រាជធានីភ្នំពេញ ៖ វេទិកាសេដ្ឋកិច្ចពិភពលោក ស្តីពី អាស៊ាន ដែលកម្ពុជានឹងធ្វើជាម្ចាស់ផ្ទះក្នុងការរៀបចំនៅថ្ងៃទី១០-១២ ឧសភា ខាងមុខ ត្រូវបានរំពឹងថា នឹងអាចទាក់ទាញអ្នកវិនិយោគមកបណ្ដាក់ទុនរកស៊ីនៅកម្ពុជាបន្ថែមទៀត ។
ថ្លែងនៅក្នុងសន្និសីទសារព័ត៌ដែលធ្វើឡើងកាលពីថ្ងៃទី៣ ឧសភា លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួង ទទួលរៀបចំវេទិកានេះ បានលើកឡើងថា ការធ្វើជាម្ចាស់ផ្ទះក្នុងការរៀបចំវេទិកាលំដាប់អន្តរជាតិនេះគឺចង់បង្ហាញថា កម្ពុជាមានលទ្ធភាព និងសមត្ថភាពគ្រប់គ្រាន់ ក៏ដូចជាចង់បង្ហាញឲ្យពិភពលោកបានដឹងថា កម្ពុជាមានសុខសន្តិភាពពេញលេញ កំណើនម៉ាក្រូសេដ្ឋកិច្ចមានស្ថិរភាព និងកំពុងឆ្ពោះទៅកាន់ភាពរីកចម្រើនឥតឈប់ឈរ ។
លោកបន្ដថា ៖ « ក្រោយពីកម្ពុជាត្រូវបានផ្សព្វផ្សាយលើពិភពលោកហើយ យើងសង្ឃឹមថា នឹងទទួលបានអ្នកវិនិយោគជាច្រើនបន្ថែមទៀតមកបណ្តាក់ទុននៅកម្ពុជា ដើម្បីបង្កើតការងារជូនយុវជន នៅពេលរៀនចប់នឹងមានការងារធ្វើ ។ អីុចឹង តួនាទីរបស់រាជរដ្ឋាភិបាលគឺខិតខំទាក់ទាញអ្នកវិនិយោគ ពន្យល់គេឱ្យមកបណ្តាក់ទុន រៀបចំកសាងផ្លូវឱ្យបានច្រើន លុបបំបាត់និតីវិធីលំបាកដល់គេ ងាយស្រួលគេមកបណ្តាក់ទុន » ។
លោកទេសរដ្ឋមន្ត្រីលើកឡើងថា ប្រទេសកម្ពុជាជាទីផ្សារតូចដែលមានពលរដ្ឋតែជាង១៦លាននាក់ប៉ុណ្ណោះ ក៏ប៉ុន្តែគេមើលតំបន់ជុំវិញកម្ពុជា បើគេបូកពលរដ្ឋនៅមហាអនុតំបន់មេគង្គ បូករួមអាស៊ានទាំងមូល គឺមានប្រជាជនជាង៦៣០លាននាក់ ហើយកម្ពុជាស្ថិតនៅចំណុចកណ្តាលនៃប្រទេសអាស៊ាន អាចឱ្យកម្ពុជាក្លាយជាទីតាំងផលិត និងចែកចាយទំនិញនៅក្នុងតំបន់ ហើយកម្ពុជាក្លាយជាទីកន្លែងដឹកទំនិញឆ្លងកាត់ទៅតំបន់ផ្សេងៗបាន ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានសម្ដែងសុទិដ្ឋិនិយមចំពោះវេទិកាសេដ្ឋកិច្ចពិភពលោកដែលកម្ពុជាធ្វើជាម្ចាស់ផ្ទះនៅពេលនេះ ។
