រាជធានីភ្នំពេញ ៖ តារាពហុជំនាញអ្នកនាង ខាត់ សុឃីម បានស្នើដល់ប្រធានវង់តន្ត្រីសម័យនានា សុំបញ្ឈប់ការទទួលលេងពេលព្រឹកនៅក្នុងពិធីការ ដើម្បីចៀសវាងការជួបបញ្ហា និងហានិភ័យនានា ខណៈពេលកន្លងមក បញ្ហានេះគឺនៅតែកើតមានឡើងជារឿយៗ។
ការស្នើសុំពីអ្នកនាង ខាត់ សុឃីម នាពេលនេះបានធ្វើឡើង បន្ទាប់ពីកាលពីពេលថ្មីៗនេះមានក្រុមវង់តន្ត្រីមួយ បានជួបឧប្បទ្ទហេតុក្រឡាប់រថយន្តដឹកសម្ភារៈតន្ត្រីនៅតាមដងផ្លូវ ក្នុងការដំណើរទៅលេងនៅក្នុងពិធីការមួយ ដែលមានការជួលឲ្យលេងកំដរភ្ញៀវហូបបបរពេលព្រឹក ក្នុងពេលហេតុការណ៍នេះបានធ្វើឲ្យមនុស្សមួយចំនួនដែលនៅក្នុងឡានបានរងរបួសធ្ងន់-ស្រាលផងដែរ។
ឆ្លងកាត់ហេតុការណ៍ខាងលើនេះ ក៏មានប្រធានវង់តន្ត្រីមួយដែលមានមូលដ្ឋានក្នុងខេត្តកំពង់ចាម បានចេញមុខស្នើសុំដល់អជ្ញាធរខេត្ត ឲ្យមានវិធានការចំពោះបញ្ហានេះ ដើម្បីបង្ការ និងទប់ស្កាត់កុំឲ្យមានបញ្ហានេះកើតឡើងជាបន្តទៀត។
បើតាមលោក និល ច័ន្ទរតនា ដែលជាម្ចាស់វង់តន្ត្រីក្នុងខេត្តកំពង់ចាម បានលើកឡើងតាមបណ្តាញសង្គមថា យើងខ្ញុំជាសិល្បករ សិល្បការិនី ជាតន្ត្រីករ តន្ត្រីការិនីផ្នែកតន្ត្រីសម័យ ដែលរស់នៅក្នុងខេត្តកំពង់ចាម នឹងមកពីបណ្តាខេត្តនានា ដែលបានទៅបំរើការសិល្បៈមហាជនទូទៅនៅក្នុងខេត្តកំពង់ចាម កំពុងតែមានការព្រួយបារម្ភយ៉ាងខ្លាំងអំពីសុវត្ថិភាពនៃអាយុជីវិតរបស់យើងខ្ញុំ។
លោកបញ្ជាក់ថា គ្រប់រោងការទាំងអស់នៅក្នុងខេត្តកំពង់ចាម តែងតែតម្រូវអោយមានកម្មវិធីហែរជំនូនពេលព្រឹក ដោយចាប់ផ្តើមអោយអ្នកភ្លេង អ្នកចម្រៀងសម័យ ត្រូវចាប់ប្រគំតន្ត្រីនៅវេលាម៉ោង៧:០០ព្រឹក ដើម្បីទទួលក្នុងកម្មវិធីហែកំណត់កូនកំលោះចូលរោងការ ដែលជាប្រពៃណីមួយខុសពីទំនៀមទំលាប់ខ្មែរបុរាណ ដែលគេតម្រូវអោយតែផ្នែកតន្ត្រីបុរាណជាអ្នកប្រគំដង្ហែកូនកំលោះប៉ុណ្ណោះ។
