ពេទ្យស្ទើរភ្លើង ៖ ត្រីមួយស្អុយ មិនត្រូវស្អុយមួយកន្ត្រកទេ
អត្ថាធិប្បាយ ៖ ក្រសួងសុខាភិបាល កាលពីយប់ថ្ងៃទី៣ ខែធ្នូ ឆ្នាំ២០២២ បានចេញសេចក្តីណែនាំ ស្ដីពី ការពង្រឹង ការផ្តល់សេវាសុខាភិបាល…
អត្ថាធិប្បាយ ៖ ក្រសួងសុខាភិបាល កាលពីយប់ថ្ងៃទី៣ ខែធ្នូ ឆ្នាំ២០២២ បានចេញសេចក្តីណែនាំ ស្ដីពី ការពង្រឹង ការផ្តល់សេវាសុខាភិបាល…
អត្ថាធិប្បាយ ៖ ក្រសួងសុខាភិបាល កាលពីយប់ថ្ងៃទី៣ ខែធ្នូ ឆ្នាំ២០២២ បានចេញសេចក្តីណែនាំ ស្ដីពី ការពង្រឹង ការផ្តល់សេវាសុខាភិបាល នៅតាមមូលដ្ឋានសុខាភិបាលឯកជន ។ សេចក្តីណែនាំនេះ មានបំណងឱ្យអ្នកធ្វើ អាជីវកម្ម ផ្តល់សេវាសុខាភិបាល យកចិត្តទុកដាក់គ្រប់គ្រង និងអនុវត្តអាជីវកម្មឱ្យបានត្រឹមត្រូវ តាមលក្ខណៈ បច្ចេកទេសសុខាភិបាល ។ សេចក្តីណែនាំនេះ ក៏មានគោលបំណងលើកកម្ពស់ស្តង់ដារសេវាសុខភាព ហើយដើម្បីពង្រឹង ការគោរពពេទ្យ ដែលមានជំនាញត្រឹមត្រូវ ពោលគឺកុំអោយដូចគេថា “ត្រីមួយស្អុយ គឺស្អុយមួយកន្ត្រក” ។
(វចនានុក្រមខ្មែរសម្តេចព្រះសង្ឃរាជ ជួន ណាត មិនមានពាក្យ «កន្ត្រក» ដូចអ្វីដែលយើងតែងតែនិយាយនោះឡើយ ពោលគឺមានតែពាក្យ «ត្រក» ប៉ុណ្ណោះ។ ជាលត្បាញដោយបន្ទោះឫស្សី, ផ្ដៅ ជាដើមមានខ្សែចងយួរ, សម្រាប់ដាក់ត្រីតូចៗ និងបន្លែជាដើម)
ក្នុងសេចក្តីណែនាំរបស់ក្រសួងសុខាភិបាល បានក្រើនរំលឹកដល់អ្នកគ្រប់គ្រង និងអ្នកប្រកបវិជ្ជាជីវៈ វិស័យសុខាភិបាលឯកជនទាំងអស់ មានដូចជា បន្ទប់ពិគ្រោះថែទាំជំងឺ មន្ទីរព្យាបាលជំងឺ ជាពិសេស មន្ទីរ ពហុព្យាបាល និងមន្ទីរសម្ភព-រោគស្ត្រី ។ល។ ចាំបាច់ត្រូវខិតខំគ្រប់គ្រងដំណើរការ របស់ខ្លួនឱ្យបាន ល្អប្រសើរត្រឹម ត្រូវតាមលក្ខណៈបច្ចេកទេសសុខាភិបាល ត្រូវតែគោរពអនុវត្តតាមតួនាទី ភារកិច្ច និងក្រមសីលធម៌វិជ្ជាជីវៈ រៀងៗ ខ្លួន ដោយអនុលោមតាមច្បាប់ជាធរមាន ។
