ខេត្តព្រះវិហារ ៖ រោងចក្រផលិតស្ករសរបស់ក្រុមហ៊ុនរ៉ូយ ហ្វេង បានស្នើឲ្យប្រជាពលរដ្ឋ ក៏ដូចជាកសិករធ្វើកសិកម្មតាមកិច្ចសន្យាដាំដុះដំណាំអំពៅលក់ឲ្យក្រុមហ៊ុនដើម្បីបង្កើនប្រាក់ចំណូល ខណៈបច្ចុប្បន្ននេះ រោងចក្របានចាប់ផ្ដើមដំណើរការផលិតឡើងវិញហើយ ដែលអាចផលិតស្ករសក្នុង១ថ្ងៃជាង២ពាន់តោន និងគ្រោងនាំចេញទៅកាន់ទីផ្សារលើពិភពលោក រាប់ម៉ឺនតោនក្នុង១ឆ្នាំ ប៉ុន្តែក្រុមហ៊ុនត្រូវការអំពៅកិនផលិតស្ករសបន្ថែមទៀតដើម្បីបំពេញតម្រូវការផលិតរបស់រោងចក្រ ព្រោះតែក្រុមហ៊ុនមានផ្ទៃដីដាំដុះដំណាំអំពៅមិនគ្រប់គ្រាន់នៅឡើយទេ ។
លោក ហ្គួយ យៀង តំណាងក្រុមហ៊ុនរ៉ូយ ហ្វេង ឲ្យដឹងថា បច្ចុប្បន្ននេះ រោងចក្រផលិតស្ករសរបស់ក្រុមហ៊ុនរ៉ូយ ហ្វេង បានដំណើរការយ៉ាងសកម្ម ដោយកិនអំពៅកាត់ពីក្រុមហ៊ុន និងទិញពីប្រជាពលរដ្ឋដែលបានដាំដំណាំនេះ តាមរយៈការធ្វើកសិកម្មតាមកិច្ចសន្យា ក្នុង១ថ្ងៃចូលរោងចក្រកិនចំនួន២ម៉ឺនតោន និងអាចផលិតស្ករសបានប្រមាណជាង២ពាន់តោនក្នុងមួយថ្ងៃ។ លោកថ្លែងថា ៖ « ជាទូទៅ រោងចក្រនេះដំណើរការរយៈពេលចន្លោះពី៦០ទៅ៩០ថ្ងៃប៉ុណ្ណោះក្នុង១ឆ្នាំ គិតចាប់ពីថ្ងៃប្រមូលផលដំណាំអំពៅ » ។
លោក ហ្គួយ យៀង បន្តទៀតថា បើទោះបីជារោងចក្រកំពុងដំណើរការផលិតស្ករសយ៉ាងសកម្មក្នុង១ថ្ងៃៗក៏ពិតមែន ប៉ុន្ដែក្រុមហ៊ុននៅតែត្រូវការអំពៅបន្ថែមទៀតសម្រាប់កិនដើម្បីឲ្យគ្រប់គ្រាន់តាមតម្រូវការរបស់រោងចក្រ ដែលកំពុងផលិតស្ករស ព្រោះពេលនេះដំណាំអំពៅរបស់ក្រុមហ៊ុនដាំដុះទើបតែបានជិត២ម៉ឺនហិកតាប៉ុណ្ណោះលើផ្ទៃដីជាង៤ម៉ឺនហិកតា គឺមិនទាន់គ្រប់គ្រាន់នៅឡើយទេសម្រាប់ដឹកចូលរោងចក្រផលិតស្ករស ហើយនាពេលខាងមុខនេះ ក្រុមហ៊ុនត្រូវការបន្ថែមផ្ទៃដីដាំអំពៅ និងគ្រោងស្នើទៅរាជរដ្ឋាភិបាលដើម្បីសុំរកទីតាំងណាសមស្របសម្រាប់ដាំដុះដំណាំអំពៅនេះបន្ថែមទៀត ។
លោកបន្ថែមថា ដូច្នេះហើយក្រុមហ៊ុនស្នើដល់កសិករទាំងអស់ ក៏ដូចជាអ្នកដែលរស់នៅក្បែរតំបន់រោងចក្រផលិតស្ករសទាំងអស់ បើមានចំណាប់អារម្មណ៍ដាំដំណាំអំពៅនេះអាចទំនាក់ទំនងមកកាន់ក្រុមហ៊ុន ដើម្បីផ្តល់ព័ត៌មានបន្ថែមក្នុងការធ្វើកសិកម្មតាមកិច្ចសន្យាជាមួយក្រុមហ៊ុន ។
លោកបញ្ជាក់ថា ក្រុមហ៊ុននឹងផ្តល់អាទិភាពជូនពូជអំពៅដាំដុះជាមុនសិន រហូតដល់ពេលប្រមូលផលលក់ឲ្យក្រុមហ៊ុន ទើបក្រុមហ៊ុនកាត់ថ្លៃពូជអំពៅវិញ ។
