ខេត្តមណ្ឌលគិរី ៖ ទីបំផុត សហគមន៍សមូហភាពជនជាតិដើមភាគតិចព្នងរស់នៅភូមិពូរ៉ាង សម្រេចធ្វើញ្ញតិស្នើសុំកិច្ចអន្តរាគមន៍ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ដើម្បីលុបចោលការធ្វើអនុបយោគពីសម្បត្តិសាធារណៈរបស់រដ្ឋ មកជាសម្បត្តិឯកជនរបស់រដ្ឋផ្តល់កម្មសិទ្ធិជូនបុគ្គលឯកជន និងអន្តរាគមន៍បញ្ឈប់សកម្មភាពរបស់ក្រុមហ៊ុន ជឹង ធានសេង ក្រោយពួកគាត់ខិតខំតស៊ូមតិនៅអាជ្ញាធរមូលដ្ឋានគ្មានប្រសិទ្ធិភាព ។
យោងតាមលិខិតដែលកោះសន្តិភាពទទួលបាននាថ្ងៃទី០១ ធ្នូ ២០២២ មានខ្លឹមសារថា យើងខ្ញុំទាំងអស់គ្នាដែលជាសមាជិកសហគមន៍សមូហភាពជនជាតិដើមភាគតិចព្នង ភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី ដែលមានសមាជិកសហគមន៍សរុបចំនួន១២៩គ្រួសារ ស្មើនឹងប្រជាពលរដ្ឋសរុបចំនួន៥០០នាក់ ស្នើសុំយ៉ាងទទូចចំពោះសម្ដេចអគ្គមហាសេនាបតីតេជោ មេត្តាជួយអន្តរាគមន៍ ជាមួយអាជ្ញាធរខេត្តមណ្ឌលគិរី ដើម្បីពិនិត្យ និង អន្តរាគមន៍លើទំហំដី២៥៥ហិកតា ដែលបានប្រគល់ជូនឲ្យក្រុមហ៊ុន ជឹង ធានសេង ដើម្បីប្រគល់ជូន សហគមន៍ជនជាតិដើមភាគតិចភូមិពូរ៉ាង បន្តចុះដីសហគមន៍សមូហភាពវិញ។
ស្របតាមគោលជំហររបស់សហគមន៍ ដែលបានធានាអះអាងដូចមានក្នុងសំណុំឯកសារចុះបញ្ជី និងទទួលស្គាល់ដោយ ក្រសួងអភិវឌ្ឍន៍ជនបទ ក្រសួងមហាផ្ទៃ និងជាពិសេសស្របតាមផែនទីបឋមជាក់ស្តែងរបស់សហគម ន៍ដែលមានទំហំសរុប ៧៦១.៣៩ហិកតា។
លិខិតដដែលបន្តថា យោងមូលហេតុនេះ សូមសម្តេចអគ្គមហាសេនាបតីតេជោ មេត្តាពិនិត្យឡើង វិញ និងលុបចោលការធ្វើអនុបយោគពីសម្បត្តិសាធារណៈរបស់រដ្ឋ មកជាសម្បត្តិឯកជនរបស់រដ្ឋ ផ្តល់កម្មសិទ្ធិជួនបុគ្គលឯកជន អន្តរាគមន៍បញ្ឈប់សកម្មភាពរបស់ ក្រុមហ៊ុន ជឹង ធានសេង ផ្អាកដំណើរការ អភិវឌ្ឍន៍ឬដំណើរការទេសចរណ៍លើទំហំដី ២៥៥ ហិកតាជាបន្ទាន់ ដោយរងចាំការដោះស្រាយជាមុនសិន ។
ពីព្រោះសកម្មភាពរបស់ក្រុមហ៊ុនបានធ្វើឲ្យប៉ះពាល់ដល់ដីសហគមន៍ជនជាតិដើមភាគតិច ដែលបានកំពុងប្រត្តិបត្តិជំនឿ ព្រៃភ្នំអារក្សចំនួន ៣កន្លែង ដីតំណមចំនួន ១កន្លែង ដីកប់សពចំនួនពីរកន្លែង និងដីប្រើប្រាស់ប្រកបមុខរបរជីវភាពរស់នៅប្រចាំថ្ងៃ ដូចជាចំការដាំស្រូវ និងដំណាំហូបផ្លែរបស់ សមាជិក ៤២ គ្រួសារ ដីបំរុងទុកដូរវេនដំណាំ(ចំការវិលជុំ) និងទីកន្លែងសម្រាប់ទាញយកអនុផលព្រៃឈើនានា ព្រមទាំងកន្លែងចិញ្ចឹមសត្វ ដើម្បីផ្គត់ផ្គង់សេដ្ឋកិច្ចគ្រួសារប្រចាំថ្ងៃ។
