ប្រើលេសថា «ពិបាកដេកឱបគ្នា ព្រោះបន្ទប់ជួលតូចចង្អៀត»
ហួសចិត្តយ៉ាងខ្លាំង បន្ទាប់ពីដឹងខ្លួនថា បុរសជាប្តី
រាជធានីភ្នំពេញ ៖ ស្ត្រីម្នាក់បានហួសចិត្តយ៉ាងខ្លាំងបន្ទាប់ពីដឹងខ្លួនថា បុរសជាប្តីហេងស៊យ បានលួចយកទ្រព្យសម្បត្តិទៅអស់ បន្ទាប់ពីបោកប្រាស់ឱ្យគាត់យកកូនប្រុសអាយុ១០ឆ្នាំ ដែលមកពីស្រុកកំណើតមកលេងគាត់ជាម្តាយទៅផ្ញើនៅផ្ទះបងស្រី ដោយលើកហេតុផលថា ពិបាកដេកឱបគ្នា ព្រោះបន្ទប់ជួលតូចចង្អៀត ។
ដោយសារតម្រូវចិត្តប្តី នាងជាប្រពន្ធក៏យកកូនទៅផ្ញើនៅផ្ទះបងស្រី លុះត្រឡប់មកវិញទើបដឹងថាប្តីប្រមូលលុយកាក់មាសប្រាក់និងម៉ូតូយកទៅបាត់ស្រមោល និងបង្កឱ្យមានការភ្ញាក់ផ្អើលឡើងកាលពីវេលាម៉ោង៧និង២៥នាទីយប់ថ្ងៃទី១៧ ខែសីហា នៅផ្ទះជួលក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។
ស្ត្រីអភ័ព្វដោយសារតែមានប្តីហេងស៊យនេះឈ្មោះ ជា ចាន់ធី អាយុ៣១ឆ្នាំ មុខរបរលក់នំបុ័ង ស្នាក់នៅផ្ទះជួលខាងលើ និងមានស្រុកកំណើតនៅស្រុកព្រែកប្រសព្វ ខេត្តក្រចេះ ជាស្ត្រីមេម៉ាយមានកូនប្រុសម្នាក់អាយុ១០ឆ្នាំ ។ ចំណែកប្តីទី២ ដែលជាប្តីបោកប្រាស់នេះឈ្មោះ ឈិត ឌុយ អាយុ២៨ឆ្នាំ មុខរបរបើកបររថយន្ត ស្នាក់នៅផ្ទះជួលជាមួយគ្នា និងមានស្រុកកំណើតនៅខេត្តតាកែវ។
ស្ត្រីរងគ្រោះបាននិយាយទាំងទឹកភ្នែករលីងរលោងថា រូបគាត់បានស្គាល់គ្នាជាមួយបុរសជាប្តីទី២នេះនិងបានរួមរស់ជាមួយគ្នារយៈពេល២ឆ្នាំមកហើយ ដោយមិនបានរៀបអាពាហ៍ពិពាហ៍តាមប្រពៃណីទេ គ្រាន់តែចាស់ទុំទាំងសងខាងដឹងឮ និងមិនទាន់មានកូនចៅនៅឡើយ ។ ការរស់នៅជាមួយគ្នារយៈពេល២ឆ្នាំកន្លងមកនេះ បុរសជាប្តីពុំដែលផ្តល់សេចក្តីសុខឱ្យរូបគាត់ឡើយ តែដោយសារជ្រុលជាយកគ្នាជាប្តីប្រពន្ធទៅហើយក៏ចេះតែទ្រាំរស់នៅជាមួយគ្នារហូតមក ។
ប្រភពដដែលរៀបរាប់ទៀតថា មុនពេលកើតហេតុរូបគាត់យកកូនប្រុសមកពីស្រុកកំណើតមកលេងបាន៩ថ្ងៃហើយ ស្រាប់តែប្តីរអ៊ូរទាំថា យកកូនមកលេងអុីចឹងពិបាកដេកឱបគ្នាណាស់ ហើយប្រាប់ឱ្យគាត់យកកូនប្រុសទៅទុកនៅផ្ទះបងស្រីរបស់គាត់ដែលស្នាក់នៅម្តុំផ្សារជម្ពូវ័ន ។
ដោយសារតែបំពេញតាមបំណងប្តីនៅវេលាម៉ោង៦និង៣៥នាទីល្ងាចថ្ងៃទី១៧ ខែសីហា រូបគាត់ក៏យកកូនប្រុសយកទៅផ្ញើនៅផ្ទះបងស្រីទាំងមេឃកំពុងភ្លៀង ។ ខណៈគាត់យកកូនប្រុសទៅដល់ផ្ទះបងស្រី បុរសជាប្តីនេះបានទូរស័ព្ទសួរថា អូនឯងនៅទីណា? ហើយគាត់ប្រាប់ថា នៅផ្ទះបងស្រីប្រហែលយូរបន្តិចទើបត្រឡប់ទៅផ្ទះវិញ ។ ប៉ុន្តែពេលមកដល់បន្ទប់ជួលវិញ ចាក់សោបើកទ្វារបន្ទប់មិនឃើញប្តី ព្រមទាំងបាត់លុយអស់ចំនួន២០ម៉ឺនរៀល ខ្សែកមាស៥ជី ខ្សែដៃប្លាទីន៥ជីតម្លៃ៦៨ម៉ឺនរៀល ម៉ូតូហុងដាឌ្រីម ស៊េរីឆ្នាំ២០១៦មួយគ្រឿង ដែលទិញបង់រំលោះមិនទាន់ដាច់ផង និងខោអាវក៏ត្រូវលោកប្តីប្រមូលយកទៅបាត់អស់ដែរ ។
ក្រោយពេលកើតហេតុ ទើបស្ត្រីជាប្រពន្ធដឹងថាចាញ់បោកប្តីហេងស៊យ ក៏បានទៅប្តឹងនៅប៉ុសិ៍្តនគរបាលរដ្ឋបាលចោមចៅ ដើម្បីទាមទារយកលុយ២០ម៉ឺនរៀល ខ្សែកនិងខ្សែដៃ ចំណែកម៉ូតូគាត់មិនទាមទារទេ និងសូមឱ្យសមត្ថកិច្ចចាត់ការតាមផ្លូវច្បាប់ ៕
ចែករំលែកព័តមាននេះ