អាមេរិក ៖ ខ្សែភាពយន្តហូលីហ្វូត រឿង Avatar គ្រាន់តែរំលឹក និងលឺឈ្មោះ ជឿជាក់ថា ប្រិយមិត្តអ្នកគាំទ្រទូទាំងប្រទេស ក៏ដូចជានៅលើពិភពលោក ប្រាកដជាបានស្គាល់ច្បាស់ណាស់ ហើយមហាជនកំពុងទន្ទឹងរង់ទស្សនារឿង Avatar 2 ដែលលេចលឺដំណឹងថា នឹងត្រៀមចេញឆាប់ៗនាពេលខាងមុខ ជាពិសេសហ្វេនកម្ពុជា ក៏កំពុងអន្ទៈសា និងទន្ទឹងរង់ចាំទស្សនាខ្សែភាពយន្តដ៏អស្ចារ្យមួយនេះផងដែរ។
ទន្ទឹមនឹងលេចឮដំណឹងដ៏ពិសេសថា ខ្សែភាពយន្តហូលីហ្វូតរឿង Avatar 2 ចេញឆាប់ៗខាងមុខនេះ មហាជនជាច្រើនក៏បានចោទសួរថា ៖ «តើ Avatar 2 នឹងចេញផ្សាយពេលណា ខែណា និងចាក់បញ្ជាំនៅរោងកុនពេលណា? ព្រោះម្នាក់ៗសុទ្ធតែអន្ទៈសាចង់មើលគ្រប់ៗគ្នា»។
ជាការឆ្លើយតប ថ្លែងក្នុងបទសម្ភាសន៍ទស្សនាវដ្ដី GQ Magazine ថ្មីៗនេះ លោក James Cameron ដែលជាអ្នកដឹងនាំរឿង Avatar 2 បានលើកឡើងថា ការទន្ទឹង និងរង់ចាំ នឹងមកដល់មិនអោយអ្នកគាំទ្រខកបំណងឡើយ ត្រឹមរយៈពេលប្រហែលជិត១ខែទៀតប៉ុណ្ណោះ ពយន្ដរឿង “Avatar: The Way Of Water” ដែលជារឿងដ៏ល្បីរន្ទឺជុំវិញពិភពលោក និងជាខ្សែភាពយន្តដែលប្រិយមិត្តអ្នកគាំទ្រ ទន្ទឹងរង់ចាំអស់រយៈពេលជាយូរ នឹងត្រៀមបង្ហាញខ្លួនផ្លូវការនៅតាមរោងកុននានាជុំវិញពិភពលោកតែម្ដង។
ជាមួយគ្នានេះ ថ្លែងក្នុងបទសម្ភាសន៍ អ្នកដឹកនាំរឿងដ៏មានកេរ្តិ៍ឈ្មោះ លោក James Cameron ក៏បានលើកឡើងបន្តថា ភាពយន្ដមួយនេះ ចាយទុនច្រើនខ្លាំង រហូតដល់លោកមិនអាចបញ្ជាក់ប្រាប់ពីចំនួនលម្អិតបានឡើយ ពោលគឺចំណាយទុនយ៉ាងច្រើនលើសលប់ ពិបាកក្នុងការលើកមកបង្ហាញជូនប្រិយមិត្ត។
អ្នកដឹកនាំរឿងរូបនេះ បានបញ្ជាក់ថា ដើម្បីទទួលបានប្រាក់ចំណេញ “Avatar: The Way Of Water” ត្រូវក្លាយជាខ្សែភាពយន្ដដែលអាចរកចំណូលបានច្រើនជាងគេបំផុតលើពិភពលោក ដែលអាចជាប់លំដាប់ថ្នាក់ទី៣ ឬទី៤ ដោយត្រូវរកឱ្យបានខ្ទង់ជាង២ពាន់លានដុល្លារអាមេរិកឡើង ទើបឃើញផលចំណេញ។
តើខ្សែភាពយន្តមួយនេះ អាចជាប់លំដាប់ថ្នាក់លេខរៀងទី៣ ឬទី៤ ដែរឬទេ? ហើយតើប្រាក់ចំណេញអាចទទួលបានកម្រិតណា អាចរកចំណូលបានច្រើនជាងគេបំផុតលើពិភពលោកដែរឬអត់? ដូច្នេះមានតែរង់ចាំមើលការបញ្ជាក់ជាថ្មីម្ដងទៀត ពីអ្នកដឹកនាំរឿងដ៏មានកេរ្តិ៍ឈ្មោះលោក James Cameron នៅពេលដែលរឿងចាក់បញ្ចាំងនៅតាមរោងកុនជុំវិញពិភពលោក ។
យ៉ាងណាមិញ ប្រិយមិត្តប្រាកដជាបានទទួលជ្រាបហើយ នៅរយៈពេលប្រហែល១ខែទៀតប៉ុណ្ណោះ រឿង “Avatar: The Way Of Water” នឹងចាក់បញ្ជាំតាមរោងកុនជុំវិញពិភពលោក ក្នុងនោះតាមរោងកុនប្រទេសកម្ពុជាយើងក៏នឹងចាក់បញ្ជាំដូចគ្នា។ ដូច្នេះអ្នកមានគូ គួរត្រៀមខ្លួននាំដៃគូទៅទស្សនាតាមរោងកុននានាអោយហើយទៅ ចំណែកឯអ្នកអត់គូ មានតែនាំមិត្តភក្តិទៅមើលបានជាគ្នា ឬត្រៀមខ្លួនរកម្ចាស់បេះដូងទៅមើលជាមួយអោយហើយទៅ។
គួរបញ្ជាក់ផងដែរថា រឿង Avatar ដើមឡើយ ត្រូវបានគេរាយការណ៍ថា ចាយទុនផលិតប្រមាណ ២៥០ លានដុល្លារអាមេរិក ប៉ុន្ដែបើតាមសម្ដីលោក James Cameron ដើមទុនមែនទែនក្នុងការផលិត គឺច្រើនជាងនេះទៅទៀត ដែលវាជាចំនួនមិនទាន់បើកបង្ហាញបាន។ ហើយកាលពីឆ្នាំ២០០៩ ដែលមានរយៈពេលប្រមាណជាង១៣ឆ្នាំ ភាពយន្តរឿង AVATAR បានមកវា.យលុកឧស្សាហកម្មភាពយន្តឲ្យកក្រើក ក្រោមការប្រើតិចនិក Motion Capture ដែលនិម្មិត តួសម្តែងឲ្យក្លាយជាតួអង្គ 3D ដ៏សម្បូរបែប បូករួមនឹងសាច់រឿងប្លែកថ្មី មិនធ្លាប់មានក្នុងជំនាន់នោះ រហូតធ្វើឲ្យភាពយន្តមួយនេះ ឆក់យកបេះដូងទស្សនិកជនរាប់លាននាក់ទូទាំងពិភពលោក៕
ចែករំលែកព័តមាននេះ