រាជធានីភ្នំពេញ ៖ ទីបំផុតលោក ថៃ គឹមមុនី ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី២ ខែមីនា ឆ្នាំ២០២៣នេះ បានសម្រេចចេញដីកាឃុំខ្លួនកូនតុងទីន ដែលកើបលុយរាប់សែនដុល្លារបម្រុងរត់គេចខ្លួន ដាក់ពន្ធនាគារព្រៃ.ស PJ ជាបណ្តោះអាសន្ន ដោយរង់ចាំបើកសវនាការទទួលទោសតាមផ្លូវច្បាប់។
តាមដីកាឃុំខ្លួនបានសម្រេចដាក់ឲ្យជនត្រូវចោទ ស្ថិតក្រោមការពិនិត្យពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន តាមបញ្ញតិមាត្រា ២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់ ដែលជាបទល្មើសព្រហ្មទណ្ឌ ។
សូមជម្រាបថា ៖ ស្ត្រីម្នាក់ជាអ្នកលេងតុងទីន ដែលហៅថា «កូនតុងទីន» ត្រូវបានកម្លាំសមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃធ្វើការឃាត់ខ្លួន កាលពីថ្ងៃទី២៧ ខែកុម្ភៈ ឆ្នាំ២០២៣ ពាក់ព័ន្ធករណីកើបលុយតុងទីនបានរាប់សែនដុល្លារអាមេរិក ហើយព្យាយាមរត់គេចខ្លួន។ ស្ត្រីរូបនោះមានឈ្មោះ ភ័ណ្ឌ ស៊ីវម៉ី អាយុ២៧ឆ្នាំ ស្នាក់នៅផ្ទះលេខ៤៣៥B ផ្លូវលេខ២១BT ភូមិត្នោតជ្រុំ សង្កាត់បឹងទំពុន ខណ្ឌមានជ័យរាជ ធានីភ្នំពេញ។
ការចាប់ខ្លួនកូនតុងទីនម្នាក់ខាងលើនេះ ត្រូវបានសមត្ថកិច្ចបង្ហើបឲ្យដឹងថា ជាការអនុត្តតាមដីកាបញ្ជាឲ្យចូលខ្លួនរបស់ឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ពាក់ព័ន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន តាមពាក្យបណ្តឹងរបស់ឈ្មោះ គង់ ណាក់នីន ។
សមត្ថកិច្ចឲ្យដឹងទៀតថា ពាក្យបណ្តឹងរបស់ជនរងគ្រោះ កាលពីថ្ងៃទី១៣ ខែតុលា ឆ្នាំ២០២២ ស្ថិតនៅផ្ទះជនរងគ្រោះលេខ១៧៩ ផ្លូវជាតិលេខ២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ឈ្មោះ ភ័ណ្ឌ ស៊ីវម៉ី ដែលជាអ្នករាប់អានគ្នា បានទៅខ្ចីប្រាក់ពីដើមបណ្តឹងចំនួន ៣៣០ ០០០ ដុល្លារអាមេរិក ដោយបានធ្វើកិច្ចសន្យាជាលាយលក្ខណ៍អក្សរត្រឹមត្រូវថា យកទៅពង្រីកមុខរបររកស៊ីតាមអនឡាញ ។
