រាជធានីភ្នំពេញ ៖ មានការភ្ញាក់ផ្អើលមួយបន្ទាប់ពីបុរសម្នាក់ស្ថិតក្នុងស្ថានភាពឆេះរោលរលាករលេះរលួយពេញខ្លួនប្រាណដោយសាររូបគេយកសាំងចំនួន២លីត្រមកចាក់ដុតសម្ភារក្នុងបន្ទប់ផ្ទះជួល ហើយចាក់សាំងដុតខ្លួនឯងបង្កការភ្ញាក់ផ្អើលដល់អ្នករស់នៅក្បែរខាងស្មានថាជាករណីអគ្គិភ័យ ដល់ពេលពិនិត្យជាក់ស្តែង ទើបដឹងថា ម្ចាស់បន្ទប់ចាក់សាំងដុតខ្លួនឯងសោះ។
រាជធានីភ្នំពេញ ៖ មានការភ្ញាក់ផ្អើលមួយ បន្ទាប់ពីបុរសម្នាក់ស្ថិតក្នុងស្ថានភាពឆេះរោលរលាករលេះរលួយពេញខ្លួនប្រាណ ដោយសាររូបគេយកសាំងចំនួន២លីត្រ មកចាក់ដុតសម្ភារក្នុងបន្ទប់ផ្ទះជួល ហើយចាក់សាំងដុតខ្លួនឯង បង្កការភ្ញាក់ផ្អើលដល់អ្នករស់នៅក្បែរខាងស្មានថា ជាករណីអគ្គិភ័យ ដល់ពេលពិនិត្យជាក់ស្តែងទើបដឹងថា ម្ចាស់បន្ទប់ចាក់សាំងដុតខ្លួនឯងសោះ ។
ហេតុការណ៍នេះ បានកើតឡើងកាលពីវេលាម៉ោង០៧ព្រឹកថ្ងៃទី១០ សីហា នៅក្នុងបន្ទប់ផ្ទះជួលគ្មានលេខមួយកន្លែង ក្នុងភូមិទ្រា៤ សង្កាត់ស្ទឹងមានជ័យ ខណ្ឌមានជ័យ ។ បុរសដែលដុតខ្លួនឯងនេះ ពុំត្រូវបានស្គាល់អត្តសញ្ញាណទេ ព្រោះក្រោយកើតហេតុត្រូវកម្លាំងនគរបាលបញ្ជូនទៅសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យរុស្ស៊ី ។
តាមព័ត៌មានបានឱ្យដឹងថា នៅវេលាខាងលើ គេឃើញបុរសនោះបានទិញសាំង២លីត្រ ដើរសំដៅចូលទៅក្នុងបន្ទប់ ។ លុះមួយសន្ទុះក្រោយមក ស្រាប់តែមានហុយផ្សែងចេញពីក្នុងបន្ទប់ ហើយឃើញបុរសនោះរត់ចេញមកខាងក្រៅក្នុងស្ថានភាពរលាកពេញខ្លួនប្រាណ ជាហេតុធ្វើឱ្យបងប្អូនប្រជាពលរដ្ឋរស់នៅក្បែរនោះស្មានថាជាករណីទុស្សេចរន្តភ្លើងបង្កជាអគ្គិភ័យឆេះក្នុងបន្ទប់ ក៏រាយការណ៍ទៅនគរបាលមូលដ្ឋានឱ្យចុះអន្តរាគមន៍ភ្លាមៗ ។ ប៉ុន្តែក្រោយការចុះអន្តរាគមន៍ និងសួរនាំព័ត៌មានយ៉ាងលម្អិតរួចមក ទើប
សមត្ថកិច្ចបញ្ជាក់ថាពុំមែនជាករណីអគ្គិភ័យនោះទេ តែជាការដុតបំផ្លាញសម្ភារនិងដុតខ្លួនឯងពីសំណាក់បុរសម្ចាស់បន្ទប់នោះ ។ នាយប៉ុស្តិ៍នគរបាលលោក ម៉ៅ សាវឿន បានបញ្ជាក់ថា ក្នុងការអន្តរាគមន៍ជាក់ស្តែង បុរសនេះហាក់ជាមនុស្សមានសតិមិនប្រក្រតី ព្រោះនិយាយមិនសូវដឹងទិសតំបន់អ្វីទេ ។
ដោយឡែក បើតាមអ្នករស់នៅក្បែរខាងបានអះអាងថា បុរសនេះជាមនុស្សញៀនថ្នាំយ៉ាងងប់ងុល ។ ទោះបីជាបែបណា មិនទាន់មានប្រភពផ្លូវការណាមួយប្រាប់ឱ្យដឹងថា ការដុតបំផ្លាញសម្ភារនិងដុតខ្លួនឯងនេះតើបណ្តាលមកពីមូលហេតុអ្វីឱ្យពិតប្រាកដនោះ?
ចែករំលែកព័តមាននេះ