រាជធានីភ្នំពេញ ៖ ការនាំចេញអង្កររបស់កម្ពុជា នៅត្រីមាសទី១ឆ្នាំនេះមានកំណើនប្រមាណតែ៣%ប៉ុណ្ណោះ បើធៀបនឹងរយៈពេលដូចគ្នាឆ្នាំមុន ។ ការនាំចេញមិនរលូននេះ កម្ពុជាប្រាកដជាមិនអាចសម្រេចគោលដៅនាំចេញដែលរាជរដ្ឋាភិបាលកំណត់ឡើយ ។
តើកត្តាអ្វីខ្លះធ្វើឱ្យប៉ះពាល់ដល់ការនាំចេញអង្ករកម្ពុជា ?
អ្នកជំនាញក្នុងវិស័យស្រូវអង្ករ លោកឧកញ៉ា សុង សារ៉ន អគ្គនាយកក្រុមហ៊ុនអេមរុ រាយស៍ មានប្រសាសន៍ថា ការនាំចេញអង្កររបស់កម្ពុជានៅត្រីមាសទី១ឆ្នាំនេះមានកំណើនតិចតួច។ លោកថា ៖ « ទីផ្សារធំរបស់យើង គឺប្រទេសចិន៨០%នាំចូលអង្ករពីកម្ពុជា។ ដោយឡែក នៅអឺរ៉ុបកើនឡើងតិចតួចមិនទាន់ដល់កម្រិតខ្ពស់ដូចឆ្នាំមុនទេ ទីផ្សារមួយនេះពេញប្រៀបហើយ » ។
លោកបន្ថែមថា ៖ « ទីផ្សារយើងមានតែ២ទេ គឺសហគមន៍អឺរ៉ុប និងប្រទេសចិន។ ចំណែកទីផ្សារផ្សេងៗដូចជា ម៉ាឡេស៊ី អាហ្វ្រិក និងអាមេរិកបានធ្លាក់ចុះយ៉ាងគំហុកដោយសារប្រទេសថៃទម្លាក់តម្លៃអង្ករ ។ ការនាំចេញអង្ករកើនឡើងតិចតួចនៅត្រីមាសទី១ឆ្នាំនេះ ដោយសារទីផ្សារចិនបញ្ជាទិញកើនឡើង រីឯទីផ្សារសហគមន៍អឺរ៉ុបនៅទ្រឹង ហើយក៏មិនសង្ឃឹមថា នឹងកើនឡើងដែរ » ។
លោកឧកញ៉ា វង្ស ប៊ុនហេង នាយកក្រុមហ៊ុនវង្សប៊ុនហេង រ៉ាយស៍ មានប្រសាសន៍ថា៖ « ដោយសារថ្លៃដើមនៃការផលិតរបស់យើងខ្ពស់ជាងក្រុមអ្នកផលិតអង្ករនៅប្រទេសជិតខាង ហើយវិស័យឯកជនទទួលបានការគាំពារគោលនយោបាយពីរដ្ឋាភិបាលប្រទេសគេ ដែលជាហេតុធ្វើឱ្យក្រុមហ៊ុននាំចេញអង្ករកម្ពុជាពិបាកទាំងការប្រកួតប្រជែង និងដណ្តើមទីផ្សារនៅខាងក្រៅ » ។
លោកបន្តថា ៖ « យើងដឹងថា ទីផ្សារអង្ករកម្ពុជាអត់កើនឡើងទេ វាធ្វើឱ្យប៉ះពាល់ដល់គោលដៅរបស់ក្រុមហ៊ុនដែលកំណត់ទុក។ ដោយមើលឃើញបែបនេះ ក្រុមហ៊ុនបានប្តូរទិសដៅរបស់ខ្លួនពីការផ្គត់ផ្គង់នៅលើទីផ្សារខាងក្រៅមានចំនួនច្រើន មកផ្តត់ផ្គង់ក្នុងស្រុកច្រើនវិញ (៦០%) » ។
