រាជធានីភ្នំពេញ ៖ ការនាំចេញកៅស៊ូទៅបរទេសក្នុងត្រីមាសទី១ឆ្នាំនេះ មានចំនួន៣,២ម៉ឺនតោន កើនឡើងជាង២០% បើធៀបនឹងរយៈពេលដូចគ្នាកាលពីឆ្នាំ២០១៦ ប៉ុន្តែឧស្សាហកម្មមួយនេះនៅតែបន្តជួបបញ្ហាប្រឈមជាច្រើនទាំងក្នុង និងក្រៅស្រុក ។ នេះបើតាមមន្ត្រីជំនាញបានលើកឡើង ។
លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូនៃក្រសួងកសិកម្ម មានប្រសាសន៍ថា នៅក្នុងត្រីមាសទី១ឆ្នាំនេះ កម្ពុជានាំចេញកៅស៊ូទៅបរទេសមានចំនួន៣,២ម៉ឺនតោន បើធៀបនឹងរយៈពេលដូចគ្នាឆ្នាំ២០១៦ បានកើនឡើងជាង២០% ។ ចំណែកតម្លៃកៅស៊ូនៅលើទីផ្សារ ក្នុង១តោនអាចលក់បានថ្លៃ១.៩៨៥ដុល្លារ។ ទន្ទឹមនឹងការនាំចេញកើនឡើងនេះ ការដាំដុះកៅស៊ូនៅក្នុងស្រុកក៏កើនឡើងដែរទាំងការពង្រីកផ្ទៃដី និងការដាំដុះ ។
លោកថ្លែងថា ៖ « បើធៀបនឹងឆ្នាំ២០០៥-២០០៦ បច្ចុប្បន្ននេះឃើញថា ទិន្នផលកើនឡើងជារៀងរាល់ឆ្នាំ ។ តួយ៉ាង មកដល់ចុងឆ្នាំ២០១៦ កម្ពុជាមានផ្ទៃដីដាំកៅស៊ូសរុបប្រមាណ៤៣៣ពាន់ហិកតា ក្នុងនោះកៅស៊ូដែលអាចចៀរជ័រមានក្នុងរង្វង់១៣ម៉ឺនហិកតា » ។
ទោះបីជាឧស្សាហកម្មមួយនេះមានសញ្ញាងើបឡើងបន្ដិចក្ដី ប៉ុន្ដែក៏ប្រឈមនឹងបញ្ហាជាច្រើនផងដែរទាំងការដាំដុះ និងការនាំចេញ ។
លោក ម៉ែន សុភ័ក្ត្រ អគ្គលេខាធិការសមាគមចម្ការកៅស៊ូកម្ពុជា មានប្រសាសន៍ថា តម្លៃកៅស៊ូបច្ចុប្បន្នស្ថិតនៅក្រោម២ពាន់ដុល្លារក្នុង១តោន ដែលតម្លៃនេះ កសិករទទួលបានចំណេញតិចតួចប៉ុណ្ណោះ ហើយចំពោះក្រុមហ៊ុនធំៗវិញអត់ទទួលបានប្រាក់ចំណេញទេ ព្រោះការចំណាយច្រើន ដូច្នេះឧស្សាហកម្មមួយនេះនៅជួបបញ្ហាជាច្រើន ។ មួយវិញទៀត កៅស៊ូកម្ពុជាមិនត្រូវបានលក់ដោយផ្ទាល់ទៅប្រទេសអ្នកប្រើប្រាស់ទេ ជាទូទៅ គឺលក់តាមរយៈប្រទេសជាឈ្មួញកណ្តាលដូចជា វៀតណាម ម៉ាឡេស៊ី និងសិង្ហបុរីជាដើម ហើយគេយកទៅលក់បន្ដទៅប្រទេសជាអ្នកប្រើប្រាស់ផលិតផលចុងក្រោយ ។
លោក ម៉ែន សុភ័ក្ត្រ ថ្លែងថា ៖ « បើទោះបីតម្លៃកៅស៊ូ និងការនាំចេញកើនឡើងបន្ដិចក្ដី ប៉ុន្តែជារួម ក្នុងឧស្សាហកម្មមួយនេះនៅតែជួបបញ្ហាប្រឈមមួយចំនួនដូចជា កត្តាអាកាសធាតុក្តៅខ្លាំងពេកធ្វើឱ្យការដាំដុះកូន និងការប្រមូលផលធ្លាក់ចុះ ។ តម្លៃជ័រកៅស៊ូនៅលើទីផ្សារអន្តរជាតិគ្មានស្ថិរភាព និងស្ថិតក្នុងស្ថានភាពដាំក្បាលធ្លាក់ចុះ ។ រោងចក្រកែច្នៃគ្មានចម្ការកៅស៊ូខ្លួនឯង កំពុងប្រឈមនឹងការបិទទ្វាររោងចក្រ ដោយសារអាជីវកម្មមិនសូវរកបានប្រាក់ចំណេញ ។ គ្មានវត្ថុធាតុដើមគ្រប់គ្រាន់មកកែច្នៃ ដោយសារមិនអាចប្រកួតប្រជែងទិញវត្ថុធាតុដើមជាមួយឈ្មួញកណ្តាលដែលជ្រៀតចូលពីប្រទេសជិតខាងតាមច្រករបៀងបាន ។ រោងចក្រក្នុងស្រុកដែលពឹងផ្អែកទៅលើការទិញកៅស៊ូពីអ្នកដាំកៅស៊ូលក្ខណៈគ្រួសារនោះ អត់មានលទ្ធភាពប្រកួតប្រជែងថ្លៃជាមួយឈ្មួញកណ្តាល ដែលគាត់ទិញយកទៅលក់នៅប្រទេសជិតខាងតាមច្រករបៀងដោយមិនបង់ពន្ធ។ បញ្ហាប្រឈមថ្មីមួយទៀត គឺការឈានទៅដល់ការខ្វះខាតកម្លាំងពលកម្មចៀរជ័រនៅក្នុងចម្ការកៅស៊ូ » ។
តាមការបញ្ជាក់របស់លោក ប៉ុល សុផា អគ្គនាយកនៃអគ្គនាយកដ្ឋានកៅស៊ូ ឲ្យដឹងថា កាលពីឆ្នាំ២០១៦ កម្ពុជានាំចេញកៅស៊ូបានប្រមាណ១៤,៥ម៉ឺនតោន គិតជាចំណូលប្រមាណ១៤៣លានដុល្លារ ។ ទន្ទឹមនឹងនេះ លោកមានសុទិដ្ឋិនិយមថា កៅស៊ូនៅឆ្នាំ២០១៧ ក៏ដូចនៅឆ្នាំបន្ទាប់នឹងមានតម្លៃល្អ ដោយពឹងផ្អែកតាមការវាយតម្លៃរបស់ស្ថាប័នធំៗគឺ IMF ក៏ដូចជា World Bank រំពឹងថា កៅស៊ូស្ថិតនៅក្នុងតម្លៃ២ពាន់ដុល្លារក្នុង១តោន ហើយតម្លៃនេះវាល្អសម្រាប់អ្នកដាំកៅស៊ូ ៕
ចែករំលែកព័តមាននេះ