បុរសម្នាក់បានរួមដំណើរក្នុងអាជីពសិល្បៈ និងឆ្លងកាត់ឧបសគ្គយ៉ាងច្រើនជាមួយតារាចម្រៀងរ៉េប លោក វណ្ណដា ចាប់ផ្ដើមតាំងពីដំបូងៗជាមួយបទបទ «ឈឺទេ» រហូតដល់ Skull II (Season I ) បានចេញមុខសុំទោស វណ្ណដា និងផលិតកម្មបារមី រួមទាំងមហាជនអ្នកគាំទ្រ ក្រោយរូបលោកមានការធ្វេសប្រហែសធ្វើអោយបែកធ្លាយ
រាជធានីភ្នំពេញ ៖ នាថ្ងៃទី១៥ ខែវិច្ឆិកា ឆ្នាំ២០២២ លោកសង្ហារ ដែលជាបុរសម្នាក់បានរួមដំណើរក្នុងអាជីពសិល្បៈ និងឆ្លងកាត់ឧបសគ្គយ៉ាងច្រើនជាមួយតារាចម្រៀងរ៉េប លោក វណ្ណដា ចាប់ផ្ដើមតាំងពីដំបូងៗជាមួយបទបទ «ឈឺទេ» រហូតដល់ Skull II (Season I ) បានចេញមុខសុំទោស វណ្ណដា និងផលិតកម្មបារមី រួមទាំងមហាជនអ្នកគាំទ្រ ក្រោយរូបលោកមានការធ្វេសប្រហែសធ្វើអោយបែកធ្លាយបទចម្រៀងថ្មី ដែលមិនទាន់ចេញជាផ្លូវការរបស់ វណ្ណដា ដោយសារតែការទុកចិត្តទៅលើក្មេងប្រុសម្នាក់ តែលោកមិនបញ្ជាក់ឈ្មោះ។
ប្រាកដណាស់ កាលពីយប់ថ្ងៃទី២៩ ខែតុលា ឆ្នាំ២០២២ កន្លងទៅថ្មីៗនេះ ប្រិយមិត្តប្រាកដជាបានជ្រាបច្បាស់រួចមកហើយពាក់ព័ន្ធទៅនឹងរឿងរ៉ាវ ដែល Top Rapper វណ្ណដា បានចេញមុខប្រកាសច្បាស់ៗថា បទចម្រៀង J+o ll របស់លោកបានបែកធ្លាយមុនចេញជាផ្លូវការនោះ។
ក្នុងអំឡុងរឿងដ៏ក្ដៅគគុកនោះ តារាប្រុសរូបនេះ បានបង្ហោះសារបញ្ចេញកំហឹងខ្លាំងៗក្នុង Story នៅលើបណ្ដាញសង្គម Instagram និង FaceBook ដោយពោលចំៗថា បទ J+o ll របស់លោកបានបែកធ្លាយ និងត្រូវលួចយកដោយពួកថោកទាប។ វណ្ណដា និយាយបន្តថា បើជ្រុលជាលាក់ហើយ លោកនឹងជូនតាមសំណូមពរបុគ្គលដែលលួចបទលោកនោះ ហើយលោកក៏ប្រាប់ថា នរណាក៏ដោយដែលលួចបទលោក គឺអត់រួចខ្លួនទាំងអស់»។
ស្របពេលបង្ហាញសាររួច ជាមួយគ្នានោះ វណ្ណដា ក៏បានចេញបទចម្រៀង J+O ll នៅលើបណ្ដាញសង្គមភ្លាម ខណៈអត្ថន័យឃ្លាឃ្លោង និងប្រយោគនីមួយៗពិតជាចាក់ដោតហាក់និយាយចំៗទៅកាន់តារារ៉េបលោក ជី ដេវីត ហើយបង្កើតបានជារលកកំដៅបង្កជាជម្លោះពាក្យសម្ដីតាមរយៈបទចម្រៀង រហូតមានការតបតគ្នាទៅវិញទៅមក តែមួយរយៈចុងក្រោយ សង្គ្រាម Top Rapper 2 ដួងនេះ ក៏បានស្ងប់ស្ងាត់ទៅវិញ ក្រោយអ្នកទាំងពីរចេញមុខបកស្រាយដើម្បីបញ្ចប់ជម្លោះរៀងៗខ្លួន។
យ៉ាងណាមិញ ក្នុងថ្ងៃទី១៥ ខែវិច្ឆិកា នេះ យើងសង្កេតឃើញថា វណ្ណដា ក៏បានបង្ហោះសារ បង្ហាញការឈឺចាប់ និងសោកស្ដាយចំពោះបទចម្រៀងខ្លួនដែលបានបែកធ្លាយ ដោយបានធ្វើការបញ្ជាក់ថា លោកសូមបោះចោលរាល់បទទាំងអស់ដែលបានបែកធ្លាយក្នុងថ្ងៃនេះ និងនៅពេលខាងមុខ ហើយសម្រាប់អ្នកដែលចែកចាយបទបែកធ្លាយរបស់លោកទាំង folder សូមបន្តស្តាប់ទៀតចុះ ព្រោះបុគ្គលនោះបានបំផ្លាញបេះដូងលោករួចរាល់ហើយ។
