ជឿឬទេថា ប៉ុន្មាននាទីមុនពេលធ្វើការ អាចធ្វើឲ្យប៉ះពាល់ដល់ប្រសិទ្ធភាពការងាររបស់អ្នករយៈពេល៨ម៉ោងក្នុង១ថ្ងៃបាន ? ការមកដល់ការិយាល័យយឺត ឬរវល់តែមើលអីុម៉ែល គឺអាចនឹងបាត់បង់សមាធិក្នុងការបំពេញការងារ ។
ជឿឬទេថា ប៉ុន្មាននាទីមុនពេលធ្វើការ អាចធ្វើឲ្យប៉ះពាល់ដល់ប្រសិទ្ធភាពការងាររបស់អ្នករយៈពេល៨ម៉ោងក្នុង១ថ្ងៃបាន ? ការមកដល់ការិយាល័យយឺត ឬរវល់តែមើលអីុម៉ែល គឺអាចនឹងបាត់បង់សមាធិក្នុងការបំពេញការងារ ។
តាមការស្រាវជ្រាវបង្ហាញថា លក្ខណៈ៨ប្រភេទដែលមិនគួរធ្វើក្នុងពេល១០នាទីដំបូងនៅពេលព្រឹក មុនចេញមកធ្វើការ បើពុំនោះទេ អាចនឹងប៉ះពាល់ដល់ប្រសិទ្ធភាពក្នុងការបំពេញការងាររបស់អ្នកពេញ១ថ្ងៃ ។ តើលក្ខណៈដែលគួរចៀសវាងទាំងនេះមានអ្វីខ្លះ ?
១-ចូលធ្វើការយឺតយ៉ាវ ៖
សៀវភៅអនឡាញ The Huffington Post បានបង្ហាញពីការស្រាវជ្រាវចុងក្រោយបំផុតថា ចៅហ្វាយនាយតែងមើលទៅកូនចៅដែលមកធ្វើការយឺតថា ជាមនុស្សខ្វះការភ្ញាក់រលឹក និងសម្លឹងឃើញការធ្វើការរបស់ពួកគេមិនបានល្អ ទោះបីជាកូនចៅនោះធ្វើការលើសម៉ោង ដើម្បីតបស្នងនឹងពេលវេលាដែលមកយឺតក្តី ។
វាមើលទៅមិនយុត្តិធម៌ ប៉ុន្តែទោះជាយ៉ាងណា គឺជាការពិត ដូច្នេះ កុំមកយឺតយ៉ាវ ហើយប្រញាប់ទៅដល់ការិយាល័យឲ្យបានមុនម៉ោងចូលធ្វើការ ទើបជាការល្អ ។
២-មិនហ៊ានរាក់ទាក់មិត្តរួមការងារ ៖
អ្នកអាចបង្កើតបរិយាកាសល្អដល់ខ្លួនឯង និងកន្លែងធ្វើការផងដែរ ដោយគ្រាន់តែប្រើពេលវេលា២-៣នាទីក្នុងការរាក់ទាក់ ឬជជែកជាមួយមិត្តរួមការងារ ។
អ្នកជំនាញពាក់ព័ន្ធនឹងទីកន្លែងការងារ បានឲ្យដឹងថា បើស្ថិតក្នុងតំណែងជួរអ្នកដឹកនាំ ប៉ុន្តែបែរជាមិនរាក់ទាក់បុគ្គលិករួមការងារ ឬកូនចៅនោះ អ្នកនឹងត្រូវគេមើលទៅក្នុងផ្លូវអវិជ្ជមាន ។
ចំណែកបុគ្គលមិនមែនជាអ្នកចាត់ការ ប៉ុន្តែការធ្វើខ្លួនស្ងៀមស្ងាត់ ក៏អាចធ្វើឲ្យអ្នកមើលទៅលំបាកក្នុងក្រសែភ្នែកមិត្តរួមការងារដូចគ្នាដែរ ។
៣-ផឹកកាហ្វេ ៖
តាមការស្រាវជ្រាវមួយបង្ហាញថា ពេលវេលាសមស្របបំផុតក្នុងការផឹកកាហ្វេ គឺចាប់ពីម៉ោង៩កន្លះទៅ ព្រោះ Stress hormones Cortisol នឹងជួយឲ្យរាងកាយ និងខួរក្បាលបំពេញការងារបានល្អបំផុត មានន័យថា បើអ្នកផឹកកាហ្វេមុនម៉ោង៩ព្រឹក រាងកាយនឹងផលិតអូម៉ូន Cortisol បានតិច ហើយឈានទៅដល់ការផឹកកាហ្វេច្រើនលើសដើមទៅទៀត ។
៤-ឆ្លើយតបគ្រប់អីុម៉ែលទាំងអស់ ៖
ពេលមកដល់តុធ្វើការ ការអង្គុយឆ្លើយតបអីុម៉ែលរបស់អតិថិជន គឺជាអ្វីដែលអ្នកត្រូវធ្វើស្រាប់ហើយ ប៉ុន្តែលោក Michael Kerr អ្នកជំនាញសេដ្ឋកិច្ចអន្តរជាតិ និងជាអ្នកសរសេរសៀវភៅ “You Can’t Be Serious! Putting Humor to Work” បែរជាស្នើថា រឿងដំបូងដែលគួរធ្វើពេលមកដល់កន្លែងធ្វើការ គឺការឆ្លើយតបអីុម៉ែលខ្លះៗ មិនទាំងអស់ទេ ដើម្បីចាត់ភាពសំខាន់ ជាពិសេសគឺឆ្លើយតបតែអីុម៉ែល ណាដែលសំខាន់ ឬប្រញាប់ជាមុនប៉ុណ្ណោះ។ ការធ្វើបែបនេះ នឹងមិនខាតពេលវេលាជាមួយអីុម៉ែលដែលអាចឆ្លើយតបនៅពេលក្រោយបាន ។