ក្រសួងសុខាភិបាល បញ្ជាក់ថា អ្នកដែលប្រព្រឹត្តខុសឆ្គងពីវិជ្ជាជីវៈ ឬមានការរធ្វេសប្រហែសលើការងារគ្រប់គ្រងមូលដ្ឋានសុខាភិបាលឯកជនរបស់ខ្លួន ឬធ្វើឱ្យមានកំហុសបច្ចេកទេសធ្ងន់ធ្ងរណាមួយបន្ថែម លើការដាក់ វិន័យ នៃគណៈវិជ្ជាជីវៈនីមួយៗ នឹងត្រូវប្រឈមទៅនឹងច្បាប់ទៅតាមសណ្ឋានទម្ងន់ទោស ដែលមានចែងនៅ ក្នុងច្បាប់ទាំងនោះ ។
សេចក្តីណែនាំជាថ្មីរបស់ក្រសួងសុខាភិបាលដូច្នេះ បានធ្វើឡើងភ្លាមៗ ក្រោយមានករណីស្ត្រីអ្នកជំងឺម្នាក់ បានចូល មកសម្រាក នៅចនៅផ្លូវជាតិលេខ៣ ក្នុងស្រុកគងពិសី ខេត្តកំពង់ស្ពឺ ។ ស្ត្រីរងគ្រោះ បានទៅមន្ទីរ ពេទ្យឯកជននេះ ដើម្បីរំលូតកូន អាយុ១៨សប្តាហ៍ ដែលបានស្លាប់ក្នុងស្បូន ។
ក្រុមគ្រូពេទ្យរបស់ពេទ្យឯកជននោះ បានពិនិត្យព្យាបាលដោយរំលូតយកកូន ដែលស្លាប់ក្នុងផ្ទៃចេញ និងបន្តសម្រាកនៅគ្លីនិកនោះ រយៈពេលមួយយប់។ ក្រោយមក ស្ត្រីអ្នកជំងឺ បានមកគ្លីនិកដដែលម្ដងទៀត ដោយរោគសញ្ញាឈឺពោះខ្លាំង នៅផ្នែកខាងក្រោម ហើយគ្រូពេទ្យ ក៏បានសម្អាតស្បូនឡើងវិញ។ ដោយអាការៈ ធ្ងន់ធ្ងរ គ្លីនិកក៏បានបញ្ជូនស្ត្រីអ្នកជំងឺ ទៅព្យាបាលបន្តនៅភ្នំពេញ។ មានការលើកឡើងថា ពេទ្យឯកជនោះ បានកាត់ពោះវៀនរបស់ស្ត្រីរងគ្រោះ ដោយច្រឡំថា ជាទងសុក ។
តាមរយៈការពិនិត្យ និងស្រាវជ្រាវ នាថ្ងៃទី២៩ ខែវិច្ឆិកា ឆ្នាំ២០២២ ក្រសួងសុខាភិបាល បានសម្រេចបិទជាបណ្តោះអាសន្នមន្ទីរសម្រាកព្យាបាល ដើមអង្ក្រង ដើម្បីបន្តនីតិវិធីស្រាវជ្រាវតាមច្បាប់ជាធរមាននូវហេតុការណ៍ ដែលបានកើតឡើង គួរឱ្យសោកស្តាយជាទីបំផុតនេះ។ ក្រសួង ក៏បានតម្រូវឱ្យមន្ទីរសម្រាកព្យាបាលដើមអង្ក្រង ទទួលខុសត្រូវចំពោះមុខច្បាប់ជាធរមាន លើបាតុភាព ដែលបានកើតមានឡើង ដែលបណ្ដាល មកពីការធ្វេស ប្រហែសរបស់ខ្លួន ។
មួយថ្ងៃក្រោយមក គឺនៅថ្ងៃទី៣០ ខែវិច្ឆិកា ឆ្នាំ២០២២ ក្រសួងសុខាភិបាល បានប្រកាសតម្រូវឱ្យមន្ទីរពេទ្យឯកជន ដើមអង្ក្រង នៅខេត្តកំពង់ស្ពឺ ទទួលខុសត្រូវចំពោះមុខច្បាប់ ចំពោះការរំលូតកូនស្លាប់ក្នុងផ្ទៃ។ រីឯឆ្មប ដែលបាន រំលូតកូននោះ ត្រូវផ្អាកការងារ ២ឆ្នាំ។