ចំណែកឯលោក ជី ដេវិត វិញក៏បានបង្ហាញសារដូចគ្នា និងពោលថា ខ្លួនកំពុងរងការចោទប្រកាន់ដ៏អយុត្តិធម៌មួយ ទាំងដែលខ្លួនមិនបានប្រព្រឹត្តិខុស ដែលមើលទៅចង់បង្កប់ន័យថាលោកមិនបានលួចថតចម្លង ឬ copy អ្វីពីនរណាឡើយ។ មួយរយៈមកនេះ វណ្ណដា និង ជី ដេវិត ក៏ទទួលរងការរិះគន់ខ្លាំងៗដូចគ្នាផងដែរ ពីសំណាក់មហាជន។
ដោយឡែក ក្រោយពេលលោក វណ្ណដា និងលោក ជី ដេវិត បង្ហោះសារព្រមគ្នារួចហើយ ស្រាប់តែបុរសម្នាក់ឈ្មោះ សង្ហារ ត្រូវជារួមដំណើរឆ្លងកាត់ឧបសគ្គយ៉ាងច្រើនជាមួយ លោក វណ្ណដា បានចេញមុខសុំទោស វណ្ណដា និងផលិតកម្ម រួមទាំងមហាជនយ៉ាងដូច្នេះថា ៖ «ចាប់តាំងពីឆ្នាំ២០១៦មក ខ្ញុំជាមនុស្សម្នាក់ ដែលបានចូលរួមផលិតចម្រៀង វណ្ណដា ជាមួយ វណ្ណដា រាប់ចាប់ទាំងពី បទ «ឈឺទេ» រហូតដល់ Skull II (Season I ) ហើយឯកសារចម្រៀងដែលបានចេញជាផ្លូវការ និងមិនទាន់ផ្លូវការទាំងអស់ គឺស្ថិតក្រោមការថែរក្សារបស់ខ្ញុំ»។
លោក សង្ហារ បញ្ជាក់ថា ៖ «ដើមហេតុ នៃការបែកធ្លាយបទចម្រៀងរបស់លោក វណ្ណដា គឺត្រូវបានគេលួចចម្លងចេញពីកុំព្យូទ័រស្ទូឌីយ៉ូផ្ទាល់ខ្លួនរបស់ខ្ញុំ។ ថ្ងៃទី០៨ ខែកក្កដា ឆ្នាំ២០២២ ខ្ញុំបានទទួលដំណឹងពីការបែកធ្លាយនូវបទ J+O ll (Demo) ដែលមិនទាន់មានគំរោងក្នុងការចេញ ។ ខ្ញុំបានសហការជាមួយក្រុមការងារ ដើម្បីរកប្រភពដើមនៃការបែកធ្លាយ ហើយក៏ដឹងថាបុគ្គលម្នាក់នោះជាក្មេងម្នាក់ដែលខ្ញុំបានផ្ដល់ឱកាសអោយគាត់បានចូល Studio ដើម្បីផលិតបទផ្ទាល់ខ្លួនរបស់គាត់ ហើយមានឱកាសក្នុងការដុសខាត់សមត្ថភាពរបស់ខ្លួន ទាំងដែលគាត់មិនមែនជាសមាជិករបស់ពួកយើង ( La Cima Cartel & Baramey Crew)។ ពួកយើង (Baramey Crew) ព្យាយាមលាក់ព័ត៌មាននេះ ពី វណ្ណដា ព្រោះមិនចង់អោយគាត់បែកអារម្មណ៍មិនអាចបំពេញភារៈកិច្ចដែលគាត់កំពុងផ្ដោតបាន»។
លោក សង្ហារ បានបង្ហាញអារម្មណ៍សោកស្ដាយថា ៖ «ខ្ញុំពិតជាមានអារម្មណ៍សោកសៅចំពោះសម្លាញ់ (វណ្ណដា) ជាខ្លាំង គាត់ជាបុគ្គលម្នាក់ ដែលឆ្លងការលំបាកជាមួយខ្ញុំច្រើន ទំរាំតែយើងមកដល់ចំណុចនេះ ហើយមានថ្ងៃនេះ ហើយគាត់ជាមនុស្សម្នាក់ដែលធ្វើអោយមហាជនទទួលស្គាល់សមត្ថភាព និងស្នាដៃរបស់ខ្ញុំផងដែរ។ អរគុណសម្លាញ់ ដែលនៅតែមានទំនុកចិត្តចំពោះខ្ញុំ : «Trust nobody but