តារារ៉េបជួរមុខក្នុងប្រទេស គឺលោក ជី ដេវីត បានបង្ហាញសារយ៉ាងវែងអន្លាយជាភាសារអង់គ្លេស ដែលបកប្រែជាភាសាខ្មែរ មានន័យថា លោកកំពុងបញ្ជាក់ជម្រាបជូនមហាជនអ្នកគាំទ្រថា
រាជធានីភ្នំពេញ ៖ នាយប់ថ្ងៃទី១៤ ឈានចូលថ្ងៃទី១៥ ខែវិច្ឆិកា ឆ្នាំ២០២២ វេលាម៉ោងប្រហែលម៉ោង១យប់ តារារ៉េបជួរមុខក្នុងប្រទេស គឺលោក ជី ដេវីត បានបង្ហាញសារយ៉ាងវែងអន្លាយជាភាសារអង់គ្លេស ដែលបកប្រែជាភាសាខ្មែរ មានន័យថា លោកកំពុងបញ្ជាក់ជម្រាបជូនមហាជនអ្នកគាំទ្រថា «លោកកំពុងរងការចោទប្រកាន់នៅរឿងដ៏អយុត្តិធម៌មួយ ដែលបង្កពីអ្នករួមដំណើរជាមួយគ្នា»។
ខណៈក្នុងថ្ងៃតែមួយ នាវេលាម៉ោង៣ទៀបភ្លឺ លោកវណ្ណដា ដែលជា Top Rapper ដ៏ល្បីឈ្មោះលំដាប់ប្រទេសដូចគ្នា ក៏បានបញ្ចេញសារទាំងអារម្មណ៍ឈឺចុកចាប់ ដោយប្រកាសបោះបង់ចោលរាល់បទចម្រៀងដែលបានបែកធ្លាយទាំងអស់ និងប្រកាសឲ្យអ្នកដែលចែកចាយបទបែកធ្លាយរបស់លោកទាំង Folder បន្តចែកចាយទៀត ព្រោះបេះដូងរបស់លោកត្រូវបានបំផ្លាញខ្ទេចខ្ទីអស់ហើយ។ សូមបញ្ជាក់ផងដែរថា សំណេររបស់តារារ៉េប ជី ដេវីត គឺបានបង្ហោះមុនលោក វណ្ណដា។
យ៉ាងណាមិញ បើយោងតាមសារសំណេរដែលលោក ជី ដេវីត បានបង្ហោះមានខ្លឹមសារថា ៖ «ការពិតគ្រប់យ៉ាងបានដឹងតាំងពីដើមមកម្ល៉េះ គ្រាន់តែថា ពួកគេចង់ដាក់ការចោទប្រកាន់ជាល្បិចកលដែលបានរៀបចំដោយអត់ព្រាងទុក! ពេលខ្លះខ្ញុំចង់ជឿការពិតទាំងអស់ ប៉ុន្តែពិភពលោកនេះ ពោរពេញទៅដោយភាពមិនប្រាកដប្រជា! ខ្ញុំបានដាក់ចិត្តកាយបេះដូង និងព្រលឹងរបស់ខ្ញុំទាំងអស់សម្រាប់តន្ត្រីដែលខ្ញុំស្រឡាញ់ សម្រាប់ឧស្សាហកម្មតន្ត្រីទាំងមូល។ ប៉ុន្តែអ្វីដែលខ្ញុំទទួលបានមកវិញ គឺជាការចោទប្រកាន់ខុសឆ្គងដ៏អាក្រក់ ដោយគ្មានការទទួលខុសត្រូវ។ ប៉ុន្តែខ្ញុំគិតថា ខ្ញុំប្រហែលជាត្រូវធ្វើខ្លួនថា វាមិនអីទេ។ ហេតុអ្វី? ព្រោះនៅពេលដែលអ្នកមានឥទ្ធិពលខ្លាំង អ្នកអាចធ្វើអ្វីតាមចិត្តចង់ និយាយអ្វីដែលអ្នកចង់ធ្វើ។ យុត្តិធម៌ដែលបានមកដោយមិនបានធ្វើអីសោះ បែរជាបានទៅលើអ្នកជានិច្ច ប្រសិនបើអ្នកធំល្មម មានអំណាចគ្រប់គ្រាន់ មានឥទ្ធិពលគ្រប់គ្រាន់។ សារទាំងអស់នេះ គឺគ្រាន់តែជារឿងដែលខ្ញុំចង់រំលឹកខ្លួនឯង ក៏ដូចជាមនុស្សដែលកំពុងធ្វើដំណើរក្នុងផ្លូវដូចគ្នាជាមួយខ្ញុំ។ ចុងក្រោយនេះ គឺថាពេលវេលាភាគច្រើន ខុស ឬត្រូវ គឺមិនអាចសម្រេចបានត្រឹមពាក្យសម្ដី ឬកំហឹងរបស់អ្នកនោះទេ! ពេលវេលាជានិច្ចជាកាល នឹងបង្ហាញអ្នកនូវផ្លូវដែលត្រូវ គ្រាន់តែយកវានេះ ជាឧទាហរណ៍! G-DEVITH»។