លោកបន្ថែមថា មូលហេតុដូចបានជំរាបខាងលើនេះហើយ ដែលធ្វើអោយយើងខ្ញុំត្រូវចេញដំណើរ មិនថាថ្ងៃ ឬយប់ ម៉ោងប៉ន្មានក៏ដោយ គឺត្រូវទៅរៀបចំឆាកអោយទាន់វេលាហែកំណត់ជាកំហិត ដូច្នេះវាបានធ្វើអោយរងការប៉ះពាល់ជាច្រើនដល់ការធ្វើដំណើរដូចជា ៖ អត់ងងុយ សម្រាកមិនគ្រប់គ្រាន់ ព្រោះត្រូវធ្វើដំណើរតាមផ្លូវមិនថាជិតឆ្ងាយ គ្រោះថ្នាក់ចរាចរណ៍បណ្តាលមកពីតៃកុងប្រញាប់ តៃកុងអត់ងងុយ ខ្យល់គរស្លា.ប់ ហើយអ្នកខ្លះឈានដល់ការប្រើប្រាស់គ្រឿងញៀ.នដែលវាអាចជួយមិនអោយដេកលក់បាន និងមានមូលហេតុផ្សេងៗទៀតដែលយើងខ្ញុំរៀបរាប់មិនអស់។
លោកបន្ថែមទៀតថា យើងខ្ញុំសុំសំណូមពរពីលោកគណៈអភិបាលខេត្តកំពង់ចាម មេត្តាលោកជួយបញ្ចប់នៅកំហុសឆ្គងទាំងអស់នេះផង គឺសុំអោយលោកគណៈអភិបាលចេញលិខិតបង្គាប់ជូនលោកចៅហ្វាយស្រុក លោកមេឃុំ លោកនាយប៉ុស្តិ៍ អោយចុះជូនដំណឹងមិនអោយមានការប្រគំតន្ត្រីសម័យទទួលហែកំណត់ពេលព្រឹកជាដាច់ខាត ហើយជាពិសេសសុំជូនដំណឹងដល់លោកថៅកែភ្លេងសម័យអោយបានដឹងគ្រប់ៗផង។
ស្រដៀងគ្នានេះ តារាស្រីអ្នកនាង ខាត់ សុឃីម ក្នុងនាមជាអ្នកប្រកបរបរដូចគ្នានេះម្នាក់ផងដែរនោះ ក៏បានស្នើសុំម្ចាស់វង់តន្ត្រីសម័យនានា គួរបញ្ឈប់ការទទួលលេងពេលព្រឹកនេះ ដើម្បីចៀសវាងការជួបហានិភ័យដូចខាងលើ។
អ្នកនាងបានបង្ហោះសារតាមគណនីហ្វេសប៊ុករបស់ខ្លួនថា ជីវិតរស់ ១ថ្ងៃណាក៏ដើម្បីគេដែលមិនដែលគិតពីសុខទុក្ខខ្លួនឯងទេ។ ខ្ញុំជឿថា បើយើងសិល្បៈធ្វើរឿង១នេះបាន គឺដើម្បីខ្លួនយើងខ្លះហើយ (ខ្ញុំជាមេ អាហ្វែម្នាក់ដែរ ខ្ញុំមិនដែលទទួលបបរព្រឹកទេ គេមិនជួលហីទៅ វាគ្មានទៅពីរោះ អា១បទ២បទនឹងទេ ខូចទាំងប្រពៃណីទៀត សូមបងៗដែលជាមេអាហ្វែ គិតអាណិតខ្លួនឯង និងសិល្បៈផង។
ជាការកត់សម្គាល់ ការស្នើសុំពីអ្នកនាង ខាត់ សុឃីម នាពេលនេះ មិនមែនជាលើកទី១នោះទេ ពោលគឺកន្លងមក នាងក៏បានអំពាវនាវដល់ម្ចាស់កម្មវិធីការ គួរពិចារណាកុំមានការជួលភ្លេងសម័យសម្រាប់លេងនៅពេលព្រឹកនេះផងដែរ៕
ចែករំលែកព័តមាននេះ