កំណើនបុរី និងផ្ទះល្វែងជាឱកាសអាជីវករលក់កូនឈើលម្អទីធ្លា និងគេហដ្ឋាន
រាជធានីភ្នំពេញ ៖ ស្របពេលការសាងសង់បុរី និងផ្ទះល្វែង និងគម្រោងផ្សេងៗទៀតមានការរីកដុះដាលកាន់តែច្រើន បានធ្វើឱ្យអាជីវករ
រាជធានីភ្នំពេញ ៖ ស្របពេលការសាងសង់បុរី និងផ្ទះល្វែង និងគម្រោងផ្សេងៗទៀតមានការរីកដុះដាលកាន់តែច្រើន បានធ្វើឱ្យអាជីវករ
រាជធានីភ្នំពេញ ៖ ស្របពេលការសាងសង់បុរី និងផ្ទះល្វែង និងគម្រោងផ្សេងៗទៀតមានការរីកដុះដាលកាន់តែច្រើន បានធ្វើឱ្យអាជីវករដែលប្រកបមុខរបរលក់កូនឈើ និងផ្កាតុបតែងលម្អទីធ្លា និងគេហដ្ឋាន មានឱកាសរកប្រាក់ចំណេញពីមួយឆ្នាំទៅមួយឆ្នាំ ។
អ្នកលក់កូនឈើ និងរុក្ខជាតិចម្រុះនៅសួន «ពិភពធម្មជាតិ» បានឱ្យដឹងកាលពីថ្ងៃទី២៥ សីហា ថា បន្ទាប់ពីបុរីផ្ទះល្វែងមានការសាងសង់ច្រើន ឃើញថាការលក់រុក្ខជាតិ និងដើមឈើធំៗគឺមានទីផ្សារច្រើន ពិសេសអ្នករស់នៅក្នុងបុរីបានមកទិញយកទៅតុបតែងបន្ថែម ដោយសារគាត់យល់ច្បាស់ និងចូលចិត្តធម្មជាតិ ។
អ្នកលក់រូបនេះបន្តថា ៖« ការអភិវឌ្ឍគម្រោងបុរី និងផ្ទះល្វែងនានា ខ្ញុំនឹកស្មានមិនដល់ថា ក្រុមហ៊ុនធ្វើសួន និងការតុបតែងខ្លាំងទីធ្លាបែបនេះសោះ ខុសពីពេលមុន ដែលគិតតែពីសាងសង់ មិនគិតពីបរិស្ថានបៃតង ជាហេតុធ្វើឱ្យអ្នកប្រកបមុខមួយនេះអាចមានឱកាសរកប្រាក់ចំណេញច្រើន បើទោះបីទីផ្សារកំពុងប្រកួតប្រជែងខ្លាំងក៏ដោយ»។
លោកបន្ថែមថា រុក្ខជាតិចម្រុះដែលមាននៅក្នុងសួនសព្វថ្ងៃ ដូចជាដើមឈើធំ មាន៨០% ជារុក្ខជាតិក្នុងស្រុក និង២០%នាំចូលពីថៃ និងវៀតណាម តែចំពោះដើមផ្កាតូចៗជាង៨០%នាំមកពីក្រៅស្រុក ។
ចំណែកអ្នកស្រី គុំ សុខចន្ធី អាជីវករលក់រុក្ខជាតិលម្អគេហដ្ឋានដែរនោះ បាននិយាយថា ការប្រកបមុខរបរលក់រុក្ខជាតិសម្រាប់តុងតែងនៅគេហដ្ឋាន មានការលូតលាស់ជាប្រចាំ ហើយការលូតលាស់នេះភាគច្រើន ដោយសារគ្រួសារនីមួយៗចូលចិត្តតុងតែងគេហដ្ឋានផ្ទាល់ខ្លួនបន្ថែមទៅលើអ្វីដែលក្រុមហ៊ុនរៀបចំពីមុន ពិសេសអ្នករស់នៅតាមបុរី គឺទិញច្រើនជាងគេ ។
អ្នកស្រីអាស្មាក់ ពលរដ្ឋខ្មែរអ៊ិស្លាមដែលរស់នៅក្នុងបុរីវិមានភ្នំពេញ បានឱ្យដឹងថា ៖ « កូនឈើ និងដើមផ្កាដែលខ្ញុំទិញនេះ គឺយកទៅតុបតែងផ្ទះថ្មី ព្រោះការរស់នៅក្នុងផ្ទះថ្មី ចង់បានភាពស្រស់ស្អាត អារម្មណ៍ស្រស់ថ្លា និងចង់បានធម្មជាតិនៅជិតខ្លួន » ។
អ្នកស្រីលើកឡើងថា ៖« នៅតាមបុរី គេតុបតែងតាមដោយកន្លែង ប៉ុន្តែសម្រាប់លំនៅឋានដែលយើងរស់នៅផ្ទាល់ គេអត់តុបតែងឱ្យទេ អីចឹងយើងត្រូវធ្វើការតុបតែងខ្លួនឯង ដូចថ្ងៃនេះ ខ្ញុំទិញរុក្ខជាតិលម្អផ្ទះថ្មីពេលមានដើមផ្កា រុក្ខជាតិបៃតងផ្សេងទៀត ដែលគិតតម្លៃអស់ប្រហែល៣០០ដុល្លារ » ។
ទន្ទឹមនឹងតម្រូវការរុក្ខជាតិតូចៗ និងដើមឈើ កើនឡើង ការធ្វើអាជីវកម្មក៏កំពុងជួបបញ្ហាដែរ ដោយសារកង្វះខាតកម្លាំងពលកម្ម ព្រោះកម្មករដែលធ្លាប់តែធ្វើការ បែរជាងាកទៅរកការងារធ្វើនៅក្នុងកន្លែងផ្សេងវិញ ៕
ចែករំលែកព័តមាននេះ