ដោយឡែក ស្ត្រីរងគ្រោះ ត្រូវបានបញ្ជូនទៅសម្រាកព្យាបាល និងជួយសង្គ្រោះអាយុជីវិត ដោយយកចិត្តទុកដាក់ បំផុតពីក្រុមគ្រូពេទ្យ នៅមន្ទីរពេទ្យកាល់ម៉ែត្រ និងដោយមានការយកចិត្តទុកដាក់ដ៏ខ្ពង់ខ្ពស់ ជួយគាំដល់ ការព្យាបាលទាំងស្រុងរបស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា។
ករណីគ្រូពេទ្យ ពិនិត្យព្យាបាលអ្នកជំងឺ ហើយមានបញ្ហាដូច្នេះ នៅក្នុងប្រទេសយើង បានកើតឡើងជារឿយៗ មិនថា នៅពេលរដ្ឋ ឬនៅពេទ្យឯកជននោះទេ។ ម្យ៉ាងមុខជំនាញពេទ្យ ជាកាំបិតមុខពីរ។ ពោលគឺបើជួយពិនិត្យព្យាបាលអ្នកជំងឺ បានជាសះស្បើយ នោះពេទ្យ បានទទួលនូវពាក្យអរគុណ និងរួចខ្លួន។ តែបើថ្លោះធ្លោយ ការពិនិត្យព្យាបាលអ្នកជំងឺ ហើយបណ្តាលឱ្យអ្នកជំងឺ មិនជា និងរហូតស្លាប់ នោះគ្រូពេទ្យច្បាស់ជាត្រូវទទួលខុសត្រូវ ដោយត្រូវបង់ប្រាក់ បិទមន្ទីរពេទ្យ និងអាចត្រូវចាប់ខ្លួនថែមទៀត។
និយាយដូច្នេះ មិនមែនថា ពេទ្យជាអ្នកជួយសង្គ្រោះជីវិតអ្នកជំងឺ បែរក្លាយជាអ្នករងគ្រោះនោះឡើយ។ ពោលគឺបើពេទ្យ ប្រកបដោយវិជ្ជាជីវៈ ចេះជំនាញត្រឹមត្រូវ ហើយមានការទទួលខុសត្រូវពិតប្រាកដ នោះគឺពេទ្យនោះឯង មិនមានបញ្ហាអ្វីកើតឡើងលើអ្នកជំងឺ និងលើខ្លួនគ្រូពេទ្យនោះទេ។ ផ្ទុយទៅវិញ បើពេទ្យចេះស្ទើរៗ មិនមាន ជំនាញច្បាស់លាស់ ហើយចេះតែពិនិត្យព្យាបាលគេ ដោយចង់បានតែលុយគេ នោះចុងក្រោយ ពេទ្យនោះឯង នឹងត្រូវទទួលខុសត្រូវ ព្រោះតែចេះលំៗ បែរជាយល់ច្រលំថា ពោះវៀន ជាទងសុកដូច្នេះ គឺជារឿងមួយ ដែលមិន ត្រូវកើតឡើងទាល់តែសោះឡើយ។
ដើម្បីកុំឱ្យរឿងហេតុដដែលៗនេះ កើតឡើងក្នុងសង្គមយើងតទៅទៀត គឺអ្នកបើកពេទ្យឯកជនទាំងឡាយ ត្រូវតែ ជាក្រុមគ្រូពេទ្យ ដែលមានជំនាញឯកទេសច្បាស់លាស់ និងប្រកបដោយក្រមសីលធម៌ វិជ្ជាជីវៈពេទ្យត្រឹមត្រូវ ជាជាងបើកពេទ្យ ពិនិត្យព្យាបាល