រាជធានីភ្នំពេញ ៖ ក្រសួងទេសចរណ៍បានចាត់តាំងគណៈប្រតិភូមួយក្រុមដឹកនាំដោយលោក នី ផល្លី អគ្គលេខាធិការរង និងមន្ត្រីជំនាញទៅចូលរួមព្រឹត្តិការណ៍ពិព័រណ៍ទេសចរណ៍អន្តរជាតិទីផ្សារអារ៉ាប់ (Premier Arabian Travel Market)
រាជធានីភ្នំពេញ ៖ ក្រសួងទេសចរណ៍បានចាត់តាំងគណៈប្រតិភូមួយក្រុមដឹកនាំដោយលោក នី ផល្លី អគ្គលេខាធិការរង និងមន្ត្រីជំនាញទៅចូលរួមព្រឹត្តិការណ៍ពិព័រណ៍ទេសចរណ៍អន្តរជាតិទីផ្សារអារ៉ាប់ (Premier Arabian Travel Market) នៅទីក្រុងឌូបៃ ប្រទេសអារ៉ាប់រួម ចាប់ពីថ្ងៃទី២៤ ដល់២៧ មេសា កន្លងមកនេះ ដើម្បីផ្សព្វផ្សាយពីសក្តានុពលនៃវិស័យទេសចរណ៍កម្ពុជា និងទាក់ទាញភ្ញៀវទេសចរពីប្រទេសមជ្ឈិមបូព៌ាផងដែរ ។
ក្នុងព្រឹត្តិការណ៍នេះ ក្រុមហ៊ុនការីទេសចរណ៍ និងភ្នាក់ងារទេសចរណ៍ជាច្រើនមានចំណាប់អារម្មណ៍ខ្ពស់ក្នុងការរៀបចំកញ្ចប់ទស្សនកិច្ចទេសចរណ៍មកកម្ពុជា ដែលជាគោលដៅទេសចរណ៍ថ្មីដ៏មានសក្តានុពលសម្បូរបែប ទាំងវប្បធម៌ ប្រវត្តិសាស្ត្រ អេកូទេសចរណ៍-ធម្មជាតិ និងតំបន់ឆ្នេរដ៏ស្រស់ស្អាត ស្របពេលការហោះហើរដោយផ្ទាល់របស់ក្រុមហ៊ុនអាកាសចរណ៍ដ៏ល្បី Amirates Airlines ពីទីក្រុងឌូបៃ ប្រទេសអារ៉ាប់រួម មកកាន់រាជធានីភ្នំពេញ នឹងចាប់ផ្តើមនាខែកក្កដា ឆ្នាំ២០១៧ ខាងមុខនេះ ។
ព្រឹត្តិការណ៍ពិព័រណ៍ទេសចរណ៍អន្តរជាតិកម្រិតខ្ពស់នៃទីផ្សារអារ៉ាប់ មានរយៈពេល៤ថ្ងៃ ជារៀងរាល់ឆ្នាំ ដោយមានតំណាងក្រុមហ៊ុន និងអ្នកអាជីពទេសចរណ៍ចូលរួមជាង៣ម៉ឺន៩ពាន់នាក់ មកពីជិត៩០ប្រទេស និងក្រុមហ៊ុនតាំងពិព័រណ៍ប្រមាណជាង៣ពាន់ក្រុមហ៊ុន ។
គួរបញ្ជាក់ថា ទេសចរណ៍សំខាន់ៗមកពីតំបន់អាស៊ីប៉ាស៊ីហ្វិក (រយៈពេល២ខែដើមឆ្នាំ២០១៧) គឺ៧២២.២៣៩នាក់ ស្មើនឹង៧០,៤%នៃចំនួនសរុប កើនឡើង១១,៦% ។ ក្នុងនោះមកពីតំបន់អាស៊ាន៣៣៧.៥១៧នាក់ ស្មើនឹង៣២,៩%នៃចំនួនសរុប កើនឡើង១៤,២%។ មកពីតំបន់អឺរ៉ុប២០៧.១១៥នាក់ ស្មើនឹង២០,២%នៃចំនួនសរុប កើនឡើង១២,៨% និងតំបន់អាមេរិក៨៩.១៦៧នាក់ ស្មើនឹង៨,៧%នៃចំនួនសរុប កើនឡើង១៤,៧% ៕
ចែករំលែកព័តមាននេះ