រាជធានីភ្នំពេញ ៖ អ្នកវិនិយោគខុនដូសម្រាប់ពលរដ្ឋមានជីវភាពមធ្យមនៅតែមានសុទិដ្ឋិនិយមពីទីផ្សារ ខណៈពលរដ្ឋកម្ពុជាកាន់តែច្រើនបានសម្រេចចិត្តទិញខុនដូរស់នៅ ។
ម្ចាស់ភាគហ៊ុននៃ
រាជធានីភ្នំពេញ ៖ អ្នកវិនិយោគខុនដូសម្រាប់ពលរដ្ឋមានជីវភាពមធ្យមនៅតែមានសុទិដ្ឋិនិយមពីទីផ្សារ ខណៈពលរដ្ឋកម្ពុជាកាន់តែច្រើនបានសម្រេចចិត្តទិញខុនដូរស់នៅ ។
ម្ចាស់ភាគហ៊ុននៃក្រុមហ៊ុនលំនៅឋានអិល(L) កម្ពុជា ភ្នំពេញ លោក ទុយ ប៊ុន បានថ្លែងតាមទូរស័ព្ទនាព្រឹកថ្ងៃទី២១ កក្កដា ថា លោកនៅតែមានសុទិដ្ឋិនិយមពីទីផ្សារខុនដូរបស់ខ្លួន ដោយសារចរន្តនៃការប្រើប្រាស់ខុនដូកើនឡើងពីសំណាក់ប្រជាពលរដ្ឋខ្មែរ ហើយលោកវិនិយោគខុនដូមានតម្លៃត្រឹមតែជាង២ម៉ឺនដុល្លារប៉ុណ្ណោះក្នុង១យូនីត ជាតម្លៃសមស្របសម្រាប់ពលរដ្ឋមានជីវភាពមធ្យម ។
លោកបន្តថា ជាក់ស្តែង នៅខែសីហាខាងមុខនេះ លោកនឹងសាងសង់ខុនដូថ្មីមួយទៀត ដែលមានផ្ទះសរុបចំនួនជាង៤០០យូនីត និងមានកម្ពស់២២ជាន់ ។ ផ្ទះក្នុងគម្រោងនេះមានទំហំចាប់ពីជាង៣២ម៉ែត្រការ៉េ រហូតដល់ជាង៦០ម៉ែត្រការ៉េ និងលក់ក្នុងតម្លៃ៨០០ដុល្លារក្នុង១ម៉ែត្រការ៉េ ។
លោកបន្តថា ៖ « មានអតិថិជនមួយចំនួនបានរង់ចាំខុនដូនេះ ហើយយើងរំពឹងថា ការលក់នឹងកើនឡើងបន្ថែមទៀត។ ផ្ទុយទៅវិញ បើលក់មិនចេញ ក៏ក្រុមហ៊ុនអាចជួលបានផងដែរ » ។
អគារខុនដូកម្ពស់២២ជាន់នេះ នឹងទុក៥ជាន់សម្រាប់ចំណតយានយន្ត មានក្លិបហាត់ប្រាណ ព្រមទាំង Sky Bar ផងដែរ ដើម្បីបម្រើដល់ការកម្សាន្ដ និងសុខមាលភាពរបស់អ្នករស់នៅលើអគារនេះ ។ លោកបន្តថា អគារនេះសាងសង់ឡើងនៅលើផ្ទៃដីជាង២ពាន់ម៉ែត្រការ៉េ និងគ្រោងបញ្ចប់ការសាងសង់រយៈពេល២ឆ្នាំកន្លះខាងមុខ ។
យោងតាមការសិក្សារបស់ក្រុមហ៊ុន CBRE Cambodia បានរកឃើញថា គិតរហូតដល់ដំណាច់ឆ្នាំនេះ ខុនដូចំនួន៧ពាន់យូនីតទៀតនឹងដាក់ចូលទីផ្សារ ខណៈខុនដូ៥ពាន់យូនីតបាននិងកំពុងប្រើប្រាស់នៅលើទីផ្សាររួចហើយ ។
អ្នកនាង អាន សុធីតា នាយិកាក្រុមហ៊ុន CBRE Cambodia ថ្លែងថា ទីផ្សារខុនដូបច្ចុប្បន្ន នៅតែដំណើរការលក់បានជាធម្មតា ប៉ុន្តែខុនដូដែលផ្តោតលើប្រជាពលរដ្ឋមានជីវភាពមធ្យម មានទីផ្សារល្អជាងខុនដូដែលមានតម្លៃខ្ពស់ ព្រោះតម្រូវការខុនដូប្រណីតពីប្រជាពលរដ្ឋខ្មែរនៅមានកម្រិត ប៉ុន្តែខុនដូដែលមានតម្លៃទាបសមស្របមានទីផ្សារធំសម្រាប់កម្ពុជា។
លោក ទូច សំណាង អគ្គនាយករងក្រុមហ៊ុនOCIC បានថ្លែងថា ការលក់ខុនដូប្រណីតនៅតាមទីតាំងល្អៗ នៅតែមានភាពល្អប្រសើរ ដោយសារមានតម្រូវការច្រើនពីជនបរទេស ជាពិសេស ជនជាតិចិន និងចិនតៃវ៉ាន់ ។ ផ្ទុយទៅវិញ ខុនដូដែលមានទីតាំងនៅឆ្ងាយៗពិបាកលក់បន្តិច ។
លោកបន្តថា បច្ចុប្បន្ន អ្នកទិញខុនដូ៤០%ជាជនជាតិខ្មែរ និង៦០%ជាជនបរទេស ប៉ុន្តែនិន្នាការទិញខុនដូពីប្រជាពលរដ្ឋខ្មែរកំពុងបន្តកើនឡើង ។
មន្ត្រីជាន់ខ្ពស់ក្រសួងដែនដី នគរូបនីយកម្ម និងសំណង់ លោក ឡៅ ទិព្ធសីហា បានឲ្យដឹងថា ក្នុងរយៈពេល៦ខែឆ្នាំ២០១៧នេះ ទាំងសមត្ថកិច្ចថ្នាក់ជាតិ និងថ្នាក់រាជធានី-ខេត្ត បានផ្តល់លិខិតអនុញ្ញាតសាងសង់សរុបទូទាំងប្រទេសមានចំនួន១.៥២៣គម្រោង មានផ្ទៃក្រឡាសំណង់សរុបជាង៧,២លានម៉ែត្រការ៉េ និងមានតម្លៃប៉ាន់ស្មានសរុបជាង៤.៩៤៣លានដុល្លារអាមេរិក បើធៀបនឹងរយៈពេលដូចគ្នាឆ្នាំ២០១៦ គឺមានកំណើន២៧,៤៤% ។
ក្នុងរយៈពេលនេះដែរ សំណង់អគារខ្ពស់ចាប់ពី៥ជាន់ឡើងទៅមានចំនួន៤៣អគារ ដែល ភាគច្រើនជាអគារស្នាក់នៅរួម អគារសហកម្មសិទ្ធិ អគារការិយាល័យ និងអគារមុខងារឧប និស្ស័យខាងផ្នែកពាណិជ្ជកម្ម ដែលម្ចាស់គម្រោងភាគច្រើនអភិវឌ្ឍន៍ដោយអ្នកវិនិយោគទុនក្នុងស្រុក និងមួយផ្នែកទៀត ជាការវិនិយោគរួមគ្នារវាងវិនិយោគិនក្នុងស្រុក និងបរទេស ៕
ចែករំលែកព័តមាននេះ