our Company» ខ្ញុំគាំទ្រការសម្រេចចិត្ត មិនផលិតបន្តនូវបទដែលបានបែកធ្លាយ រឿងហេតុទាំងអស់កើតចេញមកពីការធ្វេសប្រហែសរបស់ខ្ញុំទាំងអស់។ ខ្ញុំត្រូវបានគេលួចឯកសារ កាងាររបស់ខ្ញុំ។ ក្រុមហ៊ុនធ្លាប់ប្រាប់ខ្ញុំអោយប្រុងប្រយ័ត្នជាច្រើនលើកជាច្រើនសារ ប៉ុនែ្តខ្ញុំនៅតែធ្វើមិនបាន ព្រោះអតីតកាលខ្ញុំក៏ធ្លាប់ជាក្មេងប្រុសម្នាក់ ដែលចង់ចេះចង់ដឹង ចង់រៀនសូត្រ ហើយក៏ធ្លាប់ជាក្មេងម្នាក់ដែលពុំសូវមានឱកាសច្រើនដែរ»។
លោក សង្ហារ បានបង្ហាញអារម្មណ៍សោកស្ដាយបន្តទៀតថា «ពេលនេះ គឺជាពេលដែលខ្ញុំខកចិត្តបំផុតសម្រាប់ទង្វើដែលបានធ្វើ ត្រូវសងមកវិញ ដោយការបំផ្លាញអនាគតរបស់ខ្ញុំទាំងមូលនិងទំនុកចិត្តរបស់ដៃគូសហការ និងក្រុមហ៊ុនទាំងមូលរបស់ខ្ញុំ។ ការងារដែលបានផលិត កិត្តិយសដែលបានសាងរាប់ឆ្នាំ គឺត្រូវទទួលលទ្ធផលត្រឹមពាក្យមួយមាត់ គឺ «ខ្ញុំ Unprofessional »!!! ការខាតបង់របស់ខ្ញុំ គឺខ្ញុំផ្ដល់ឱកាសខុសមនុស្ស ស្រលាញ់ខុសមនុស្ស ៖ «ឡានឲ្យបើក ផ្ទះឲ្យចូល កុំព្យូទ័រឲ្យចុច»។ កំហុសមួយនេះ គឺជាមេរៀនដ៏ធំសម្រាប់ជីវិតខ្ញុំ រហូតធ្វើឲ្យខ្ញុំសម្រេចចិត្តចាកចេញមករស់នៅក្រៅតែម្នាក់ឯង ហើយខ្ញុំបានសម្រេចចិត្តផ្លាស់ប្ដូររបៀបធ្វើការជាច្រើនទៀត»។
លោក សង្ហារ បន្តទៀតថា «បច្ចុប្បន្ន Files ទាំងអស់ គឺមិនស្ថិតក្រោមការថែរក្សារបស់ខ្ញុំទៀតទេ Files ទាំងអស់ ត្រូវបានផ្លាស់ប្ដូរអ្នកថែរក្សាហើយ វាគឺជាវិធានការយុត្តិធម៌ និងសមហេតុផល ហើយយោគយល់បំផុតសំរាប់ខ្ញុំ។ ខ្ញុំសុំទោស បើសិនជាថ្ងៃក្រោយ ខ្ញុំនិងវណ្ណដា មិនបានផ្ដល់ឱកាសអោយមនុស្សជំនាន់ក្រោយ អ្នកអាចចាត់ទុកពួកខ្ញុំថា ជាមនុស្សអាត្មានិយមបាន ចាប់ពីពេលនេះទៅ គឺយើងសុំតែអភិវឌ្ឍតន្ត្រីបានហើយ រឿងអភិវឌ្ឍធនធាន គឺសុំចប់ត្រឹមនេះ មិនមែនមកពីអស់ទំនុកចិត្តលើមនុស្សគ្រប់គ្នាទេ គឺពួកខ្ញុំសុំសិទិ្ធការពារ ផ្លូវចិត្ត ដើម្បីរក្សាបាននូវជំហរដ៏រឹងមាំក្នុងការផលិតស្នាដៃល្អៗ ដើម្បីបំពេញអោយបានតាមតម្រូវការ និងចក្ខុវិស័យរបស់សិល្បៈក្នុងប្រទេសយើងទាំងមូល។ សុំទោស ៖ Baramey Production សុំទោស ៖ អ្នកទាំងអស់គ្នា ណុំ ចាន់រតនៈ»។
គួររំលឹកថា ៖ ដោយក្តីឈឺចាប់! កំពូលតារារ៉េប វណ្ណា ប្រកាសបោះចោលទាំងអស់នៅបទដែលបែកធ្លាយ។ គួររំលឹកទៀតថា ៖ ជី ដេវីត ពោលថា ខ្លួនកំពុងរងការចោទប្រកាន់ ខណៈ វណ្ណដា ក៏ប្រកាសបោះចោលបទបែកធ្លាយទាំងបេះដូងឈឺចាប់ ៕
ចែករំលែកព័តមាននេះ