លោក កឹម សុខា ចេញសារថា គ្មានហេតុផលណា ដែលលោកនាំបរទេសមកត្រួតត្រាខ្មែរឡើយ
រាជធានីភ្នំពេញ ៖ បន្ទាប់ពីស្ងាត់មួយរយៈពេលមក លោក កឹម សុខា បានចេញសារមួយ ធ្វើឲ្យមានការចាប់អារម្មណ៍ គឺលោកនិយាយថា គ្មានហេតុផលណាមួយ…
រាជធានីភ្នំពេញ ៖ បន្ទាប់ពីស្ងាត់មួយរយៈពេលមក លោក កឹម សុខា បានចេញសារមួយ ធ្វើឲ្យមានការចាប់អារម្មណ៍ គឺលោកនិយាយថា គ្មានហេតុផលណាមួយ ដែលនាំឲ្យលោកនាំបរទេសមកត្រួតត្រា ឬបំផ្លាញកម្ពុជានោះទេ ។
ការលើកឡើងរបស់អតីតមេបក្សប្រឆាំងរូបនេះ ធ្វើឡើងនាព្រឹកថ្ងៃទី៦ ខែធ្នូ ឆ្នាំ២០២២ ក្នុងជំនួបរវាងលោក ជាមួយឯកអគ្គរដ្ឋទូតនៃសាធារណរដ្ឋ ឆែក(ឆេកូ) ប្រចាំព្រះរាជាណាចក្រកម្ពុជា ដោយឯកអគ្គរដ្ឋទូត បានមកសម្តែងការគួរសម សួរសុខទុក្ខ និងផ្លាស់ប្តូរទស្សនៈគ្នា នៅគេហដ្ឋានលោក កឹម សុខា ក្នុងរាជធានីភ្នំពេញ ។
យោងតាមបណ្តាញសង្គមហ្វេសប៊ុក លោក កឹម សុខា បានសរសេថា សាធារណរដ្ឋឆែក គឺជាប្រទេសសមាជិកសហភាពអឺរ៉ុប ដែលផ្លាស់ប្តូរពីរបបសង្គមនិយម មកជាប្រទេសសេរី ដែលកាន់លទ្ធិប្រជាធិបតេយ្យវិញ និងមានការរីកចម្រើន មិនមែនតែសេដ្ឋកិច្ចទេ សិទ្ធិសេរីភាពរបស់ប្រជាពលរដ្ឋឆែក ក៏ប្រសើរជាងមុនច្រើនដែរ ។
លោកបញ្ជាក់ថា “ការពិត ខ្ញុំមិនមែនធ្លាប់បានទៅរៀនសូត្រ ស្វែងយល់ពីការរស់នៅរបស់ប្រជាពលរដ្ឋ និងការគ្រប់គ្រងរដ្ឋ តែពីប្រទេសសេរី ដូចជាសហរដ្ឋអាមេរិកនោះទេ គឺខ្ញុំក៏ធ្លាប់រៀនសូត្រ ស្វែងយល់ពីការរស់នៅ និងការដឹកនាំ ក្នុងប្រទេសសង្គមនិយម ដូចជានៅប្រទេសឆេកូស្លូវ៉ាគី ផងដែរ ។ ដូច្នេះហើយបានជាខ្ញុំយល់ថា សង្គមប្រជាធិបតេយ្យសេរី ដែលឲ្យតម្លៃ លើសិទ្ធិមនុស្ស ប្រសើរជាងរបបកុម្មុយនីស្តផ្តាច់ការ” ។
លោកលើកឡើងថា ឯការរស់នៅរបស់ខ្ញុំ ក្នុងប្រទេសកម្ពុជា ជារៀងរហូត ៧០ឆ្នាំមកនេះ ខ្ញុំក៏បានឆ្លងកាត់ និងស្គាល់ច្បាស់ អំពីការដឹកនាំ មេដឹកនាំសង្គមកម្ពុជា ប្រជាពលរដ្ឋខ្មែរជាច្រើនរបបនយោបាយ គួរសមដែរ ។ ជាពិសេសខ្ញុំ រស់នៅកម្ពុជា បានផ្សារភ្ជាប់ ស្វែងយល់ផ្ទាល់ជាមួយសង្គមខ្មែរជាច្រើនស្រទាប់ ទាំងទីក្រុង និងជនបទ អភិជន និងអ្នកក្រីក្រ មន្ត្រីធំ និងមន្ត្រីមូលដ្ឋាន ។ល។ ហេតុដូច្នេះហើយការសម្រេចចិត្ត ដែលជាចេតនាពិតរបស់ខ្ញុំ មិនក្លែងបន្លំ គឺមាតុភូមិកម្ពុជា (ទឹកដីខ្មែរ) ជាផ្ទះ ជាជម្រកជាដង្ហើម នៃជីវិតខ្ញុំ គឺខ្ញុំត្រូវតែ ថែរក្សា ការពារ ឲ្យបានសុខដុមរមនា គង់វង្ស។ គឺមិនមានហេតុផលអ្វីទាល់តែសោះ ដែលខ្ញុំនាំជាតិសាសន៍ណាមកត្រួតត្រា ឬបំផ្លិចបំផ្លាញ ឬឈ្លានពានប្រឆាំងនឹងព្រះរាជាណាចក្រកម្ពុជាឡើយ ។
លោកបន្ថែមថា ប្រជាពលរដ្ឋខ្មែរ ជាបងប្អូន ជាសាច់ឈាមរបស់ខ្ញុំ ទោះបីមាននិន្នាការនយោបាយ ឬសង្គមផ្សេងគ្នាក៏ដោយ គឺខ្ញុំត្រូវតែរួមសុខ រួមទុក្ខជាមួយគ្នា អត់ឱនឲ្យគ្នា មិនយកខ្មែរណាជាសត្រូវ មិនគុំគួនសងសឹកគ្នាជាដាច់ខាត។ គឺមិនមានហេតុផលអ្វី ដែលខ្ញុំនាំជាតិសាសន៍ដទៃមកបង្កើតឲ្យមានអំពើប្រទូសរ៉ាយ សង្គ្រាមបង្ហូរឈាមខ្មែរ ជាឈាមរបស់ខ្ញុំ ដែរសោះឡើយ ៕
ចែករំលែកព័តមាននេះ