លោក Kerr បានផ្តល់បទសម្ភាសន៍ជាមួយ Business Insider ថា ៖ « ការមើលសារអាចជាកិច្ចការដែលត្រូវធ្វើ និងមានអារម្មណ៍ថា បានធ្វើការងារមួយសម្រេចក៏ពិតមែន តែវាក៏ធ្វើឲ្យអ្នកមិនបានធ្វើការងារផ្សេងដែលសំខាន់ជាងនេះ » ។
៥-គ្មានផែនការការងារ ៖
Taylor លើកឡើងថា មុនពេលអ្នកបំពេញការងារដោយការតាំងចិត្ត ត្រូវតប្រាកដចិត្តជាមុនថា បានដាក់ផែនការងារការត្រួសៗហើយឬនៅ រួមទាំងការកត់ត្រាអ្វីដែលត្រូវធ្វើតាមលំដាប់ភាពសំខាន់ជាមុនក្នុង១ថ្ងៃ បន្ទាប់ពីនេះ អាចធ្វើតាមតារាងកំណត់ទុក ។
ការពិនិត្យផែនការការងារ គឺដើម្បីដឹងថា មានការងារដែលត្រូវត្រៀម ត្រូវទូរស័ព្ទរកអ្នកណា ឬមានប្រជុំនៅកន្លែងណាឬទេ ព្រោះបើមិនមើលតារាងជាមុនទេ អាចកើតហេតុការណ៍ថា កំពុងតែបំពេញការងារសុខៗ ស្រាប់តែនឹកឡើងថា មានប្រជុំនៅប៉ុន្មាននាទីខាងមុខ ។
៦-ធ្វើការងារស្រួលបំផុតជាមុន ៖
តាមការស្រាវជ្រាវមួយចំនួនបានផ្តល់ជាយោបល់ថា កម្លាំង និងការតាំងចិត្តរបស់អ្នក គឺតែងថយចុះជាប្រចាំតាមពេលកន្លងផុតទៅ ដូច្នេះ វាជាការល្អដែលត្រូវប្រញាប់ធ្វើការងារសំខាន់ឲ្យរួចរាល់ជាមុនសិន ។
មនុស្សមួយចំនួនហៅយុទ្ធសាស្ត្រនេះថា «សមរភូមិហូបកង្កែប» ជាពាក្យល្បីល្បាញរបស់ Mark Twain និយាយថា «ចូរហូបកង្កែបដំបូងនៅពេលព្រឹក ហើយក្នុង១ថ្ងៃ អ្នកនឹងមិនជួបអ្វីដែលពិបាកជាងនេះទៀតឡើយ» មានន័យថា ពេលធ្វើការពិបាកៗរួចហើយ ថ្ងៃនោះពេញ១ថ្ងៃ គឺនៅសល់តែការងារស្រួលៗ ។
៧-ធ្វើការងារច្រើនមុខជាមួយគ្នា ៖
ពេលខ្លះ យើងមានអារម្មណ៍ថា មានកម្លាំងធ្វើការងារដ៏ច្រើនលើសលស់ និងអាចធ្វើអ្វីបានច្រើនយ៉ាងក្នុងពេលតែមួយ ។
តាមការស្រាវជ្រាវមួយឲ្យដឹងថា ការធ្វើការជាច្រើនយ៉ាងជាមួយគ្នា គឺអាចនឹងធ្វើឲ្យគុណភាពការងារនោះថយចុះ ។ ដូច្នេះ បើអ្នកចាប់ផ្តើមថ្ងៃថ្មីដោយធ្វើការសំខាន់ៗជាមួយគ្នានោះ គុណភាពការងារ ឬលទ្ធផលដែលចេញមក អាចនឹងមិនល្អប៉ុន្មានទេ ។ ហេតុនេះ គួរតែធ្វើការងារសំខាន់ឲ្យរួចរាល់ប្រសើរជាង ។
៨-នៅជាមួយការគិតអាក្រក់ៗ ៖
អ្នកអាចត្រូវមនុស្សប្លែកមុខមកពីណាក៏មិនដឹង ដើរជល់អ្នករហូតដួល ឬក៏មានបញ្ហាជាមួយមនុស្សជាទីស្រឡាញ់នៅផ្ទះ ប៉ុន្តែទោះជាយ៉ាងណា ហាមយកបទពិសោធន៍អាក្រក់ៗខាងលើនេះមកបំផ្លាញសមាធិរបស់អ្នកជាដាច់ខាត ពេលបំពេញការងារចាំបាច់ ។
Taylor ណែនាំថា គួរធ្វើអារម្មណ៍ឲ្យល្អជាមុនសិន និងទុកអារម្មណ៍ល្អក់កករនោះទៅកន្លែងណាមួយ គឺត្រូវបែងចែកវាឲ្យដាច់ មុននឹងចាប់ផ្តើមធ្វើការងារ ៕
ចែករំលែកព័តមាននេះ