ខេត្តកំពត ៖ ទីផ្សារកសិកម្មក្នុងស្រុកបច្ចុប្បន្ន កំពុងជួបបញ្ហាកាន់តែច្រើនឡើងៗ មិនថាបន្លែបង្ការ ផ្លែឈើ ឬសត្វចិញ្ចឹមនោះទេ សូម្បីតែអ្នកចិញ្ចឹមទា ក៏ជួបបញ្ហាដែរ ដោយសារតម្លៃពងទាចុះថោក និងពងទានាំ
ខេត្តកំពត ៖ ទីផ្សារកសិកម្មក្នុងស្រុកបច្ចុប្បន្ន កំពុងជួបបញ្ហាកាន់តែច្រើនឡើងៗ មិនថាបន្លែបង្ការ ផ្លែឈើ ឬសត្វចិញ្ចឹមនោះទេ សូម្បីតែអ្នកចិញ្ចឹមទា ក៏ជួបបញ្ហាដែរ ដោយសារតម្លៃពងទាចុះថោក និងពងទានាំចូលពីក្រៅប្រទេសច្រើន ។ ដោយសារតែពងទាធ្លាក់ថ្លៃខ្លាំងពេក កសិករមួយចំនួនដែលមិនអាចទប់ទល់នឹងការខាតបង់ប្រចាំថ្ងៃបាន ក៏សម្រេចលក់មេទាចេញខ្លះ ដើម្បីកាត់បន្ថយការចំណាយ ។
អ្នកស្រី ច្រឹប រស់នៅភូមិក្រសាំង ឃុំចំប៉ី ស្រុកអង្គរជ័យ ឲ្យដឹងថា ពេលនេះ ពងទាបានធ្លាក់ថ្លៃយ៉ាងខ្លាំង ធ្វើឲ្យកសិករមួយចំនួននៅក្នុងភូមិនេះលក់មេទាចេញខ្លះ បើទុកវាច្រើនពេក មិនអាចទប់ទល់នឹងការចំណាយប្រចាំថ្ងៃបានទេ ។
អ្នកស្រីនិយាយថា ៖ « ពីមុន តម្លៃពងទាហាក់ខ្ពស់បន្តិច ដូចនេះខ្ញុំ និងអ្នកភូមិឯទៀត អាចទប់ទល់បាននិងចំណេញខ្លះៗ តែក្រោយមកស្រាប់តែឈ្មួញប្រាប់ថា ពេលនេះពងទាបានធ្លាក់ថ្លៃហើយ។ គេមិនអាចទិញក្នុងតម្លៃដូចមុនបានទេ អីចឹងហើយត្រូវបញ្ចុះតម្លៃឲ្យនៅទាបបន្តិច ទើបឈ្មួញអាចទទួលយកទៅលក់បន្តបាន » ។
អ្នកស្រីបន្តថា កាលពីមុន អ្នកស្រីចិញ្ចឹមទាជាង១ពាន់ក្បាលដើម្បីយកពង តែនៅពេលទាចាប់ផ្ដើមពង តម្លៃក៏ចាប់ផ្ដើមធ្លាក់ចុះ ។ ពេលនេះ អ្នកស្រីលក់មេទាចោលជិតអស់ហើយ ទុកតែជាង៣០០ក្បាលប៉ុណ្ណោះដើម្បីរើសពងប្រចាំថ្ងៃ ហើយទាដែលលក់នោះ ក៏មិនបានថ្លៃដែរ គឺតម្លៃទាបជាងទីផ្សារ ប៉ុន្តែបើសិនជាទុកបន្តទៀត ក៏មិនចំណេញដែរ គឺមានតែបន្តខាត ដូច្នេះត្រូវបង្ខំលក់វាចេញមួយចំនួនធំ ។
អ្នកស្រី ម៉ារ៉េត ចិញ្ចឹមទាប្រមាណជាង២ពាន់ក្បាល ក៏បានឲ្យដឹងដែរថា នៅពេលនេះពងទាមានតម្លៃត្រឹមតែជាង៣០០រៀលប៉ុណ្ណោះ ក្នុង១គ្រាប់ នេះចំពោះតែពងល្អៗ ។ បើពងទាដែលលែងនៅតាមស្រែវិញ មានតម្លៃតែជាង២០០រៀលប៉ុណ្ណោះក្នុង១គ្រាប់ ។
អ្នកស្រីនិយាយថា ៖ « ពងទាចាប់ផ្ដើមធ្លាក់ថ្លៃទើបតែជាង១ខែប៉ុណ្ណោះ ដោយឈ្មួញប្រាប់ថា ពងទាក្នុងស្រុកយើងធ្លាក់ថ្លៃ ដោយសារតែពងទាបរទេសចូលមកច្រើន ហើយពងទាគេតម្លៃទាបជាងពងទាក្នុងស្រុក ។ ដូចនេះហើយទើបធ្វើឲ្យពងទាក្នុងស្រុកយើងធ្លាក់ថ្លៃនៅទាប » ។
អ្នកស្រីបន្តថា ពងទាមិនអាចទុកយូរបានទេ ដូច្នេះហើយទោះបីតម្លៃទាបប៉ុនណា ក៏ត្រូវតែលក់ឲ្យគេដែរ ក្នុងរយៈពេលពីរឬបីថ្ងៃ គេមកទទួលយកម្ដង ។ បើសិនជាទុកច្រើនហើយយូរៗ វាអាចនឹងធ្វើឲ្យពងទានោះមិនសូវមានគុណភាព ។
អ្នកស្រីបន្ថែមថា ៖ « ពងទាដែលឈ្មួញយកទៅភាគច្រើន គេយកទៅធ្វើជាពងទាកូន ឬពងទាប្រៃ ហើយមួយចំនួនទៀតយកទៅភ្ញាស់។ ក្រៅពីនោះ គេក៏យកពងទាទៅបរិភោគផងដែរ » ។
អ្នកចិញ្ចឹមទាទាំងនោះបានអំពាវនាវដល់អាជ្ញាធរ និងអ្នកពាក់ព័ន្ធ សូមជួយសម្រួលដល់វិស័យកសិកម្មខ្មែរផង ។ ជាក់ស្ដែង ពេលនេះកសិករចិញ្ចឹមទាជាច្រើនបានបោះបង់បន្តិចម្ដងៗហើយ ។ ដូចនេះ សូមឲ្យអាជ្ញាធរជួយលើកស្ទួយផលិតផលរបស់ខ្មែរ ដើម្បីឲ្យកសិកររកចំណូលបន្ថែមពីការធ្វើស្រែចម្ការ ។
គួរបញ្ជាក់ថា រហូតមកដល់ពេលនេះ តម្លៃពងទាបានហក់ឡើងបន្តិចហើយ តែឡើងតិចតួចបំផុត គឺពងទាល្អ ឡើងត្រឹមតែ១០ទៅ២០រៀលប៉ុណ្ណោះក្នុង១គ្រាប់ ។ ទោះជាយ៉ាងណា កសិករចិញ្ចឹមទាថា តម្លៃប៉ុណ្ណេះក៏នៅតែមិនអាចចំណេញដែរ តែប្រសិនបើក្នុង១គ្រាប់ជិត៤០០រៀល ឬលើសតិចតួច អាចចំណេញបានខ្លះ ៕
ចែករំលែកព័តមាននេះ