រាជធានីភ្នំពេញ ៖ ដើម្បីឲ្យប្រព័ន្ធសុវត្ថិភាពធនាគារកាន់តែមានទំនុកចិត្តពីអតិថិជន ធនាគារអេស៊ីលីដា ភីអិលស៊ី បានប្រកាសប្តូរប័ណ្ណអេធីអឹមដែលអតិថិជនកំពុងប្រើប្រាស់ ទៅជាប័ណ្ណអេធីអឹមEMV ដែលមានសុវត្ថិភាពកាន់តែខ្ពស់ ។
រាជធានីភ្នំពេញ ៖ ដើម្បីឲ្យប្រព័ន្ធសុវត្ថិភាពធនាគារកាន់តែមានទំនុកចិត្តពីអតិថិជន ធនាគារអេស៊ីលីដា ភីអិលស៊ី បានប្រកាសប្តូរប័ណ្ណអេធីអឹមដែលអតិថិជនកំពុងប្រើប្រាស់ ទៅជាប័ណ្ណអេធីអឹមEMV ដែលមានសុវត្ថិភាពកាន់តែខ្ពស់ ។
ក្នុងសន្និសីទសារព័ត៌មានដែលធ្វើឡើងកាលពីចុងសប្ដាហ៍មុន លោកបណ្ឌិត អិុន ចាន់នី ប្រធាននាយកប្រតិបត្តិធនាគារអេស៊ីលីដា បានមានប្រសាសន៍ថា កាតអេធីអឹមដែលអតិថិជនកំពុងប្រើប្រាស់សព្វថ្ងៃ វាមានសុវត្ថិភាពខ្ពស់ហើយ ប៉ុន្តែវាត្រូវការតាមដានត្រួតពិនិត្យដោយមនុស្សពីការលួចបន្លំទិន្នន័យនានា ហើយកាតចាស់នោះ ក៏ត្រូវការមានឧបករណ៍ជំនួយដើម្បីតាមដានផងដែរ ។ សម្រាប់កាតអេធីអឹមEMV ថ្មីរបស់ធនាគារអេស៊ីលីដាដែលនឹងប្រកាសឲ្យអតិថិជនប្រើប្រាស់នោះ វាកាន់តែមានសុវត្ថិភាពខ្ពស់ថែមទៀត ជាពិសេសវាមិនចាំបាច់ប្រើធនធានមនុស្សដើម្បីតាមដាននោះទេ គឺវាមានប្រព័ន្ធបច្ចេកវិទ្យាសម្រាប់តាមដានពីការលួចបន្លំណាមួយស្រាប់ ។
លោកថ្លែងថា ៖ « ដោយសារតែបច្ចេកវិទ្យាកាន់តែរីកចម្រើន ទើបយើងយកបច្ចេកវិទ្យានោះមកប្រើប្រាស់ជំនួសមនុស្សវិញ ហើយយកធនធានមនុស្សរបស់យើង ទៅធ្វើអ្វីផ្សេងដែលចាំបាច់វិញ ទើបអេស៊ីលីដាសម្រេចយកប័ណ្ណថ្មីមកជំនួសប័ណ្ណចាស់ដែលកំពុងប្រើនេះ » ។
លោកបណ្ឌិតបន្តថា កាតថ្មីដែលធនាគារបោះពុម្ពផ្ដល់ជូនអតិថិជននៅពេលនេះ មានចំនួន៨០ម៉ឺនសន្លឹក ហើយប្រកាសជូនអតិថិជនមកកាន់ការិយាល័យណាមួយរបស់ធនាគារអេស៊ីលីដា ដើម្បីទទួលបានប័ណ្ណថ្មី យកទៅប្រើប្រាស់ ។ ចំណែកប័ណ្ណចាស់របស់អេស៊ីលីដា នឹងប្រកាសឲ្យឈប់ប្រើប្រាស់នៅពេលដែលអតិថិជនរបស់ខ្លួនបានមកប្តូរយកប័ណ្ណថ្មីគ្រប់ចំនួន និងគ្រប់គ្នាហើយ ។
លោកបន្ត ៖ « ប័ណ្ណអេធីអឹម EMV របស់ធនាគារអេស៊ីលីដាទាំង៨០ម៉ឺនប័ណ្ណនោះ អេស៊ីលីដា បានចំណាយជាង១លានដុល្លារអាមេរិកហើយអតិថិជនចាស់របស់ធនាគារមកប្តូរយកថ្មីមិនមានការបង់ប្រាក់នោះទេ ដោយរក្សាទិន្នន័យចាស់នោះដដែល » ។
លោកបន្ថែមថា កាលពី៥ឆ្នាំមុន ប្រាក់ដែលអតិថិជនដកចេញពីធនាគារអេស៊ីលីដា មានចំនួនតែ១លានដុល្លារអាមេរិកប៉ុណ្ណោះ តែសព្វថ្ងៃនេះ ប្រាក់ដែលដកចេញពីអេធីអឹមរបស់ធនាគារអេស៊ីលីដា មានចំនួន៥លានដុល្លារអាមេរិក និងមានជាង៤ម៉ឺនប្រតិបត្តិការ ដូចនេះហើយទើបធនាគារអេស៊ីលីដា បានពង្រឹងគុណភាពសេវាកម្មអេធីអឹមឲ្យកាន់តែខ្លាំង ដើម្បីផ្ដល់ទំនុកចិត្តដល់អតិថិជនរបស់ខ្លួន ។
លោកបញ្ជាក់ថា ការផ្លាស់ប្តូរប័ណ្ណចាស់ពី Magnetic stripe card ទៅជា EMV chip card ក៏ទន្ទឹមនឹងពេលដែលធនាគារអេស៊ីលីដាប្តូរនិមិត្តសញ្ញារបស់ខ្លួនដែរ ដូចនេះការផ្លាស់ប្តូរនេះ គឺបានពីរប្រភេទ ទីមួយគឺបន្ថែមប្រព័ន្ធសុវត្ថិភាពជូនអតិថិជន និងមួយទៀតគឺប្តូរនិមិត្តសញ្ញារបស់ខ្លួន ដូចនេះអតិថិជនមិនតម្រូវឱ្យបង់ថ្លៃសេវាទេ ហើយបើករណីដែលប័ណ្ណអតិថិជនត្រូវរាយការណ៍មកធនាគារភ្លាម ដើម្បីឃាត់ទិន្នន័យនោះមិនឲ្យប្រើប្រាស់បាន តែទោះជាយ៉ាងណាអ្នករើសបានប័ណ្ណនោះ ក៏មិនអាចប្រើប្រាស់បានដែរ ព្រោះនៅក្នុងប័ណ្ណនីមួយៗសុទ្ធតែមានលេខកូដសម្ងាត់ ដើម្បីការពារ ។
ចែករំលែកព័តមាននេះ