រាជធានីភ្នំពេញ ៖ លោក សែម ធារិន្ទ ដែលជាអ្នកហៅតួសម្តែងម្នាក់ បានទម្លាយរឿងរ៉ាវនៅក្រោយខ្នងពីតម្លៃតួធម្មតាសម្រាប់ការថតម្តងៗ ដែលស្តាប់ហើយស្ទើរមិនគួរឲ្យជឿ ខណៈពេលដែលតម្លៃនោះ ថោកក្នុងសម័យកាលសេដ្ឋកិច្ចកម្ពុជាកំពុងរីកលូតលាស់។
(តួឯកដែលល្បីគាត់មានហាងឆេងក្នុងតម្លៃសមរម្យសម្រាប់ថតគាត់រួចហើយ ប៉ុន្តែសម្រាប់តួធម្មតា គឺពួកគាត់មិនទាន់មានរៀបតម្លៃនៅឡើយទេ គឺស្រេចតែម្ចាស់ផលិតកម្ម ហេតុនេះលោកស្នើឲ្យបណ្តាផលិតកម្មមួយចំនួន គួរគិតគូរពីតម្លៃតួធម្មតានេះឡើងវិញ ដើម្បីឲ្យពួកគាត់មានការសប្បាយរីករាយ និងធ្វើការ)។ នេះជាការលើកឡើងរបស់លោក សែម ធារិន្ទ មកកាន់កោះសន្តិភាពតាមរយៈសារអេឡិចត្រូនិច នៅថ្ងៃទី២៨ ខែកុម្ភៈ ឆ្នាំ២០២៣នេះ។
លោក សែម ធារិន្ទ បានលើកឡើងទៀតថា សម្រាប់តួធម្មតាតម្លៃថត គឺអាស្រ័យទៅតាមកន្លែង ដោយនៅក្នុងនោះជាធម្មតាពួកគាត់ទទួលបានតម្លៃថតចន្លោះចាប់ពី១០ទៅ១៥ដុល្លារ ហើយតម្លៃនេះក៏ត្រូវដកពីភ្នាក់ងារហៅតួខ្លះដែរ ដោយពេលខ្លះពួកគាត់នៅសល់ចន្លោះពី៥ម៉ឺនរៀលតែប៉ុណ្ណោះ។
លោកបញ្ជាក់ថា សម្រាប់តម្លៃខាងលើនេះ ពួកគាត់ខ្លះគ្រាន់តែចំណាយទៅលើការធ្វើដំណើរ ការហូបចុក និងការតុបតែងខ្លួនសម្រាប់ការថត១ថ្ងៃនោះ គឺចង់អស់ទៅហើយ ប៉ុន្តែពួកគាត់ខ្លះក៏នៅតែចង់ទៅ ដោយសារពួកគាត់យល់ថា គង់តែនៅផ្ទះដដែល។
លោកបន្ថែមទៀតថា កន្លងមក ក៏មានករណីអ្នកហៅតួមួយចំនួន ដោយសារឃើញគ្នាតួថ្មីថ្មើង ហៅគ្នាថតម្តងឲ្យគ្នា១០ដុល្លារ ឬ៣ម៉ឺនរៀលក៏មាន ហើយរឿងនេះក៏បានក្លាយជាទម្លាប់សម្រាប់ផលិតករមួយចំនួនផងដែរ។ ដោយឡែកចំពោះរឿងនេះ សម្រាប់លោកបច្ចុប្បន្នក៏មានអ្នកទាក់ទងឲ្យហៅតួថតក្នុងតម្លៃ១០ដុល្លារនេះដែរ ប៉ុន្តែលោកមិនហ៊ានទទួលទេ ព្រោះយល់ថា តម្លៃនេះហាក់នៅទាប ក្នុងពេលដែលផលិតកម្មខ្លះបានហ៊ានឲ្យតម្លៃតួធម្មតាក្នុងចន្លោះពី២០ទៅ២៥ដុល្លារដែរ។
យ៉ាងណាបើតាមលោក សែម ធារិន្ទ ថា បញ្ហាមួយក្នុងចំណោមបញ្ហាមួយចំនួនទៀត ដែលនាំឲ្យតម្លៃតួធម្មតា ឬតួបន្ថែម នៅមានតម្លៃថោក គឺដោយសារបច្ចុប្បន្នមានភ្នាក់ងារអ្នកហៅតួច្រើន ហើយអ្នកហៅនោះបានយកតម្លៃជើងសារពីតួពីរទៅបីតង់ នោះជាហេតុនាំឲ្យតម្លៃមកដល់ម្ចាស់ខ្លួននៅមានកម្រិត។
លោកបញ្ជាក់ថា សម្រាប់តួធម្មតា គឺពួកគាត់មិនមានកុងត្រាថតដូចតួល្បីៗនោះឡើយ ពោលគឺពួកគាត់ត្រឹមតែថតស៊ីថ្ងៃ ដោយពេលថតខ្លះមួយ១ម៉ោង ឬ២ម៉ោងប៉ុណ្ណោះ ហេតុនេះតម្លៃពួកគាត់មិនសូវជាបានថ្លៃប៉ុន្មានទេ ប៉ុន្តែគួរតែមានការកែប្រែខ្លះសម្រាប់តម្លៃពួកគាត់នាពេលបច្ចុប្បន្ននេះ។
លោក សែម ធារិន្ទ បានលើកឡើងទៀតថា សម្រាប់វិស័យភាពយន្តខ្មែរនាពេលបច្ចុប្បន្ន ក៏មានការរីកលូតលាស់គ្រាន់បើ ហើយផលិតកម្មមួយចំនួនក៏ទទួលបានតម្លៃពីក្រុមហ៊ុនដែលបានឧបត្ថម្ភនោះក៏ច្រើនគួរសមដែរ ខណៈពេលតម្លៃកុងត្រាថតពីសំណាក់តួល្បីៗក៏បានច្រើនគួរសមទៅតាមនឹងដែរ ហេតុនេះលោកក៏មានបំណងស្នើសុំឲ្យម្ចាស់ផលិតកម្មមួយចំនួនគួរគិតគូរឡើងវិញសម្រាប់តួធម្មតា។
ទោះជាយ៉ាងណា ការលើកឡើងខាងលើនេះ លោកមិនមានគោលបំណងណាមួយចង់រិះគន់បណ្តាផលិតកម្ម ឬក៏ប៉ះពាល់ដល់តួអង្គល្បីៗណាមួយឡើយ ព្រោះមានម្ចាស់ផលិតកម្មខ្លះក៏បានឲ្យតម្លៃតួធម្មតាបានសមរម្យដែរ ប៉ុន្តែអ្វីដែលលោកចង់ឃើញនោះ គឺលោកគ្រាន់តែចង់ស្នើដល់ម្ចាស់ក្រុមហ៊ុន និងផលិតកម្មនានាគួរពិចារណាចំពោះរឿងនេះឡើងវិញ ដើម្បីឲ្យតួធម្មតាបានតម្លៃមួយសមរម្យ ដើម្បីឲ្យពួកគាត់សប្បាយចិត្តធ្វើការ និងចូលរួមលើកស្ទួយវិស័យសិល្បៈភាពយន្តខ្មែរទាំងអស់គ្នា៕
ចែករំលែកព័តមាននេះ