែងនាពេលបច្ចុប្បន្ន គឺតាមរយៈការថត Tik Tok ដែលនាងតែងតែថតបង្ហោះលេងកម្សាន្ត។ នាងបញ្ជាក់ថា ក្រោយគេបានឃើញរូបភាព និងសកម្មភាពរបស់នាងដែលបានបង្ហោះតាមរយៈបណ្តាញសង្គមមួយនេះហើយ ក៏មានបណ្តាអ្នកជំនាញខាងថតរូបមានការចាប់អារម្មណ៍ ហើយក៏បានទាក់ទងមកនាងឲ្យថតសម្អាងការនានាតែម្តង។ លុះក្រោយមកទៀត នាងក៏បានស្គាល់អ្នកហៅតួមួយរូប ហើយរូបគាត់ក៏បានទាក់ទងនាងឲ្យចូលថតម៉ូត ស្ពតពាណិជកម្ម និងសម្តែងនៅក្នុងបទចម្រៀងជាបន្តបន្ទាប់។
យ៉ាងណាបើតាមស្រីស្រស់សោភា សាំង នរៈមនោរា ថា បើទោះបីជារហូតមកទល់នាពេលនេះ នាងបានចូលប្រឡូកក្នុងសិល្បៈអស់ពេលប៉ុន្មានឆ្នាំចុងក្រោយនេះក្តី ប៉ុន្តែនាងក៏នៅមិនទាន់មានឱកាសបានថតក្នុងខ្សែភាពយន្តណាមួយនៅឡើយទេ។ នាងបញ្ជាក់ថា កន្លងមក អ្នកហៅតួតែងតែសួរនាំនាងពីការសម្តែងនេះជារឿយៗដែរ ប៉ុន្តែនាងនៅមិនទាន់មានឱកាស ហើយណាមួយនាងក៏កំពុងជាប់ដៃនៅក្នុងការសិក្សា ដោយក្នុងឆ្នាំនេះនាងត្រូវត្រៀមខ្លួនប្រឡងបាក់ឌុបផងដែរ។
សាំង នរៈមនោរា បានអះអាងបន្ថែមទៀតថា ដោយសារជាប់រវល់នៅក្នុងការសិក្សានេះ រូបនាងក៏បានបដិសេធការងារសិល្បៈមួយចំនួនដែរ ដោយសារនាងមិនមានពេលគ្រប់គ្រាន់សម្រាប់បំពេញការងារ ព្រោះនាងត្រូវទុកពេលវេលាឲ្យបានច្រើនសម្រាប់ការសិក្សានេះជាមុនសិន។ យ៉ាងណា ក្រោយពេលបញ្ចប់ការសិក្សានាឆ្នាំនេះ នាងនឹងទទួលការងារសិល្បៈឲ្យបានពេញដៃតែម្តង ដោយសារអាជីពមួយនេះនាងមានការស្រឡាញ់ និងចូលចិត្តមកជាយូរមកហើយ ហើយនាងក៏នឹងត្រៀមធ្វើអ្វីៗ ដើម្បីបំពេញគោលដៅរបស់ខ្លួនផងដែរ។
នាងបញ្ជាក់ថា ដើម្បីបំពេញក្តីស្រមៃនៅក្នុងវិថីសិល្បៈនេះ រូបនាងនឹងខិតខំអភិវឌ្ឍន៍សមត្ថភាពខ្លួនឯងឲ្យកាន់តែមានភាពល្អប្រសើរ ដើម្បីជាការទាក់ទាញទៅដល់ផលិតករ និងម្ចាស់ផលិតកម្មនានា។ សាំង នរៈមនោរា លើកឡើងថា ការអភិវឌ្ឍន៍ខ្លួនឯងនៅក្នុងអាជីពសិល្បៈ គឺនាងចាត់ទុកជាកត្តាសំខាន់មួយ ក្នុងចំណោមចំណុចមួយចំនួនទៀត ដែលនាងនឹងខិតខំប្រឹងប្រែង ដើម្បីចាប់ឱកាសសម្តែងនៅក្នុងភាពយន្តជាលើកដំបូងនាពេលអនាគត នៅក្នុងអាជីពមួយនេះ៕
ចែករំលែកព័តមាននេះ