ខេត្តព្រៃវែង ៖ អ្នកចិញ្ចឹមទាបានអះអាងថា ការនាំចូលពងទាពីប្រទេសជិតខាង ធ្វើឲ្យតម្លៃពងទាក្នុងស្រុកចុះថោកដល់កម្រិត បណ្ដាលឲ្យពួកគាត់ម្នាក់ៗខាតបង់រាប់សិបលានរៀល ខណៈដែលពួកខ្លួនបានខ្ចីប្រាក់ពីគ្រឹះស្ថានហិរញ្ញវត្ថុដើម្បីទិញចំណី ។ រហូតមកដល់ពេលនេះ ដោយសារតែជំពាក់គេច្រើនពេក អ្នកខ្លះបោះបង់ចោលមុខរបរនេះ ហើយធ្វើចំណាកស្រុកទៅធ្វើការនៅប្រទេសគេដើម្បីសងបំណុល ។ ទោះបីយ៉ាងណា មន្ត្រីការិយាល័យផលិតកម្ម និងបសុព្យាបាលខេត្ត បដិសេធថា បញ្ហាពងទាធ្លាក់ថ្លៃនេះ មិនមែនដោយសារតែការនាំចូលពីប្រទេសជិតខាងឡើយ ។
អ្នកស្រី ពុំ លាង ដែលចិញ្ចឹមទាចំនួន២ពាន់ក្បាល នៅឃុំចុងអំពិល ស្រុកកញ្ជៀច បាននិយាយថា សព្វថ្ងៃនេះ តម្លៃពងទាកំពុងចុះថោកខ្លាំងណាស់ ។ រីឯចំណីវិញ បែរជាមានតម្លៃខ្ពស់ ធ្វើឲ្យការចិញ្ចឹមទារបស់ពួកគាត់មានការខាតបង់ថវិកាយ៉ាងច្រើន ដោយក្នុងម្នាក់ៗខាតពី១០ទៅ២០លានរៀលឯណោះ ។ អ្នកស្រីបន្ដថា ៖ «ដោយសារតែចិញ្ចឹមទាខាតច្រើន ពេលនេះមានអ្នកខ្លះបានឈប់ចិញ្ចឹម ហើយធ្វើចំណាកស្រុកទៅធ្វើការនៅប្រទេសថៃអស់ហើយ ដើម្បីរកលុយសងគេ ព្រោះលុយដែលទិញចំណីឲ្យទាស៊ីសុទ្ធតែខ្ចីពីគ្រឹះស្ថានហិរញ្ញវត្ថុ » ។
អ្នកស្រីបញ្ជាក់ថា ៖ « ការធ្លាក់ថ្លៃពងទានេះ ដោយសារឈ្មួញនាំចូលពីវៀតណាមមានតម្លៃថោក ធ្វើឲ្យពងទាក្នុងស្រុកក៏ធ្លាក់ថ្លៃដែរ ។ ដូច្នេះ ពួកគាត់ត្រូវតែបង្ខំចិត្តលក់តាមតម្លៃដែលឈ្មួញនាំចូល » ។
អ្នកស្រី ពុំ លាង បានបន្ដថា ការចិញ្ចឹមទាជាង២ពាន់ក្បាលនេះ ក្នុងមួយថ្ងៃត្រូវចំណាយទៅលើចំណី និងថ្លៃកម្មករដេញអស់ជាង១០ម៉ឺនរៀល ។ បើឲ្យវាស៊ីចំណីសុទ្ធតែម្តង គឺខាតខ្លាំងណាស់ ដោយសារតម្លៃពងទាសព្វថ្ងៃនេះ ក្នុងមួយគ្រាប់តែ២៥០រៀលប៉ុណ្ណោះ ។
លោក សេង ហាក់ ឈ្មួញកណ្តាលម្នាក់ដែលមកទិញពងទា បានឲ្យដឹងថា លោកមកទិញពងទាដល់កន្លែងក្នុង១គ្រាប់តម្លៃ២៥០រៀល និងយកទៅបោះដុះនៅក្រុងសួង តំបែរ ខេត្តត្បូងឃ្មុំ តម្លៃ១គ្រាប់៣០០រៀល ។
ផ្ទុយពីការលើកឡើងរបស់អ្នកចិញ្ចឹមទាដែលថា ពងទាថោកមកពីមានការនាំចូលពីប្រទេសវៀតណាមច្រើននោះ លោក ចិន វិសាល ប្រធានការិយាល័យផលិតកម្ម និងបសុព្យាបាលខេត្តបានឆ្លើយបដិសេធភ្លាមៗ ។ លោកថា ៖ « សព្វថ្ងៃ មិនមែននាំចូលពងទាពីប្រទេសវៀតណាមទេ មានតែវៀតណាមមកទិញពងទាពីប្រជាពលរដ្ឋនៅខេត្តព្រៃវែង ទៅលក់នៅវៀតណាមវិញ » ៕
ចែករំលែកព័តមាននេះ