ចង់តែបានលុយពីអ្នកជំងឺ។ ម្យ៉ាង បើសិនជាមើលទៅអាការៈអ្នកជំងឺធ្ងន់ធ្ងរ មិនគួរពន្យារពេល ឬក៏ទទួលពិនិត្យព្យាបាលនោះទេ ត្រូវតែបញ្ជូនបន្តទៅកាន់មន្ទីរពេទ្យធំៗ ឬពេទ្យរដ្ឋ ដែលមានឧបករណ៍សម្ភារៈគ្រប់គ្រាន់ ដើម្បីជួយសង្គ្រោះអ្នកជំងឺ។ ធ្វើដូច្នេះដើម្បីជៀសវាងបញ្ហានៅពេទ្យ របស់ខ្លួន ផង និងក៏ដើម្បីអាយុជីវិតរបស់អ្នកជំងឺផង។
រីឯអ្នកជំងឺវិញ ក៏ត្រូវតែស្វែងរកពេទ្យ ដែលមានជំនាញច្បាស់លាស់ ដើម្បីពិនិត្យព្យាបាល។ នៅត្រឹមខេត្តកំពង់ស្ពឺ គឺមិនឆ្ងាយពីភ្នំពេញឯណា។ ចេញពីផ្ទះ មកដល់ពេទ្យជំនាញ ពិសេសពេទ្យរដ្ឋធំៗ នៅភ្នំពេញ ដើម្បីពិនិត្យព្យាបាលជំងឺ ក៏មិនយឺតពេលឡើយ ដោយចំណាយពេលត្រឹមតែ ១ ឬ ២ម៉ោង ក្នុងការធ្វើដំណើរប៉ុណ្ណោះ ពីផ្ទះ មកមន្ទីរពេទ្យ នៅភ្នំពេញ។ ករណីនៅខេត្តកំពង់ស្ពឺនេះ មិនបានធូរស្បើយពីជំងឺហើយ ស្ទើរតែស្លាប់ខ្លួនឯង ថែមទៀត ដោយសារតែពេទ្យឆ្មប នៅមន្ទីរពេទ្យឯកជន។
ដូច្នេះប្រជាពលរដ្ឋអ្នកជំងឺ និងក្រុមគ្រួសារ ត្រូវតែស្វះស្វែងដោយខ្លួនឯង ដោយត្រូវរកពេទ្យជំនាញ គួរឱ្យទុក ចិត្តបាន។ រីឯពេទ្យឯកជនវិញ ក៏កុំចង់បានលុយពីអ្នកជំងឺ រហូតដល់នាំទុក្ខដាក់ខ្លួនដូច្នេះ។ ចំណែកក្រសួង សុខាភិបាល តាមរយៈមន្ទីរសុខាភិបាលខេត្ត និងអាជ្ញាធរខេត្ត រួមទាំងភាគីពាក់ព័ន្ធ មុននឹងចេញច្បាប់ឱ្យបើកពេទ្យ ឯកជន ក៏ត្រូវតែត្រួតពិនិត្យ លើទីតាំង ឧបករណ៍សម្ភារៈ ពិសេសគ្រូពេទ្យជំនាញ ក្នុងពេទ្យនោះ ពិតជាមាន ជំនាញច្បាស់លាស់ និងមានឧបករណ៍សម្ភារៈគ្រប់គ្រាន់ ដើម្បីពិនិត្យព្យាបាលអ្នកជំងឺតាមជំនាញរបស់ខ្លួនពិតប្រាកដ ឬទេ ?
សូមកុំចេះតែស៊ីញ៉េ ឱ្យបើកពេទ្យ ដោយមិនបានពិនិត្យអ្វីសោះ។ សព្វថ្ងៃនេះ គ្រាន់តែមានផ្ទះ ១ល្វែង ឬក៏បន្ទប់ជួលមួយ ក៏អាចបើកពេទ្យបានដែរ។ ករណីនេះ មិនគួរសោះឡើយ ព្រោះសូម្បីតែចំណតយានយន្ត ក៏មិនទាំងមានផង និយាយអ្វីដល់ការជួយសង្គ្រោះអ្នកជំងឺនោះ ៕
ចែករំលែកព័តមាននេះ