លោកថ្លែងថា ៖ « វាជាមុខមាត់របស់ប្រទេសយើង ព្រោះយើងពុំដែលបានរៀបចំកម្មវិធីសំខាន់បែបនេះពីមុនមកទេ ។ កម្ពុជាអាចរៀបចំកម្មវិធីបែបលក្ខណៈអន្តរជាតិនេះបានទាល់តែមានតម្លៃ ទើបអាចធ្វើបាន ។ ទន្ទឹមនឹងនេះ ជាការបង្ហាញពីការខំប្រឹងប្រែង ក្រោយពីកម្ពុជាមានសុខសន្តិភាព និងការអភិវឌ្ឍច្រើន និងអាចទាក់ទាញអ្នកវិនិយោគធំៗដែលពុំធ្លាប់ឃើញកម្ពុជា ឱ្យមកមើលឃើញពីការអភិវឌ្ឍនៅពេលនេះ ។ ទន្ទឹមនឹងនេះ ធ្វើឱ្យយើងបានចំណេះចេះដឹងពីគេ តាមរយៈការបង្ហាញពីរឿងផ្សេងៗដែលជាប្រយោជន៍សម្រាប់ប្រទេសកម្ពុជា ហើយនៅថ្ងៃខាងមុខ ពួកគាត់ដែលបានចូលរួមក្នុងវេទិកានេះ នឹងធ្វើជាទេសចរមកកាន់កម្ពុជា ។ លើសពីនេះ វេទិកានេះក៏ជាឱកាសទាក់ទាញអ្នកវិនិយោគឱ្យមកបណ្តាក់ទុននៅកម្ពុជាបន្ថែមបានផងដែរ » ។
វេទិកាសេដ្ឋកិច្ចពិភពលោកដែលកម្ពុជាទទួលធ្វើជាម្ចាស់ផ្ទះនាពេលនេះ នឹងជជែកពិភាក្សាគ្នាទៅលើប្រធាបទ «យុវជន បច្ចេកវិទ្យា និងកំណើន » ។
ពាក់ព័ន្ធនឹងប្រធានបទនេះ លោកបណ្ឌិត ម៉ី កល្យាណ មានប្រសាសន៍ថា៖ « ជាចំណុចក្តៅៗ យើងអាចរៀនពីគេបានច្រើន ហើយគេរៀនពីយើងក៏បានច្រើនដែរ ។ ប្រធានបទនេះគឺចំពេលប្រទេសកម្ពុជាយើងមានយុវជនវ័យក្មេងច្រើន » ។ យ៉ាងណាក៏ដោយ លោកក៏បង្ហាញការព្រួយបារម្ភផងដែរនៅថ្ងៃអនាគត ខណៈបច្ចុប្បន្ននេះ ការចូលរៀនថ្នាក់កុមារដ្ឋានមានច្រើន តែនៅថ្នាក់ធម្យមសិក្សាទុតិយភូមិ ហាក់មានកម្រិតធ្លាក់ចុះ ដែលនេះជាការបារម្ភមួយ ។
គួរំលឹកថា ក្នុងខួបអនុស្សាវរីយ៍៥០ឆ្នាំនៃការបង្កើតអាស៊ានដែលប្រទេសហ្វ៊ីលីពិន ក្នុងឋានៈជាប្រធានអាស៊ានឆ្នាំ២០១៧ បានដាក់ចេញនូវចំណុចជាអាទិភាពចំនួន៦ ដែលជាត្រីវិស័យក្នុងសម្រេចឱ្យបាននូវចក្ខុវិស័យសហគមន៍អាស៊ានឆ្នាំ២០២៥រួមមាន ៖
១-ការយកចិត្តទុកដាក់លើប្រជាជន និងការយកប្រជាជនជាស្នូល ។
២-សន្និភាព និងស្ថិរភាពនៅក្នុងតំបន់ ។
៣-កិច្ចសហប្រតិបត្តិការ និងសន្តិសុខក្នុងលំហសមុទ្រ ។
៤-ការរីកចម្រើនដោយគំនិតច្នៃប្រឌិតថ្មីសម្រាប់ទាំងអស់គ្នា ។
៥-ភាពរឹងមាំរបស់អាស៊ាន
៦-អាស៊ានជាគំរូនៃសមាហរណកម្មតំបន់ តួអង្គមួយក្នុងសកលលោក ដើម្បីគាំទ្រដល់ដំណើរការពង្រឹងការអនុវត្តសសរស្តម្ភនៃសហគមន៍ នយោបាយ សន្តិសុខអាស៊ាន សហគមន៍សេដ្ឋកិច្ចអាស៊ាន និងសហគមវប្បធម៌អាស៊ាន ៕
ចែករំលែកព័តមាននេះ