ស្រីស្អាត នៅ សូនីតា លើកឡើងហេតុផលមួយ ក្រោយផ្ទុះរឿងបែកបាក់គ្រួសារ
- ភ្នំពេញ
រហូតមកទល់នាពេលនេះ ទាំងស្រីស្រស់ នៅ សូនីតា និងលោក ទិត្យ ថាវរិទ្ធ នៅមិនទាន់ចេញមុខបកស្រាយណាមួយនៅឡើយទេ ជុំវិញព័ត៌មានដែលផ្ទុះឡើងពាក់ព័ន្ធនឹង
រាជធានីភ្នំពេញ ៖ រហូតមកទល់នាពេលនេះ ទាំងស្រីស្រស់ នៅ សូនីតា និងលោក ទិត្យ ថាវរិទ្ធ នៅមិនទាន់ចេញមុខបកស្រាយណាមួយនៅឡើយទេ ជុំវិញព័ត៌មានដែលផ្ទុះឡើងពាក់ព័ន្ធនឹងការបែកបាក់គ្នា។ មហាជន ជាពិសេសបណ្តាអ្នកលេងបណ្តាញសង្គម បានសម្តែងការភ្ញាក់ផ្អើល ក្នុងពេលដែលគេឃើញតារាស្រីនាង នៅ សូនីតា បានបង្ហោះសារប្លែកៗ ហាក់បង្ហាញពីចំណងស្នេហ៍ជាប្តីប្រពន្ធរបស់នាងកំពុងជួបរឿងប្រះឆា។
ជាងនេះទៅទៀតស្រីស្រស់ នៅ សូនីតា ក៏បានប្រើពាក្យដាក់នៅលើហ្វេសប៊ុករបស់ខ្លួនថា អ្នកម៉ាក់នៅលីវ (Single Mom) ដែលបានបញ្ជាក់ថា ចំណងអាពាហ៍ពិពាហ៍របស់នាង និងស្វាមីលោក ទិត្យ ថាវរិទ្ធ អាចដល់ផ្លូវបំបែក ហើយពេលនេះនាងកំពុងតែមានឈ្មោះជាអ្នកម៉ាក់នៅលីវ។
ដោយឡែកអ្វីជាការកត់សម្គាល់ទៀតនោះ កាលពីពេលថ្មីៗនេះ នៅ សូនីតា ក៏បានបញ្ចេញសារមួយខ្លីដែលហាក់បញ្ជាក់ពីហេតុផលសំខាន់មួយ ដែលនាំអោយគ្រួសាររបស់នាងមានភាពប្រះឆានាពេលនេះ។
នៅ សូនីតា បានលើកឡើងតាមគណនីហ្វេសប៊ុករបស់ខ្លួនថា «មនុស្សស្រីនៅពេលដែលនាងរឹងមាំពេក តែងតែខ្វះការយកចិត្តទុកដាក់ ការស្រលាញ់ និងភាពកក់ក្តៅ ព្រោះគេតែងតែគិតថា នាងអាចដោះស្រាយគ្រប់យ៉ាងបានដោយខ្លួនឯងហើយ»។
តាមរយៈសំណេរនេះខាងលើនេះ គេកត់សម្គាល់ឃើញថា នៅ សូនីតា បានបង្ហាញអារម្មណ៍នៅក្នុងចិត្តមួយដែលនាងបានពើបប្រទះនៅក្នុងជីវិតគ្រួសាររបស់នាង ហើយហេតុផលមួយនេះក៏ទំនងជាដើមចមនាំអោយនាង និងស្វាមីជួបរឿងប្រះឆា។ រឿងរ៉ាវនៃការបែកបាក់នេះ កាន់តែធ្វើអោយគេមើលឃើញកាន់តែច្បាស់ថែមទៀតនោះ គឺអំឡុងពេលខួបកំណើតរបស់លោក ទិត្យ ថាវរិទ្ធ គេមិនបានឃើញស្រីស្រស់ នៅ សូនីតា មានវត្តមានរៀបចំអោយដូចជាបណ្តាឆ្នាំមុនៗទៀតឡើយ។
យ៉ាងណា បើទោះបីជាផ្ទុះរឿងបែកបាក់នេះក៏ដោយ ប៉ុន្តែទាំង នៅ សូនីតា និងលោក ទិត្យ ថាវរិទ្ធ នៅតែមានធុរៈជួយមើលបីបាច់ថែរក្សាកូនប្រុសតែមួយរួមគ្នាដដែល។
លោក ទិត្យ ថាវរិទ្ធ ក៏ធ្លាប់បានព្រលយសារនៅលើគណនីហ្វេសប៊ុករបស់លោកអំឡុងទៅមើលកូនប្រុសឈឺកាលពីពេលថ្មីៗនេះថា «មើលមុខក៏ដឹងថា គាត់ត្រូវជាយ៉ាងម៉េចនឹងខ្ញុំដែរ ចេញពីធ្វើការក៏ត្រូវនៅកំដរកូនឯពេទ្យទៀត ព្រោះម៉ាក់ម៉ាក់គាត់ក៏រវល់ទៅធ្វើការ។ ថ្ងៃនេះ ជាថ្ងៃបុណ្យនៃក្តីស្រឡាញ់ គឺស្រឡាញ់គាត់ដោយការទទួលខុសត្រូវ ពេលដែលកូនឈឺ»។
ទោះបីជាយ៉ាងណា រហូតមកដល់ពេលនេះ រឿងរ៉ាវដែលបានផ្ទុះជុំវិញការបែកបាក់គ្នារវាងស្រីស្រស់ នៅ សូនីតា និងលោក ទិត្យ ថាវរិទ្ធ ថា តើវាជាការពិត ឬយ៉ាងណានៅឡើយទេ? ខណៈពេលដែលអ្នកទាំងពីរនៅមិនទាន់ចេញមុខបកស្រាយ ឬប្រឆាំងទាស់ជុំវិញការភ្ញាក់ផ្អើលណាមួយឡើយ ចំពោះការចុះផ្សាយរឿងរ៉ាវខាងលើពីបណ្តាញសារព័ត៌មានជាបន្តបន្ទាប់។
ជាការកត់សម្គាល់ បន្ទាប់ពីធ្លាយដំណឹងបែកបាក់គ្រួសារនេះមក នៅ សូនីតា ត្រូវបានគេមើលឃើញថា នាងបានចាប់ផ្តើមអាជីពសិល្បៈជាបណ្តើរៗឡើងវិញ បន្ទាប់ពីឃ្លាតឆ្ងាយមួយរយៈក្រោយរស់នៅមានងារជាជំទាវមួយរូបអស់រយៈពេលប៉ុន្មានឆ្នាំចុងក្រោយនេះ៕
ចែករំលែកព័តមាននេះ