រាជធានីភ្នំពេញ ៖ ព្រឹទ្ធាចារ្យគង់ ណៃ បានស្នើយុវវ័យកម្ពុជាសម័យទំនើបនេះងាកមកចាប់អារម្មណ៍សិល្បៈចាប៉ីដងវែងខ្លះ ក្នុងពេលទម្រង់សិល្បៈបុរាណវ័យចំណាស់របស់ខ្មែរមួយនេះចាប់ផ្តើមទទួលស្គាល់ជាអន្តរជាតិ ។
ការស្នើសុំរបស់ព្រឹទ្ធាចារ្យគង់ ណៃ នេះខណៈគាត់កំពុងតែត្រៀមខ្លួនចេញដំណើរពីប្រទេសកម្ពុជា ទៅទទួលពានរង្វាន់«សិល្បៈ និងវប្បធម៌ហ្វឹគឹអុកា»ឆ្នាំ២០១៧នៅប្រទេសជប៉ុននាចុងខែកញ្ញា។
លោកព្រឹទ្ធាចារ្យគង់ ណៃ បញ្ជាក់ថាចាប់តាំងពីទម្រង់សិល្បៈចាប៉ីដងវែងខ្មែរចូលជាបេតិកភណ្ឌពិភពលោករួចមក នេះជាលើកទីមួយហើយដែលប្រទេសកម្ពុជាក្នុងចំណោមប្រទេសចំនួន២ផ្សេងទៀតមាន ចិន និងថៃដែលបានទទួលពានរង្វាន់ពីទីក្រុងហ្វឹគឹអុកានាឆ្នាំ២០១៧នេះ ។ ឈរលើកិត្តិយស និងកិត្យានុភាពនេះ ក្នុងនាមជាអ្នកចាប់អាជីពចាប៉ីដងវែងជើងចាស់ លោកព្រឹទ្ធាចារ្យស្នើឱ្យប្រជាពលរដ្ឋខ្មែរបន្តគាំទ្រ និងលើកស្ទួយសិល្បៈដូនតាដ៏មានតម្លៃមួយនេះបន្ថែមទៀត ។
លោកព្រឹទ្ធាចារ្យមានប្រសាសន៍ថា«ប្រសិនបើមានការគាំទ្រនោះទម្រង់សិល្បៈចាប៉ីដងវែងនេះនឹងមិនសាបសូន្យឡើយ ហើយខ្ញុំជឿថាទៅថ្ងៃអនាគតសិល្បៈមួយនេះនឹងមានឈ្មោះបោះសំឡេង នៅពេលដែលយើងទាំងអស់គ្នាមានគំនិតនឹងជួយថែរក្សា និងលើកកម្ពស់ ។ ការណ៍ដែលយើងបានឈានដល់កម្រិតមួយនេះ គឺបានមកពីការខិតខំពីភាគីពាក់ព័ន្ធទាំងអស់ ក៏ដូចជាប្រជាពលរដ្ឋខ្មែរទាំងមូល ព្រោះយើងបានខិតខំថែរក្សា និងអភិរក្សរាល់ទម្រង់សិល្បៈដែលដូនតាខ្មែរយើងបន្សល់ទុក» ។
បើតាមលោកតាព្រឹទ្ធាចារ្យគង់ ណៃ ពេលទទួលដំណឹងពីការទទួលបានពានរង្វាន់ពីប្រទេសជប៉ុននាពេលនេះ គាត់សប្បាយរីករាយ និងចាត់ទុកជាកិត្តិយសក្រៃលែង ព្រោះជាមោទភាពសម្រាប់ប្រទេសកម្ពុជាយើងទាំងមូលផងដែរ ។ គាត់មានប្រសាសន៍ថា«ការផ្តល់កិត្តិយសជាអន្តរជាតិនេះរឹតតែធ្វើឱ្យខ្ញុំកាន់តែមានឆន្ទៈមោះមុតបន្ថែមទៀតក្នុងការជំរុញដល់កូនសិស្សរបស់ខ្ញុំដែលកំពុងតែសិក្សាលើផ្នែកចាប៉ីដងវែងនេះឱ្យខិតខំ និងចាប់អារម្មណ៍លើទម្រង់សិល្បៈមួយនេះដើម្បីឈានសម្រេចគោលដៅរបស់ខ្លួន» ។
លោកតាព្រឹទ្ធាចារ្យបញ្ជាក់ថា រៀនសិល្បៈចាប៉ីដងវែងមិនមែនជាហេតុនាំឱ្យងងឹតភ្នែកដូចមនុស្សមួយចំនួនយល់នោះទេ ។
លោកព្រឹទ្ធាចារ្យគង់ ណៃ មានប្រសាសន៍ថា បន្ទាប់ពីវិលត្រឡប់ពីទទួលពានរង្វាន់នៅប្រទេសជប៉ុនវិញគាត់នឹងផ្សព្វផ្សាយឱ្យបានទូលំទូលាយពីទម្រង់សិល្បៈចាប៉ីដងវែងទៅកាន់កូនចៅជំនាន់ក្រោយឱ្យយល់ដឹងបន្ថែម និងនាំគ្នាចូលរួមលើកស្ទួយ និងអភិរក្សឱ្យបានគង់វង្ស ។
យោងតាមលិខិតជូនដំណឹងរបស់ស្ថានទូតជប៉ុនប្រចាំកម្ពុជាឱ្យដឹងថា ពានរង្វាន់ហ្វឹគឹអុកាបង្កើតឡើងតាំងពីឆ្នាំ១៩៩០ ដែលធ្វើការសកម្មក្នុងការលើកស្ទួយការផ្លាស់ប្តូរវប្បធម៌ជាមួយបណ្តាប្រទេសនានាក្នុងតំបន់អាស៊ី ក្នុងនោះមានប្រទេសកម្ពុជាផងដែរ ។ ពានរង្វាន់នេះសម្រាប់ប្រគល់ទៅកាន់បុគ្គលដែលមានស្នាដៃឆ្នើមក្នុងតំបន់អាស៊ីពាក់ព័ន្ធផ្នែកអប់រំសិល្បៈ និងវប្បធម៌ ។
ចាប៉ីដងវែងខ្មែរត្រូវអង្គការយូណេស្កូដាក់បញ្ចូលជាសម្បត្តិបេតិកភណ្ឌអរូបីរបស់មនុស្សជាតិតាមសំណើរបស់រាជរដ្ឋាភិបាលកម្ពុជានៅថ្ងៃទី១ ខែធ្នូ ឆ្នាំ២០១៦ក្នុងទីក្រុង Addis Ababa ប្រទេសអេត្យូពី ៕
ចែករំលែកព័តមាននេះ