រាជធានីភ្នំពេញ ៖ ជារឿងមួយដ៏គួរអោយចាប់អារម្មណ៍ និងភ្ញាក់ផ្អើលខ្លាំងមែនទែន នៅសុខៗអ្នកលក់អនឡាញរូបស្រស់ ឡុង ម៉ានីន ( long Manin ) ដែលតែងតែបង្ហាញភាពស្និទ្ធស្នាលផ្អែមល្ហែម ស្វីតៗយ៉ាងស្អិតរមួត ជាមួយតារាចម្រៀងប្រុសមានមន្តស្នេហ៍ លោក ថុល សុភិទិ តាមរយៈរូបភាព វីដេអូ យ៉ាងច្រើនហូរហែ ដែលអ្នកនាងតែងតែបង្ហោះជារឿយៗនៅលើបណ្ដាញសង្គមនានា ដោយភ្ជាប់ជាមួយសំណេរយ៉ាងចាក់ដោតបេះដូងនោះ ស្រាប់តែប្រកាសជាសារធារណៈនៅលើបណ្ដាញសង្គម រឿងចែកផ្លូវគ្នាជាមួយតារាចម្រៀងប្រុសរូបនេះ ក្រោយទទួលរងការរិះគន់ដូចទឹកបាក់ទំនប់ពីសំណាក់អ្នកនិយមប្រើប្រាស់បណ្ដាញសង្គម។
ជាការពិតណាស់ រាល់ពេលបង្ហោះរូបភាពស្វីតៗ និងស្និទ្ធស្នាលជាមួយគ្នា មិនថាលើបណ្ដាញសង្គម Facebook Tik Tok ឬ Instargram ឡើយ ស្រីស្អាតមេម៉ាយកូន១ ឡុង ម៉ានីន និងតារាច្រៀងប្រុស ថុល សុភិទិ ដែលត្រូវជាសង្សារនឹងគ្នានោះ តែងតែទទួលរងការរិះគន់ឥតឈប់ឈរពីសំណាក់អ្នកនិយមប្រើប្រាស់បណ្ដាញសង្គមមួយចំនួនថា មិនសាកសមនឹងគ្នា។ យ៉ាងណាក៏ដោយ ក្នុងនោះក៏មានអ្នកគាំទ្រជាច្រើនបង្ហាញការពេញចិត្ត និងចង់អោយអ្នកទាំង២ក្លាយជាគូស្នេហ៍ពិតប្រាកដ និងច្បាស់លាស់ជាមួយគ្នាទៀតផង។
យ៉ាងណាមិញ បើក្រឡេកមកមើល អ្នកប្រើប្រាស់បណ្ដាញសង្គមមួយចំនួន បានបញ្ចេញមតិរិះគន់យ៉ាងចាស់ដៃ អមជាមួយពាក្យពេចន៍ស្ទើរតែមិនអាចទទួលយកបានថា «លោក ថុល សុភិទិ មិនគួរយកខ្លួនមកខូចឈ្មោះ និងធ្លាក់ប្រជាប្រិយភាព ព្រោះតែអ្នកនាង ឡុង ម៉ានីន ឡើយ»។ រីឯខ្លះក៏និយាយថា «លោក ថុល សុភិទិ ជាតារាចម្រៀងដ៏ល្បីឈ្មោះ និងទើបតែរះឡើង មិនគួរមកស្រលាញ់អ្នកនាង ឡុង ម៉ានីន ដែលជាស្ត្រីមេម៉ាយកូន១ ហើយបែកស្លុយជាដើម»។ សូមបញ្ជាក់ថា ក្នុងពាក្យសម្ដីដែលនិយាយមកនោះ គឺធ្ងន់ៗ ហាក់មើលងា.យ និងប្រមា.ថអ្នកនាង ឡុង ម៉ានីន ខ្លាំងៗតែម្ដង ដែលពាក្យទាំងនោះ យើងមិនអាចលើកយកមកនិយាយបានឡើយ។
ដោយឡែក ក្រោយទទួលរងការរិះគន់រហូតទទួលយកលែងបាន ស្រាប់តែនាថ្ងៃទី០៤ ខែធ្នូ ឆ្នាំ២០២២ ម្សិលមិញនេះ អ្នកលក់អនឡាញដ៏ល្បីឈ្មោះ អ្នកនាង ឡុង ម៉ានីន បានប្រកាសអំពីការចែកផ្លូវគ្នាជាមួយលោក ថុល សុភិទិ ដោយបង្ហោះសារមួយឃ្លាទាំងក្ដីឈឺចាប់ថា «ចាប់ផ្តើមពីមនុស្សដែលមិនស្គាល់គ្នាសោះ ចុងក្រោយក៏ក្លាយជាអ្នកដទៃ»។
ស្រីស្រស់ ម៉ានីន បានបង្ហោះសារបន្តទៀតថា «លែងបានទើសពួកខ្ញុំទៀតហើយណា នៅច្រើនទៀតតែខ្ជិលផុស ពាក្យធ្ងន់ៗពេកសម្រាប់ខ្ញុំ ខ្ញុំមិនចង់អោយគាត់មានឈ្មោះមិនល្អដោយសារមានសង្សារដូចខ្ញុំទេ ទើបសម្រេចចិត្តចាកចេញ មិនចង់អោយប៉ះពាល់ក្តីស្រមៃគាត់ ស្រឡាញ់ខំតស៊ូមកយូរហើយ»។
