រាជធានីភ្នំពេញ ៖ តើយុវវ័យបានត្រៀមខ្លួនសម្រាប់ការផ្លាស់ប្តូរជីវិតរស់នៅ«Lifestyle» របស់ខ្លួនហើយឬនៅ ? ខណៈពេលដែលទីក្រុងកាន់តែរីកធំ ចរាចរណ៍កកស្ទះ និងកំណើនប្រជាសាស្ត្រកើនឡើងដល់៤លាននាក់នៅរាជធានីភ្នំពេញ ។
យោងតាមការសិក្សារបស់ក្រុមហ៊ុន Urban Living Solution រកឃើញថា បែបបទជីវិតរបស់ប្រជាពលរដ្ឋនៅក្នុងទីក្រុងនឹងផ្លាស់ប្តូរផ្នត់គំនិតបន្ទាប់ពីឆ្នាំ២០៣០ ។ ចំនួនពលរដ្ឋរស់នៅរាជធានីភ្នំពេញនឹងកើនឡើងដល់៤លាននាក់ ឬច្រើនជាងនេះ ។ ជាមួយការផ្លាស់ប្តូរជាវិជ្ជមាន និងប្រឈមបញ្ហាជាច្រើន ប្រជាពលរដ្ឋរស់នៅតាមខុនដូ នឹងកើនឡើងពីសំណាក់ក្រុមយុវជន ដែលបច្ចុប្បន្នមានវ័យក្មេង និងដល់វ័យសកម្មក្នុងការងារនាឆ្នាំនោះ ពួកគេនឹងជ្រើសរើសរស់នៅតាមខុនដូ ដោយសារការកើនឡើងនូវក្រុមអ្នកមានជីវភាពមធ្យម និងការប្រើប្រាស់សេវាកម្មសម្រាប់រស់នៅប្រចាំថ្ងៃកាន់តែរីកចម្រើន ។
លោក ងួន ឆាយលាង អគ្គនាយកក្រុម ហ៊ុន Ratanaka Realty បានថ្លែងកាលពីព្រឹកថ្ងៃទី៧ កក្កដា ថា ជាមួយកំណើនសេដ្ឋកិច្ចនឹងបន្តរីកចម្រើនរយៈពេលវែង ចរន្តរីកលូតលាស់នៃបច្ចេកវិទ្យាដូចជា ការផ្ញើប្រាក់តាមទូរស័ព្ទដៃ ការហៅឬកុម្មង់ទំនិញ អាហារជាមួយម៉ូតូឌុប ម៉ូតូកង់បី និងតាក់ស៊ីតាមរយៈទូរស័ព្ទដៃ នឹងបន្តរីកចម្រើន ។ ការកកស្ទះចរាចរណ៍កាន់តែខ្លាំងបានរំខានដល់ការធ្វើដំណើរ និងកង្វះចំណតយានយន្ត លោកជឿថា នឹងមានការវិនិយោគលើចំណតយានយន្តសម្រាប់ជួលកាន់តែច្រើននាពេលអនាគត ។
លោកបន្តថា ៖ « ខ្ញុំគិតថា យុវជនសម័យថ្មីនឹងជ្រើសរើសការរស់នៅតាមខុនដូ ដែលមានទីតាំងនៅជិតកន្លែងធ្វើការងាររបស់ពួកគេ»។ លោកបន្តថា ៖ « យុវជនវ័យក្មេងនឹងក្លាយជាអ្នកសកម្មក្នុងការងារនៅឆ្នាំ២០៣០។ ពួកគេជាក្រុមមនុស្សស៊ីវិល័យ និងជាអ្នកប្រើប្រាស់បច្ចេកវិទ្យា ។ ពួកគេនឹងសម្រេចចិត្តរស់នៅក្នុងទីក្រុង ហើយអ្នកអភិវឌ្ឍន៍ខុនដូដែលផ្តោតលើក្រុមមនុស្សវ័យនេះ នឹងទទួលបានផលប្រយោជន៍ » ។
នាពេលអនាគត រាជរដ្ឋាភិបាលនឹងរៀបចំបែងចែកតំបន់ឧស្សាហកម្ម និងលំនៅឋានដាច់ពីគ្នា ។ ជាក់ស្តែង បច្ចុប្បន្ន ការលក់គ្រឿងចក្រធុនធ្ងន់ គ្រឿងម៉ាស៊ីនធំៗ និងរោងចក្រមួយចំនួនបានចាប់ផ្តើមផ្លាស់ប្តូរទៅកាន់តំបន់ជាយក្រុង ។
លោក ងួន ឆាយលាង បន្តថា តាមបរិបទទីក្រុងរីកចម្រើននានាដូចជា ហុងកុង ញូវយ៉ក បាងកក និងប្រទេសសិង្ហបុរីជាដើម ពួកគេកំពុងរស់នៅតាមខុនដូនៅកណ្តាលក្រុង ជាជាងទៅរស់នៅជាយក្រុង ហើយពេលអនាគត ក្រុមយុវជនស៊ីវិល័យនឹងសម្រេចចិត្តដូចគ្នានេះដែរ ។
តាមការសិក្សារបស់អង្គការពលកម្មអន្តរជាតិរកឃើញថា នៅកម្ពុជាក្រុមយុវជនអាយុចាប់ពី៣០ឆ្នាំចុះក្រោម មាន៦០%នៃប្រជាពលរដ្ឋសរុប ។