ទន្ទឹមនឹងការបង្ហាញសំណេរដ៏សែនចាក់ដោតខាងលើ របស់លោក ជី ដេវីត ដែលជាគូស្នេហ៍អ្នកនាង ទេព បូព្រឹក្ស ភ្លាមៗនោះ យើងសង្កេតឃើញថា អ្នកគាំទ្រតារាប្រុសរូបនេះជាច្រើនបាននាំគ្នាបញ្ចេញជាមតិយោបល់លើកទឹកចិត្តអោយលោករឹងមាំ តស៊ូជំនះរាល់ឧបសគ្គទាំងឡាយ និងបន្តដំណើរទៅមុខទៀតជាមួយអ្នកគាំទ្ររបស់លោក។
ក្នុងការបញ្ចេញមតិជាច្រើន យើងសង្កេតឃើញលោក ម៉ាច័ន្ទ បញ្ញា ដែលជាតារាចម្រៀងប្រុសល្បីឈ្មោះមួយរូបក៏បានចូលទៅបញ្ចេញមតិលើកទឹកចិត្តលោក ជី ដេវីត ថា ៖ «ប្អូនជាទីរាប់អាន សំណេរនេះអាចនឹងត្រូវគេសើចចំអក ចំអែចំអន់ ឬមើលរំលង ហើយពេលនេះប្រហែលជាបងនៅឆ្ងាយពីប្អូនណាស់ ប៉ុន្តែការស្រឡាញ់រាប់អានចំពោះបង គឺនៅតែមានក្នុងចិត្តជានិច្ច។ បងសុំសរសេរជាភាសាខ្មែរ ក្រែងអស់សេចក្ដីជាង។ ជីវិតសិល្បករយើង ដូចជាបារ៉ាបូល មានឡើងមានចុះ មានខ្ពស់មានទាប រឿងជីវិតមានរឿងស្មុគស្មាញច្រើន។ ការពិតខ្លះ គឺមិនអាចយកជាការបានគ្រប់ពេលទេ ឯការមិនពិតខ្លះក៏ដូចគ្នា បងមិនដឹងថា ប្អូនមានកង្វល់ ឬរីករាយក្នុងចិត្តកម្រិតណាទេ តែបងដឹងថា ធ្វើជាដើមឈើខ្ពស់ ខ្យល់បក់មិនតិចឡើយ។ ដូច្នេះអ្វីក៏ដោយ ទោះស្ថិតក្នុងកម្រិតណា កន្លែងណា សុំប្អូនត្រូវតាំងចិត្តប្រើសុភវិនិច្ឆ័យជានិច្ច ដើម្បីមើលដឹងថា អ្វីល្អអ្វីអាក្រក់ អ្វីគួរធ្វើអ្វី និងមិនគួរធ្វើ»។
លោក ម៉ាច័ន្ទ បញ្ញា បន្ថែមបន្តថា «បងមិនចង់និយាយជាសាធារណៈបែបនេះដែរ តែតាំងពីប្អូនបាន Disactivate Account ផ្ទាល់ខ្លួនមក ហើយខ្លួនឯងមិនតាំងខ្លួននៅមុខឆាកទៀត ឃើញរឿងបន្តបន្ទាប់ទាំងល្អទាំងអាក្រក់ ធ្វើអោយបងសម្រេចចិត្តសរសេរសំណេរចេញពីចិត្តនេះ។ នៅចាំឆាកដែលយើងធ្លាប់ជុំគ្នា តែពីពេលនេះប្រហែលជាកេរ្តិ៍ឈ្មោះបងត្រូវអវត្តមានច្រើន ព្រោះសម្ពាធពេលវេលា ភាពខ្មាសអៀន និងសុខភាព។ គោលបំណងចង់ទៅឆាកអន្តរជាតិ ក៏មានគេធ្វើច្រើនហើយដែរ ដូច្នេះ គឺបងខ្លួនឯងអាចចាស់ទៅបិទភ្នែកជិតហើយ។ សូមជូនពរប្អូន និងពិសេសអបអរសាទរដែលបានក្លាយជាប៉ាម្នាក់»។
គួររំលឹកថា ៖ ដោយក្តីឈឺចាប់! កំពូលតារារ៉េប វណ្ណា ប្រកាសបោះចោលទាំងអស់នៅបទដែលបែកធ្លាយ ៕
ចែករំលែកព័តមាននេះ