តារាសម្តែងនាង លី ឌីណា ឬ ភីយ៉ា នឹងចូលរោងការនៅដើមខែកុម្ភៈ ឆ្នាំ២០២៣ ខាងមុខនេះហើយ ខណៈពេលដែលដំណឹងនេះ ត្រូវបានមហាជនសម្តែងការភ្ញាក់ផ្អើលក្នុងពេលដែលកន្លងមក តារាស្រីរូបនេះមិនបានបង្ហើបពី
រាជធានីភ្នំពេញ ៖ តារាសម្តែងនាង លី ឌីណា ឬ ភីយ៉ា នឹងចូលរោងការនៅដើមខែកុម្ភៈ ឆ្នាំ២០២៣ ខាងមុខនេះហើយ ខណៈពេលដែលដំណឹងនេះ ត្រូវបានមហាជនសម្តែងការភ្ញាក់ផ្អើលក្នុងពេលដែលកន្លងមក តារាស្រីរូបនេះមិនបានបង្ហើបពីចំណងស្នេហា និងគម្រោងរៀបការជាមួយបុរសណាម្នាក់នោះឡើយ។
ដំណឹងនេះ ត្រូវបានគេដឹងពីអ្នកសិល្បៈជិតស្និទ្ធរបស់ ភីយ៉ា មួយរូបនេះ ដែលបានប្រកាសនៅលើបណ្តាញសង្គមហ្វេសប៊ុក ដោយបញ្ជាក់ពីការចូលរួមពិធីមង្គលការរបស់តារារូបនេះ នាពេលឆាប់ៗខាងមុខ។
យ៉ាងណាជុំវិញ បញ្ហានេះ ភីយ៉ា បានទទួលស្គាល់ថា នាងពិតជាចូលរោងការនាពេលឆាប់ៗខាងមុខនេះពិតប្រាកដមែន ក្នុងពេលដែលអ្វីៗបានត្រៀមរៀបចំទុករួចរាល់អស់ហើយសម្រាប់ពិធីខាងលើនេះ។
ថ្លែងប្រាប់សារព័ត៌មានកោះសន្តិភាពតាមសារអេឡិចត្រូនិចតារាសម្តែងនាង លី ឌីណា ហៅ ភីយ៉ា បានលើកឡើងថា តាមគម្រោងនាងនឹងរៀបចំពិធីមង្គការនៅថ្ងៃទី៣ ខែកុម្ភៈ ឆ្នាំ២០២៣ ដោយពីធិនេះ ធ្វើឡើងនៅក្នុងមជ្ឈមណ្ឌលព្រីមាសែនសុខ។ នាងបញ្ជាក់ថា មង្គលការរបស់នាងនឹងមានការអញ្ជើញចូលរួមពីភ្ញៀវកិត្តិយសដែលមានមុខមាត់ក្នុងសង្គមមួយចំនួន ព្រមទាំងសាច់ញាតិទាំងសងខាង ជាពិសេសនោះគឺបណ្តាអ្នកសិល្បៈជាច្រើនរូបផងដែរ។
នាងបន្តថា ស្វាមីរបស់នាង គឺជាមន្ត្រីរាជការនៅក្នុងក្រសួងមួយ ដែលមានវ័យ៤០ប្លាយ ដែលបានស្គាល់ និងសាកមើលចិត្តគ្នាអស់រយៈពេលប្រមាណជា៧ឆ្នាំមកហើយ ទម្រាំឈានមកដល់ពិធីមង្គលការជាផ្លូវការនាពេលនេះ។ ភីយ៉ា បានលើកឡើងបន្ថែមថា មុននឹងឈានដល់ពិធីមង្គលការនេះ ពួកនាងទាំងពីរក៏បានជួបនូវឧបសគ្គជាច្រើនរាប់មិនអស់ផងដែរ ប៉ុន្តែយ៉ាងណា បើទោះបីជាជួបបញ្ហាជាច្រើនក៏ដោយ ពួកនាងបានជម្នះរហូតបានចាប់ដៃគ្នានាពេលនេះ។
នាងបានបញ្ជាក់ថា មានចំណុចវិជ្ជមានរបស់អនាគតស្វាមីរបស់នាងមួយចំនួន ដែលធ្វើឲ្យនាងសម្រេចរៀបការនាពេលនេះ ដោយក្នុងនោះគាត់ជាមនុស្សមានចរិតចាស់ទុំ មានក្តីមេត្តា ចិត្តល្អ ហើយជាមនុស្សម្នាក់ដែលចិត្តធ្ងន់ និងត្រជាក់។
យ៉ាងណាបើតាម ភីយ៉ា ថា ក្រោយពីរៀបការរួចហើយនោះ សម្រាប់ការងារសិល្បៈគឺនាងនៅតែបន្តដដែល ដោយអនាគតស្វាមីរបស់នាងមិនបានហាមឃាត់ចំពោះរឿងនេះឡើយ ប៉ុន្តែនាងក៏ត្រូវពិចារណាចំពោះការទទួលការសម្តែងនេះផងដែរ។ នាងថា កន្លងមក នាងអាចទទួលយកការសម្តែងច្រើន ប៉ុន្តែពេលរៀបការរួច នាងនឹងមិនទទួលយកការសម្តែងច្រើនដូចពេលមុនឡើយ ពោលគឺនាងទទួលតែមួយៗប៉ុណ្ណោះ ក្នុងពេលដែលអនាគតស្វាមីរបស់នាងក៏គាំទ្រនាងដូចគ្នា។
ទោះជាយ៉ាងណាក៏ដោយ បើទោះបីជាកៀកថ្ងៃចូលរោងការទៅហើយក្តី ប៉ុន្តែស្រីស្រស់ ភីយ៉ា នៅតែមិនទាន់អាចបញ្ចេញមុខមាត់អត្តសញ្ញាណស្វាមីជាសាធារណៈនាពេលនេះឡើយ ដោយនាងត្រូវរង់ចាំថ្ងៃចូលរោងការតែម្តង៕
ចែករំលែកព័តមាននេះ