ខេត្តស្វាយរៀង ៖ ក្មេងប្រុស២នាក់បងប្អូនបង្កើត ដែលរត់លេងជិតទ្វាររបងដែកផ្ទះអ្នកជិតខាង ចៃដន្យទ្វារដែកដែលមានទម្ងន់រាប់តោននោះ រលំសង្កត់លើពួកគេទាំងពីរនាក់បងប្អូន បណ្តាលឱ្យបែកក្បាលស្លាប់ភ្លាមៗកាលពីវេលាម៉ោង៦និង៣០នាទីល្ងាចថ្ងៃទី៣០ ឧសភា នៅភូមិភ្លោះ ឃុំក្រួស ស្រុកស្វាយជ្រំ ។
បើតាមសមត្ថកិច្ចឃុំក្រួស បានឲ្យដឹងថា ឪពុកម្ដាយកុមាររងគ្រោះទាំងពីរដោយសារមានជីវភាពក្រីក្រខ្វះខាតបានធ្វើចំណាកស្រុក ហើយបានយកកូន៣នាក់ប្រុស២ស្រី១នាក់ ផ្ញើឱ្យជីតាមើលថែដោយពួកគេទៅធ្វើជាកម្មករកម្មការិនីនៅរាជធានីភ្នំពេញ ។
ប្រភពដដែលបន្តទៀតថា កុមាររងគ្រោះឈ្មោះ ខាន់ រ៉ាត់ អាយុ១០ឆ្នាំ និងម្នាក់ទៀតឈ្មោះ ខាន់ រ៉ាន់ អាយុ១១ឆ្នាំ ។ ប្រភពបន្តថា មូលហេតុដែលបណ្តាលឱ្យរបងដែករលំសង្កត់នោះ គឺខណៈដែលកុមាររងគ្រោះទាំងពីនាក់បងប្អូនបានឡើងទៅលើទ្វាររបងនោះរុញទៅរុញមក ក៏ត្រូវទ្វារដែកនោះរលំសង្កត់លើតែម្តង។ ទ្វារដែកនោះជារបស់ឈ្មោះ ឃុញ ប៊ុនធឿន អាយុ៣៣ឆ្នាំ ជាគ្រូបង្រៀន ។
សូមបញ្ជាក់ថា បងប្អូនបង្កើតទាំងបីនាក់បងប្អូននោះ ពេលនេះនៅសល់តែប្អូនស្រីពៅ អាយុ៨ឆ្នាំម្នាក់ប៉ុណ្ណោះ ។ ឪពុកម្តាយពួកគេបានធ្វើចំណាកស្រុកជាង៥ឆ្នាំមកហើយ និងបានផ្ញើពួកគេជាមួយឪពុក និងត្រូវជាជីតា ឈ្មោះ ភឹម អ៊ាន អាយុ៦០ឆ្នាំ ឱ្យមើលថែ ។
បន្ទាប់ពីបានទទួលព័ត៌មានដ៏រន្ធត់នេះ លោកជំទាវ ម៉ែន សំអន បានចាត់តំណាងឱ្យចូលរួមបុណ្យសពកុមារាទាំង២នាក់ កាលពីថ្ងៃទី៣១ឧសភា វេលាព្រឹកលោកជំទាវ ដួង វណ្ណា អ្នកតំណាងរាស្ត្រមណ្ឌលស្វាយរៀង តំណាងលោកជំទាវឧបនាយករដ្ឋមន្ត្រី ម៉ែន សំអន បាននាំយកថវិកានិងសម្ភារមួយចំនួនទៅចូលរួមបុណ្យសពដោយក្តីសង្វេគក្នុងចិត្តជាពន់ពេក ។ ឆ្លៀតក្នុងឱកាសនោះលោកជំទាវក៏បានចូលរួមរំលែកទុក្ខជាមួយក្រុមគ្រួសារសព ៕
ចែករំលែកព័តមាននេះ