លោក វ៉ា វីរៈ អគ្គនាយកក្រុមហ៊ុន Century21 Fortuna Investment ដែលទើបបានវិញ្ញាបនបត្រទទួលស្គាល់ ក្នុងនាមជាអ្នកជំនាញវិស័យអចលនទ្រព្យលំដាប់អន្តរជាតិពី National Association Realtor ថ្លែងថា លោកយល់ស្របនឹងការសិក្សាខាងលើនេះ ព្រោះនៅឆ្នាំ២០៣០ ចំនួនពលរដ្ឋរស់នៅក្នុងទីក្រុងនឹងកើនដល់៤លាននាក់ ។ ពួកគេនឹងប្រឈមបញ្ហាជាច្រើនដូចជា ការកកស្ទះចរាចរណ៍ ការបំពុលបរិស្ថាន ហើយបច្ចេកវិទ្យានឹងចូលរួមដោះស្រាយបញ្ហាទាំងនោះ ។
លោកបន្តថា និន្នាការប្រជាពលរដ្ឋនឹងចូលមករស់នៅជាយក្រុង និងក្នុងទីក្រុងកាន់តែច្រើន។ ហេតុនេះ ប្រជាពលរដ្ឋវ័យក្មេង១០០%នឹង ជ្រើសរើសរស់នៅតាមខុនដូ ដូចប្រទេសថៃ វៀតណាម សិង្ហបុរី និងហុងកុងជាដើម។ វាជាជម្រើសមួយដែលផ្តល់អត្ថប្រយោជន៍ និងចំណេញច្រើន ជាពិសេស ពេលវេលា ។
លោកបន្តថា ៖ « ក្រុមយុវជនវ័យក្មេងដែលធ្លាប់សិក្សានៅបរទេស ពួកគេនឹងជ្រើសរើសរស់នៅតាមខុនដូ ព្រោះវាមានទីតាំងនៅជិតហាងកាហ្វេ ផ្សារទំនើប កន្លែងហាត់ប្រាណ និងកន្លែងធ្វើការរបស់ពួកគេ » ។ លោកបន្តថា៖ « ការធ្វើដំណើរនឹងកាន់តែលំបាក ពេលវេលាជាមាសប្រាក់ ខុនដូនឹងជាជម្រើសរបស់ពួកគេដែលជាកន្លែងមានផាសុកភាព សន្តិសុខ២៤ម៉ោង និងមានសេវាកម្មសម្អាតអនាម័យជាដើម » ។
តាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់ អំពីក្របខ័ណ្ឌយុទ្ធសាស្ត្រអភិវឌ្ឍន៍ទីក្រុងនៅកម្ពុជា បានរកឃើញថា ពលរដ្ឋរស់នៅរាជធានី ក្រុង និងទីប្រជុំជននៅទូទាំងប្រទេសក្នុងឆ្នាំ២០១៤ មានចំនួន៤,៥លាននាក់ ស្មើ២៧,១% និងបន្តកើនឡើងដល់៧,៩២លាននាក់នៅឆ្នាំ២០៣០ ស្មើ៤៤%នៃចំនួនពលរដ្ឋកម្ពុជាសរុប ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានថ្លែងថា កាលណាប្រទេសអភិវឌ្ឍ ទីក្រុងកាន់តែរីកធំ មានមនុស្សរស់នៅច្រើនជារឿងធម្មតា ហើយនៅពេលទីក្រុងធំ តម្រូវការហេដ្ឋារចនាសម្ព័ន្ធកាន់តែចាំបាច់ ។ ហេតុនេះ ប្រសិនជារាជរដ្ឋាភិបាលគិតទុកមុន វាជាការល្អប្រសើរដើម្បីបន្ធូរបន្ថយបញ្ហា ទោះជាដោះស្រាយមិនបានទាំងស្រុងក្តី ។ លោកបន្តថា ការដោះស្រាយបញ្ហាច្បាប់ដើម្បីសម្រួលចរាចរណ៍ ការវិនិយោគលើហេដ្ឋារចនាសម្ព័ន្ធ និងសេវាសាធារណៈ ជាអ្វីដែលរាជរដ្ឋាភិបាលត្រូវវិនិយោគច្រើនជាងមុន ។
លោកបន្តថា ៖ « ពេលទីក្រុងកាន់តែរីកចម្រើន គុណភាពជីវិតនឹងកាន់តែលំបាកទៅៗ។ ហេតុនេះ ការមានបច្ចេកវិទ្យាស្មាតហ្វូនអាចជួយបាន តែមិនជួយច្រើនទេ » ។ លោកបន្តថា ៖ « ខ្ញុំមិនជឿថា ប្រព័ន្ធបច្ចេកវិទ្យាអាចជួយបាន១០០%ទេ ហើយវាជារឿងអនាគត ពិបាកប្រមើលមើលណាស់ » ៕
ចែករំលែកព័តមាននេះ