លោកបញ្ជាក់ទៀតថា ៖ « ជាទូទៅ ដំណាំអំពៅនេះដាំដុះចាប់ពីដើមរដូវប្រាំងឡើងទៅ និងអាចប្រមូលផលបានរយៈពេល១០ខែក្រោយដាំដុះ ហើយដាំដុះម្តងអាចទទួលផលបាន៤ឆ្នាំ ទើបត្រូវធ្វើដីដាំដុះថ្មីទៀត រីឯទិន្នផលទទួលបាន៦០តោនឡើងទៅក្នុង១ហិកតា » ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លើកឡើងថា ការដាំដុះដំណាំអំពៅរបស់ក្រុមហ៊ុន គឺពិតជាមិនទាន់គ្រប់គ្រាន់ទៅនឹងសង្វាក់ផលិតកម្មរោងចក្រនៅឡើយទេ ព្រោះរោងចក្រនេះជារោងចក្រដ៏ធំជាងគេនៅអាស៊ី និងត្រូវការអំពៅច្រើនសម្រាប់កិនផលិតស្ករស ។
លោកប្រធានមន្ទីរបន្តថា ផ្ទៃដីដាំដុះដំណាំអំពៅរបស់ក្រុមហ៊ុនបច្ចុប្បន្ននេះ នៅសល់ត្រឹមតែ៤ម៉ឺនហិកតាប៉ុណ្ណោះ ខណៈដំបូងឡើយ ក្រុមហ៊ុនទទួលបានសិទ្ធិវិនិយោគប្រមាណជិត៥ម៉ឺនហិកតា ប៉ុន្តែដោយសារតែមានផលប៉ះពាល់ជាមួយប្រជាពលរដ្ឋ ក្រុមហ៊ុន និងអាជ្ញាធរបានកាត់ដីប៉ះពាល់ទៅឲ្យប្រជាពលរដ្ឋវិញមួយចំនួនធំដោយស្របច្បាប់ ។
លោក ពឹង ទ្រីដា បន្តថា ៖ « បច្ចុប្បន្ន កសិករដែលបានចុះកិច្ចសន្យាដាំដុះដំណាំអំពៅលក់ឲ្យក្រុមហ៊ុន ពេលនេះពួកគេប្រមូលចំណូលច្រើនគួរសម បើប្រៀបធៀបនឹងដំណាំស្រូវ កើនឡើងទ្វេដង » ។
លោកលើកឡើងថា កន្លងទៅ មន្ទីរជំនាញ និងក្រុមហ៊ុនតែងតែផ្សព្វផ្សាយតាមរយៈអាជ្ញាធរមូលដ្ឋានឲ្យដល់ប្រជាពលរដ្ឋ ប្រសិនបើមានចំណាប់អារម្មណ៍នឹងការដាំដុះនេះ អាចទំនាក់ទំនងមកកាន់ក្រុមហ៊ុន ខណៈបច្ចុប្បន្ន ប្រជាពលរដ្ឋមួយចំនួនក៏កំពុងដាក់សំណើមកក្រុមហ៊ុនជាច្រើនទៀត ដើម្បីធ្វើកសិកម្មតាមកិច្ចសន្យាជាមួយក្រុមហ៊ុន ។
សូមបញ្ជាក់ថា បច្ចុប្បន្ននេះ ប្រជាពលរដ្ឋ ដែលរស់នៅភូមិពោធិ៍ ភូមិប្រមេរ ស្រុកត្បែងមានជ័យ ខេត្តព្រះវិហារ ក្បែរតំបន់រោងចក្រផលិតស្ករស បានធ្វើកសិកម្មតាមកិច្ចសន្យាជាមួយក្រុមហ៊ុន ប្រមាណជិត១០០គ្រួសារហើយ ដែលបានដាំដុះដំណាំអំពៅលក់ឲ្យក្រុមហ៊ុន ។
គួររំឭកថា រោងចក្រផលិតស្ករសនេះ បានចាប់ផ្តើមដំណើរការជាលើកទី២ហើយក្នុងឆ្នាំ២០១៧ បន្ទាប់ពីរោងចក្របានដាក់សម្ពោធឲ្យដំណើរការជាផ្លូវការកាលពីខែមេសា ឆ្នាំ២០១៦កន្លងទៅ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា ៕
ចែករំលែកព័តមាននេះ