រាជធានីភ្នំពេញ ៖ វេទិកាសេដ្ឋកិច្ចពិភពលោកស្តីពី «អាស៊ាន» ដែលកម្ពុជានឹងធ្វើជាម្ចាស់ផ្ទះចាប់ពីថ្ងៃទី១០ដល់១២ ខែឧសភា ខាងមុខនេះ នឹងនាំយកកេរ្ដិ៍ឈ្មោះ និងលើកកម្ពស់កិត្យានុភាពកម្ពុជាទៅកាន់ពិភពលោក ។
រាជធានីភ្នំពេញ ៖ វេទិកាសេដ្ឋកិច្ចពិភពលោកស្តីពី «អាស៊ាន» ដែលកម្ពុជានឹងធ្វើជាម្ចាស់ផ្ទះចាប់ពីថ្ងៃទី១០ដល់១២ ខែឧសភា ខាងមុខនេះ នឹងនាំយកកេរ្ដិ៍ឈ្មោះ និងលើកកម្ពស់កិត្យានុភាពកម្ពុជាទៅកាន់ពិភពលោក ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន ដែលនឹងធ្វើជាប្រធានគណៈកម្មការអន្តរក្រសួង រៀបចំវេទិកាសេដ្ឋកិច្ចពិភពលោកនៅកម្ពុជានេះ បានថ្លែងប្រាប់អ្នកសារព័ត៌មានជាតិ និងអន្តរជាតិក្នុងសន្និសីទសារព័ត៌មាននាព្រឹកថ្ងៃទី៣ ឧសភា ម្សិលមិញថា ការរៀបចំធ្វើជាម្ចាស់ផ្ទះនៃវេទិកាសេដ្ឋកិច្ចពិភពលោក សម្តេចតេជោ ហ៊ុន សែន នាយករដ្ឋមន្ត្រីលោកបានខិតខំប្រឹងប្រែងណាស់ ដោយបានធ្វើការពន្យល់ទៅកាន់អ្នករៀបចំវេទិកាសេដ្ឋកិច្ចពិភពលោក ដើម្បីបញ្ជាក់ថា កម្ពុជាមានលទ្ធភាព និងសមត្ថភាពគ្រប់គ្រាន់ ដើម្បីរៀបចំវេទិកានេះ ។
វេទិកានេះនឹងមានការអញ្ជើញចូលរួមពីប្រធានាធិបតីហ្វីលីពីន នាយករដ្ឋមន្ត្រីឡាវ និងនាយករដ្ឋមន្ត្រីប្រទេសវៀតណាម រដ្ឋមន្ត្រី១៨រូបមកពីបណ្តាប្រទេសក្នុងតំបន់ និងពីឥណា្ឌ ព្រមទាំងប្រទេសទីម័រជាដើម ។ វេទិកានេះនឹងមានសហប្រធានសរុបចំនួន៦រូប មានអ្នកកាសែតជាតិ អន្តរជាតិចំនួន២១៧នាក់ ក្នុងនោះអ្នកកាសែតអន្តរជាតិចំនួន១២៩នាក់ និងទូរទស្សន៍ល្បីៗនៅក្នុងពិភពលោកចំនួន១២ នឹងផ្សាយបន្តផ្ទាល់ពីកម្ពុជា ។
លោកទេសរដ្ឋមន្ត្រី ថ្លែងថា ៖ « ប្រទេសកម្ពុជានឹងត្រូវបានផ្សព្វផ្សាយទៅកាន់ពិភពលោក និងទទួលបានអ្នកវិនិយោគកាន់តែច្រើន មកវិនិយោគនៅកម្ពុជា ហើយកម្ពុជានឹងប្រើស្ករតាំងម៉ែ ដើម្បីទាក់ទាញអ្នកវិនិយោគធំៗមកពីពិភពលោក »។
លោកបន្តថា៖ « សុខសន្តិភាព ស្ថិរភាពនយោបាយ និងកំណើនសេដ្ឋកិច្ចរបស់កម្ពុជា នឹងក្លាយជាស្ករតាំងម៉ែ ដែលអាចទាក់ទាញអ្នកវិនិយោគអន្តរជាតិមកវិនិយោគនៅកម្ពុជា »។
