រាជធានីភ្នំពេញ ៖ អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានណែនាំដល់ម្ចាស់កៅស៊ូទាំងអស់ ត្រូវបង្ការគ្រោះអគ្គិភ័យ ក្នុងចម្ការកៅស៊ូឲ្យបានត្រឹមត្រូវ នៅរដូវជ្រុះស្លឹក…
រាជធានីភ្នំពេញ ៖ អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានណែនាំដល់ម្ចាស់កៅស៊ូទាំងអស់ ត្រូវបង្ការគ្រោះអគ្គិភ័យ ក្នុងចម្ការកៅស៊ូឲ្យបានត្រឹមត្រូវ នៅរដូវជ្រុះស្លឹក ជៀសវាងការឆះ ជាយថាហេតុណាមួយ ។
យោងតាមសេចក្ដីជូនដំណឹងរបស់អគ្គនាយកដ្ឋានកៅស៊ូ នាថ្ងៃទី៣១ មករា បានឱ្យដឹងថា ជារៀលរាល់ឆ្នាំ រដូវកៅស៊ូជ្រុះស្លឹក នឹងចាប់ផ្តើមពីខែមករា រហូតដល់ចុងខែកុម្ភៈ ។
អគ្គនាយកដ្ឋានកៅស៊ូ នៃក្រសួងកសិកម្មបានបញ្ជាក់ថា ៖ «ក្នុងន័យនេះ ដើម្បីបង្ការគ្រោះអគ្គិភ័យ ដែលនឹងអាចកើតមានជាយថាហេតុ នៅក្នុងចម្ការកៅស៊ូ សូមម្ចាស់ចម្ការកៅស៊ូទាំងអស់ យកចិត្តទុកដាក់សម្អាត និងធ្វើផ្លូវភ្លើងក្នុងចម្ការកៅស៊ូឱ្យបានត្រឹមត្រូវ»។
អគ្គនាយកដ្ឋានកៅស៊ូ បានលើកឡើងថា ម្ចាស់ចម្ការកៅស៊ូ ក៏ត្រូវកាត់ស្មៅ ឬរុក្ខជាតិចង្រៃ នៅជុំវិញព្រំចម្ការ និងតាមចន្លោះរងកៅស៊ូជាប់ផ្លូវធ្វើដំណើរ និងត្រូវប្រមូលទាំងស្លឹកកៅស៊ូដែលជ្រុះ ដាក់គរជាគំនរៗ ប្រវែង ២៥ម៉ែត្រ លើគ្នាតាមចន្លោះរងកៅស៊ូដាច់ៗពីគ្នា និងត្រូវដុតមួយគំនរម្តងៗ ដោយចាប់ផ្តើមពីគំនរ ដែលស្ថិតនៅក្រោមទិសខ្យល់ ។
ជាមួយគ្នានោះដែរ អគ្គនាយកដ្ឋានកៅស៊ូ បន្ថែមថា ត្រូវសម្អាតដុត នៅពេលព្រឹកព្រលឹម និងបញ្ឈប់ការដុតនៅវេលាម៉ោង៩ព្រឹក ដោយត្រូវឃ្លាំមើលឲ្យបានហ្មត់ចត់ ដើម្បីចៀសវាង ផ្កាភ្លើងហើរទៅឆេះកន្លែងដទៃទៀត និងត្រូវធានាថា ភ្លើងពិតជារលត់អស់១០០ភាគរយ ក្រោយពេលឈប់ដុត។ ជាពិសេស ហាមដាច់ខាត ការដុតសម្អាតនៅពេលរសៀល ព្រោះអាចបង្កឱ្យមានអគ្គិភ័យកើតឡើងជាយថាហេតុ ។
ជាងនេះទៅទៀត អគ្គនាយកដ្ឋានកៅស៊ូ បានសង្ឃឹមយ៉ាងមុតមាំថា ម្ចាស់ចម្ការកៅស៊ូទាំងអស់ នឹងចូលរួមអនុវត្តតាមសេចក្តីជូនដំណឹងនេះ ឱ្យបានត្រឹមត្រូវ និងមានប្រសិទ្ធភាពខ្ពស់៕
ចែករំលែកព័តមាននេះ