បើក្រឡេកមកចាប់អារម្មណ៍តារាចម្រៀងប្រុស លោក ថុល សុភិទិ ឯណេះវិញ ក្នុងថ្ងៃតែមួយលោកក៏បានបង្ហោះបទចម្រៀងមួយបទមានចំណងជើងថា «បាត់បង់អ្នក» ដោយអត្ថន័យបទនេះ ហាក់ឈឺចាប់យ៉ាងខ្លាំង ខណៈអ្នកនាង ឡុង ម៉ានីន ក៏បានធ្វើការស៊ែរបទចម្រៀងនោះ ដោយភ្ជាប់ជាមួយសំណេរមួយឃ្លាថា «បញ្ហាដែលយើងជួប គ្មានអ្នកណាដឹងច្បាស់ជាងពួកយើងទេ បែបនឹងទៅល្អហើយ»។
ទន្ទឹមនឹងទទួលរងការរិះគន់ជាហូរហែឥតឈប់ឈរ រហូតឈានដល់ការប្រកាសចែកផ្លូវគ្នានេះ មហាជនអ្នកនិយមប្រើប្រាស់បណ្ដាញសង្គម ក៏ដូចជាអ្នកគាំទ្រមួយចំនួនធំ ក៏បានបង្ហាញការពេញចិត្ត និងចង់អោយអ្នកទាំងពីរក្លាយជាគូស្នេហ៍ច្បាស់លាស់ផងដែរ។
មតិជាច្រើនបានលើកឡើងថា «សិទ្ធិរបស់ពួកគាត់ទាំងពីរនាក់ទេ គាត់ស្រលាញ់គ្នាជារឿងរបស់ពួកគាត់ ណាមួយបង ម៉ានីន ក៏ជាមនុស្សស្រីដែលល្អ ចេះរកស៊ី មានភាពតស៊ូ សាកសមណាស់ដែល បងភិទិ ស្រលាញ់ មិនដូចអ្នករិះគន់គេនឹងស្រួលមិនស្រួលរកអង្ករដាំបាយហូបមួយថ្ងៃ ៣ ពេល និងបានផង»។ ខ្លះទៀតលើកឡើងថា «ក្នុងនាមខ្ញុំជាអ្នកគាំទ្របងទាំងពីរនាក់ ខ្ញុំពេញចិត្ត និងស្រលាញ់ទ្វេដង ដែលឃើញបងទាំងពីរអ្នកស្រលាញ់គ្នា»។ ជាមួយគ្នា ក៏នៅមានមតិល្អជាច្រើនទៀត ដែលយើងមិនអាចលើកយកមកនិយាយរៀបរាប់ និងជម្រាបជូនអស់នោះឡើយ។
គួរបញ្ជាក់ផងដែរថា កាលពីកន្លងទៅថ្មីៗនេះ តាមរយៈបទសម្ភាសន៍ជាមួយសារព័ត៌មានក្នុងស្រុក លោក ថុល សុភិទិ បានបដិសេធ និងបញ្ជាក់ច្បាស់ៗថា បច្ចុប្បន្នលោកគ្មានស្នេហា ឬសង្សារឡើយ។ តារាចម្រៀងប្រុសរូបនេះ ប្រាប់ពីមូលហេតុថា ទីមួយ ព្រោះលោកនៅក្មេង ចាំអាយុច្រើនជាងនេះបន្តិច ចាំគិតគូររឿងគូអនាគតក៏មិនទាន់ហួសពេលដែរ មួយទៀតលោកចង់ផ្ដោតលើការងារសិល្បៈដែលលោកស្រលាញ់អោយបានច្រើន និងសម្រេចបាននៅក្ដីស្រមៃរបស់លោក។
តារាចម្រៀងប្រុសរូបនេះបា នប្រាប់បន្តថា ចំពោះគ្រួសារលោកមិនបានស្អប់ខ្ពើម ឬរើសអើង និងមិនបានហាមឃាត់លោកមិនអោយស្រលាញ់ស្ត្រីមេម៉ាយនោះឡើយ ហើយចំពោះលោកផ្ទាល់ក៏ដូចគ្នា តែគ្រាន់ថា រវាងលោក និងនារីដែលជាស្ត្រីមេម៉ាយនោះ មិនអាចក្លាយជាការពិតបានឡើយ។ នេះជាការបញ្ជាក់របស់លោក ថុល សុភិទិ ជាមួយបទសម្ភាសន៍របស់សារព័ត៌មានក្នុងស្រុកកាលពីកន្លងទៅនេះ ៕
https://www.tiktok.com/@phitiknin_fc/video/7173336831277141274?is_from_webapp=1&sender_device=pc&web_id=7074845722890782210
https://www.tiktok.com/@phitiknin_fc/video/7173316823180512538?is_from_webapp=1&sender_device=pc&web_id=7074845722890782210
https://www.tiktok.com/@phitiknin_fc/video/7166949545534917915?is_from_webapp=1&sender_device=pc&web_id=7074845722890782210
ចែករំលែកព័តមាននេះ