វេទិកានេះ នឹងបើកឲ្យយុវជន និងអ្នកធុរកិច្ចវ័យក្មេងនៅកម្ពុជាចូលរួមវេទិកាបើកចំហ នៅរសៀលថ្ងៃទី១០ ឧសភា ដែលនឹងធ្វើឡើងនៅសាលប្រជុំសម្តេចតេជោក្នុងវិទ្យាស្ថានបច្ចេកវិទ្យាកម្ពុជា ដោយមនុស្ស២.០០០នាក់អាចចូលរួមក្នុងវេទិកាបើកចំហនេះ ។
វេទិកានេះនិយាយពីក្តីសង្ឃឹម និងអនាគតអាស៊ាន ដែលនឹងមានវាគ្មិនជាអ្នកដឹកនាំធុរកិច្ចល្បីៗដូចជា Air Asia វាវាគ្មិនមកពីក្រុមហ៊ុនSISCO និងវាគ្មិនល្បីៗមកពីភពលោកជាច្រើនទៀត ។ សម្តេចតេជោ នឹងអញ្ជើញចូលរួមបើកវេទិកាសេដ្ឋកិច្ចពិភពលោកនៅថ្ងៃទី១១ ឧសភា វេលាម៉ោង១និង៣០នាទីរសៀល ។
រដ្ឋមន្ត្រីប្រតិភូអមនាយករដ្ឋមន្ត្រី លោកកៅ គឹមហួន បានថ្លែងថា នេះជាឱកាសដ៏កម្រដែលកម្ពុជាបានធ្វើជាម្ចាស់ផ្ទះ សម្រាប់វេទិកាសេដ្ឋកិច្ចពិភពលោក ស្តីពី អាស៊ាន ដោយសារគេមើលឃើញកម្ពុជាជាប្រទេសដែលត្រូវបានគេហៅថា ជាប្រទេសអភូតហេតុមួយតាមដងទន្លេមេគង្គ ហើយបានឆ្លងកាត់នូវដំណាក់កាលជាច្រើនក្នុងរយៈពេលប៉ុន្មានទសវត្សរ៍ចុងក្រោយនេះ ។
លោករដ្ឋមន្ត្រីបន្តថា កម្ពុជាជាប្រទេសមួយស្ថិតក្នុងតំបន់មហាអនុតំបន់ទន្លេមេគង្គ ពីមុនមក តំបន់នេះជាប្រទេសមានសង្គ្រាម ប៉ុន្តែពេលនេះបានក្លាយជាមជ្ឈមណ្ឌលនៃការីកចម្រើនសេដ្ឋកិច្ចមួយក្នុងពិភពលោក ហើយកម្ពុជាសម្រេចបានកំណើនសេដ្ឋកិច្ចជាង៧ភាគរយ ក្នុងរយៈពេលជាង២ទសវត្សរ៍ចុងក្រោយនេះ ។
លោករដ្ឋមន្ត្រីបន្តថា៖ « កិច្ចប្រជុំនេះនឹងប្រមូលយកមកនូវអ្នកវិនិយោគធំៗ និងមិនត្រឹមតែផ្សារភ្ជាប់កម្ពុជា និងតំបន់ទេ ប៉ុន្តែនឹងផ្សារភ្ជាប់កម្ពុជាទៅកាន់ពិភពលោកតែម្តង » ។
លោក សែន សិលា ទីប្រឹក្សាសម្តេចតជោហ៊ុន សែន បានថ្លែងថា កម្ពុជាបានធ្វើការងារជាច្រើន ដើម្បីនាំវេទិកានេះមកកម្ពុជា ហើយវាមិនត្រឹមតែជាការៀបចំវេទិកានោះទេ ប៉ុន្តែវាជាអ្វីដែលនឹងនាំមកនូវការផ្លាស់ប្តូរនៅកម្ពុជា និងការធ្វើពាណិជ្ជកម្ម ចំណេះដឹង និងនាំមកនូវអ្នកវិនិយោគកាន់តែច្រើនមកកាន់កម្ពុជា ៕
ចែករំលែកព័តមាននេះ