យោងលើឯកសារដែលមានការទទួលស្គាល់តាមផ្លូវច្បាប់ ដោយក្រសួងអភិវឌ្ឍន៍ជនបទ ក្រសួងមហាផ្ទៃ វិធានការការពារបណ្តោះអាសន្នរបស់គណៈអភិបាលខេត្តមណ្ឌលគិរី និងឆន្ទះសមូហភាពដែលសហគមន៍យើងខ្ញុំមាន យើងខ្ញុំសង្ឃឹមយ៉ាងមុតមាំថាសម្តេច និងជួយអន្តរាគមន៍បានទាន់ ពេលវេលា ដើម្បីដោះស្រាយ និងប្រគល់ដឺជូនសហគមន៍យើងខ្ញុំវិញ។ ជុំវិញករណីដីខាងលើនេះ កន្លងមកគេបានប្រទះឃើញមានមន្ត្រីជំនាញ អាជ្ញាធរស្រុក-ខេត្តបានចុះហ៊ុមព័ន្ឋ និងដកហូតដីនេះពីបុគ្គលឈ្មោះ សេង សុវណ្ណារ៉ា អតីតរដ្ឋលេខាធិការក្រសួងយុត្តិធម៏ដើម្បីប្រគល់ជូនរដ្ឋវិញកាលពីអំឡុងឆ្នាំ២០២១។
ក្រោយចុះដកហូតដីចំការស្រល់ដែលមានទំហំប្រមាណជិត៥០០ហិកតា ដំណើរការនិតិវិធីច្បាប់ ត្រូវបានអនុវត្តន៏ដោយអ្នកពាក់ព័ន្ឋត្រូវចាប់ដាក់ពន្ឋនាគារ។ អ្នកភូមិសប្បាយចិត្តមិនទាន់បានប៉ុន្មានដង្ហើមចង្រឹតផង ស្រាប់តែមាន ស ជ ណ មួយចេញថ្ងៃទី២៤ មិនា ២០២២ សម្រេចកាត់ខ្វៀល ដីទំហំ២៥៥ហិកតា ដែលទើបដកហូតខាងលើប្រគល់ទៅឈ្មោះ ជឹង ធានសេង វិញដែលបង្កឲ្យអ្នកភូមិត្រូវខកចិត្តម្តងទៀត។
បើតាមក្រុមអ្នករកស៊ីដីធ្លីក្នុងខេត្តមណ្ឌលគិរីបានបង្ហើមថា ដីក្នុងតំបន់ដែលត្រូវកាត់ខ្វៀលនោះបើលក់តាមទីផ្សារបច្ចុប្បន្នក្នុងមួយហិកតាបានថ្លៃមិនក្រោម៥ម៉ឺនដុល្លារទេ ។ តែជាក់ស្តែង ក្នុងលិខិតដែលចេញដោយទីស្តីការគណៈរដ្ឋមន្ត្រីបានលក់ផ្តាច់ឲ្យឈ្មោះ ជឹង ធានសេង ត្រឹមតម្លៃ ១ ៥០០ដុល្លារប៉ុណ្ណោះ។ករណីនេះគេមិនដឹងថា តើការវាយតម្លៃរបស់មន្ត្រីពាក់ព័ន្ឋគណនាតាមរូបមន្តអ្វីទេ? ប៉ុន្តែមហាជនបានសម្តែងពីការហួសចិត្តអំពីរបាយការណ៏ដែលមន្ត្រីពាក់ព័ន្ឋទាំងអស់រាយការណ៏ជូនដល់ថ្នាក់ដឹកនាំ ជុំវិញការប្រើប្រាស់ដីនៅទីតាំងជាក់ស្តែងលក់បានតម្លៃថោកហើយ មានការប៉ះពាល់ជាមួយប្រជាពលរដ្ឋរាប់សិបគ្រួសារទៅទៀត។
ទោះជាយ៉ាងណាគិតត្រឹមថ្ងៃទី០១ ធ្នូ ២០២២ កោះសន្តិភាពមិនបានទទួលការបំភ្លឺណាមួយពីអាជ្ញាធរមូលដ្ឋាន ឬមន្ត្រីជំនាញពាក់ព័ន្ឋឡើយ។ហើយរយៈកន្លងមកនេះគ្រប់ពេលអ្នកយកព័ត៌មានសាកសួរទៅមន្ត្រីជំនាញទាំងនោះ ជុំវិញករណីខាងលើគឺគ្មានអ្នកឆ្លើយតបឡើយ សូម្បីក្រុមហ៊ុន
ជឹង ធានសេង ក៏ពុំអាចទាក់ទងសុំការបំភ្លឺបានដែរ ។
ព័ត៌មានបន្ថែមមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