ខេត្តសៀមរាប ៖ រថយន្តដឹកដែកចេញមកពីរាជធានីភ្នំពេញទាំងយប់ ដើម្បីយកមកដាក់ឱ្យម៉ូយក្នុងខេត្តសៀមរាប ខណៈបើកលឿនក្នុងទីប្រជុំ ក៏ជ្រុលទៅបុកម៉ូតូមួយគ្រឿងជិះ២នាក់ប្តីយ៉ាងពេញទំហឹង បណ្តាលឱ្យស្លាប់ប្តី និងប្រពន្ធរងរបួសធ្ងន់ ហើយបានបញ្ជូនយកទៅសង្គ្រោះនៅមន្ទីរពេទ្យ ដែលហេតុការណ៍ដ៏រន្ធត់នេះ កើតឡើងកាលពីវេលាម៉ោង១១ និង២០នាទីព្រឹកថ្ងៃទី២០ ឧសភា ស្ថិតនៅចំណុចពីខាងកើតផ្សារលើធំថ្មី ចម្ងាយ៥០ម៉ែត្រ ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ហើយចំពោះមូលហេតុ ត្រូវគេដឹងថា បណ្តាលមកពីការបើកបរ ក្នុងល្បឿនលឿនជ្រុលពេក នេះបើតាមសម្តីនគរបាលចរាចរណ៍ខេត្ត ។
ប្រភពឱ្យដឹងថា អ្នកបើកបរបង្កឈ្មោះជា សុជាតិ ភេទប្រុស អាយុ២៤ឆ្នាំ មានទីលំនៅក្នុងភូមិសំបួរ ឃុំសំបួរ ស្រុកល្វាឯម ខេត្តកណ្តាល បើករថយន្តម៉ាកហ៊ីយ៉ាន់ដាយ ពណ៌.ស ពាក់ស្លាកលេខភ្នំពេញ ៣A-៥៧៦១ ដឹកដែកចេញពីភ្នំពេញ យកមកបោះដាក់ឱ្យម៉ូយនៅម្តុំជិតផ្សារប្រិមប្រិយ៍ ក្នុងខេត្តសៀមរាប ។ ចំណែកភាគីខាងម៉ូតូ ជនរងគ្រោះ២នាក់ប្តីប្រពន្ធ ប្តីឈ្មោះហេង ញ៉ អាយុ៥៦ឆ្នាំ ស្លាប់នៅហ្នឹងកន្លែង ជិះម៉ូតូម៉ាកហុងដា ពណ៌ខ្មៅ ពាក់ស្លាកលេខបន្ទាយមានជ័យ 1K-8149 និងឌុបប្រពន្ធឈ្មោះសេង ពៅ អាយុ ៥៤ឆ្នាំ ជាលក់ដូរនៅអង្គរឃ្យុងយូ ។
ក្រោយពេលកើតហេតុ ជនបង្កបានបើករថយន្តបម្រុងរត់គេច ប៉ុន្តែរត់មិនរួច ដោយសារបានបើកអូសជាប់មកជាមួយម៉ូតូជនរងគ្រោះ មកដល់ស្ពានថ្ម មុខព្រះរាជដំណាក់ព្រះអង្គចេកព្រះអង្គចម ទើបសមត្ថកិច្ចចាប់បានទាំងមនុស្ស និងរថយន្តតែម្តង ។
ចែករំលែកព័តមាននេះ