ជនសង្ស័យបានធានាអះអាងថា សងទៅជនរងគ្រោះវិញ ក្នុង១ខែ ២ ០០០ ដុល្លារ គិតចាប់ពីថ្ងៃទី២០ ខែតុលា ដល់ថ្ងៃទី៥ ខែមេសា ឆ្នាំ២០២៣ ដោយសារតែការជឿទុកចិត្តគ្នា ទើបដើមបណ្តឹងយល់ព្រមឲ្យឈ្មោះ ភ័ណ្ឌ ស៊ីវម៉ី ខ្ចីប្រាក់រហូតដល់ ៣៣០ ០០០ ដុល្លារអាមេរិកនោះ ។ បន្ទាប់ពីទទួលបានប្រាក់គ្រប់ចំនួនហើយ ឈ្មោះ ភ័ណ្ឌ ស៊ីវម៉ី បានដាក់តម្កល់មូលប្បទានបត្រ១សន្លឹករបស់ធនាគារ វឌ្ឍនៈអាស៊ីចំកាត់ ABA ចុះថ្ងៃទី១៣ ខែតុលា ឆ្នាំ២០២២ សម្រាប់ទូទាត់ប្រាក់សងទៅដើមបណ្តឹងវិញ។
ប៉ុន្តែផ្ទុយទៅវិញឈ្មោះ ភ័ណ្ឌ ស៊ីវម៉ី មិនបានគោរពតាមការសន្យាទេ បែរជាយកប្រាក់នោះទៅលេងតុងទីន ដោយរយៈពេល២ខែមិនឃើញបង្វិលឲ្យម្ចាស់បំណុលទេ ដោយអស់ជំនឿ ទើបម្ចាស់បំណុលយកមូលប្បទានបត្ររបស់ឈ្មោះ ភ័ណ្ឌ ស៊ីវម៉ី ទៅបើកប្រាក់ពីធនាគារ ហើយខាងធនាគារឆ្លើយតបមកវិញថា «ជាសែកស្អុយ អត់មានសាច់ប្រាក់»។
បន្ទាប់មកទៀត ជនរងគ្រោះក៏បានព្យាយាមទាក់ទងទៅឈ្មោះ ភ័ណ្ឌ ស៊ីវម៉ី ជាញឹកញាប់ដែរ ដើម្បីជួបដោះស្រាយរឿងបំណុលជាង៣០ម៉ឺនដុល្លារអាមេរិកនោះ ប៉ុន្តែឈ្មោះ ភ័ណ្ឌ ស៊ីវម៉ី មិនបានទៅជួបដើមបណ្តឹងទេ ថែមទាំងគេចខ្លួនទៀតផង។ ដូច្នោះទង្វើដែលជនសង្ស័យបានប្រព្រឹត្តដូចរៀបរាប់ខាងលើនេះហើយ ទើបធ្វើឲ្យជនរងគ្រោះសម្រេចចិត្តដាក់ពាក្យបណ្តឹងទៅសមត្ថកិច្ច ដើម្បីឃាត់ខ្លួនឈ្មោះ ភ័ណ្ឌ ស៊ីវម៉ី យកមកអនុវត្តតាមច្បាប់។
នៅចំពោះមុខសមត្ថកិច្ចឈ្មោះ ភ័ណ្ឌ ស៊ីវម៉ី បានសារភាពថា លុយទាំងអស់នោះខ្លួនបានខ្ចីគេ យកទៅរកស៊ីតាមអនឡាញខ្លះ និងលេងតុងទីនខ្លះ ដែលការលេងតុងទីនបានកើបលុយមេអស់ហើយ តែដោយសារចុងក្រោយរលាយខ្សុលទើបរត់គេចខ្លួន ។
គួរបញ្ជាក់ថា ហើយកន្លងមកឃើញការផ្សាយព័ត៌មានចាប់តែមេតុងទីនវេចលុយរត់ ម្តងនេះកូនតុងទីនកើបលុយរាប់សែនដុល្លារបម្រុងគេចខ្លួន ទីបំផុតជាប់ជុចសមត្ថកិច្ចដូចតែគ្នាទេ។ ដូច្នេះពាក់ព័ន្ធក្នុងការបង់ប្រាក់ ដែលធ្វើឲ្យមេតុងទីនមានផលលំបាក និងបង់ជំនួស ឬសងទៅកូនតុងទីនជាច្រើននាក់កន្លងមក គឺដោយសារតែកូនតុងទីនមួយចំនួនតូច ទើបធ្វើឲ្យមេតុងទីនរងនូវពាក្យនូវបណ្តឹងអត់មានលុយសងកូនតុងទីនជាហូរហែមកនោះ ។
ចែករំលែកព័តមាននេះ