លោកបណ្ឌិត ហ៊ាន វណ្ណហន អគ្គនាយកនៃអគ្គនាយកដ្ឋានក្រសួងកសិកម្ម មានប្រសាសន៍ថា ៖ « ការនាំចេញកើនឡើងប្រហែល៣%នេះ តាមពិតទៅ វាស្ទើរតែមិនអាចនិយាយថា ជាកំណើនទេ ហើយក៏ជាបញ្ហាគួរឱ្យបារម្ភមួយផងដែរ ។ ការកើនឡើងតិចតួចនេះ ដោយសារតែការនាំចេញនាខែមីនាកន្លងទៅធ្លាក់ចុះខ្លាំងពេក គឺជាមូលហេតុ វាមិនពាក់ព័ន្ធនឹងទីផ្សារអឺរ៉ុប និងចិនទេ ។ វាជាកត្តាអន្តរជាតិដែលតម្លៃកសិផលធា្លក់ចុះ អីចឹងរាល់ការលក់ក៏លំបាកដែរ ព្រោះតម្លៃនៅលើទីផ្សារអន្តរជាតិធ្លាក់ចុះ ធ្វើឱ្យទីផ្សារហាក់ចង្អៀត » ។
លោកបណ្ឌិតបន្តថា ៖ « ការនាំចេញអង្ករនៅខែបន្ទាប់ ខ្ញុំគិតថា អ្វីជាគោលនយោបាយស្រូវអង្ករហាក់មិនទាន់ប្រែប្រួលថា នឹងមានអ្វីគាំទ្រដល់ការនាំចេញឱ្យកើនឡើងទេ » ។
តាមស្ថិតិរបស់អគ្គនាយកដ្ឋានកសិកម្មបង្ហាញថា ការនាំចេញអង្កររបស់កម្ពុជា នៅដើមត្រីមាសទី១ឆ្នាំ២០១២ ដល់ដើមត្រីមាសទី១ឆ្នាំ២០១៧ ឃើញថា សន្ទុះនៃការនាំចេញប្រែប្រួលគួរឱ្យកត់សម្គាល់ ។ តួយ៉ាង នៅត្រីមាសទី១ដើមឆ្នាំ២០១២ ការនាំចេញកើនឡើង៤៩%, ត្រីមាសទី១ឆ្នាំ២០១៣ កើនឡើងប្រមាណ២% ប៉ុន្តែមកដល់ត្រីមាសទី១ឆ្នាំ២០១៤ ធ្លាក់ចុះ១១% ។ នៅត្រីមាសទី១ដើមឆ្នាំ២០១៥ មានសន្ទុះឡើងវិញដល់៧៧% ហើយមកដល់ត្រីមាសទី១ឆ្នាំ២០១៦ ការនាំចេញមានកំណើនថមថយមកវិញត្រឹមតែ៨,៥៣% ហើយបន្តថមថយចុះថែមទៀតនៅត្រីមាសទី១ឆ្នាំ២០១៧នេះ ស្មើតែ២,៧៤% ឬ៣% ខណៈការនាំអង្ករចេញស្មើ១៦៦.៦៧៨តោន បើធៀបនឹងឆ្នាំ២០១៦ ។
របាយការណ៍របស់ធនាគារអភិវឌ្ឍន៍អាស៊ី (ADB) បង្ហាញថា បន្ទាប់ពីមានកំណើនក្នុងអត្រាមធ្យមប្រចាំឆ្នាំ៥,៨%ចាប់ពីឆ្នាំ២០០៣ ដល់២០១២ កំណើនជាមធ្យមនៃវិស័យកសិកម្ម គឺត្រឹមក្រោម១,០%ប៉ុណ្ណោះ គិតចាប់ពីឆ្នាំ២០១៣ ដល់ឆ្នាំ២០១៦ ។ អាកាសធាតុមិនអំណោយផលអាចជាហេតុផលមួយដែលនាំឲ្យថមថយកាលពីពេលថ្មីៗនេះ ប៉ុន្តែនៅមានបញ្ហាផ្សេងៗជាច្រើនទៀតដែលចាក់ឫសយ៉ាងជ្រៅក្នុងវិស័យនេះ ។
ការសិក្សាមួយលើវិស័យកសិកម្មកម្ពុជា ធ្វើឡើងដោយធនាគារពិភពលោកកាលពីឆ្នាំ២០១៥ រកឃើញថា ឧបសគ្គសំខាន់ៗដែលធ្វើឲ្យរាំងស្ទះដល់ការបង្កើនផលិតភាព និងការធ្វើពិពិធកម្ម រួមមាន កសិករយឺតយ៉ាវក្នុងការប្រើប្រាស់គ្រាប់ពូជមានគុណភាពខ្ពស់, ការប្រើប្រាស់ជីមានកម្រិតទាប, ហេដ្ឋារចនាសម្ព័ន្ធធារាសាស្ត្រមិនគ្រប់គ្រាន់ និងសេវាផ្សព្វផ្សាយកសិកម្មនៅមានតិច ៕
ចែករំលែកព័តមាននេះ