រាជធានីភ្នំពេញ ៖ ក្រោយដាក់ការសង្ស័យតារាចម្រៀង ពេជ្រ សោភា និងលោក ឆឹម សក្កដា បានបង្ហាញសកម្មភាពស្និទ្ធស្នាលជាមួយគ្នា និងបានភ្ជាប់ទំនាក់ទំនងស្នេហារបស់ពួកគេឡើងវិញហើយ បន្ទាប់ចំណងស្នេហ៍នេះត្រូវបានប្រេះឆា រហូតកាត់ផ្តាច់អស់រយៈពេលប៉ុន្មានឆ្នាំមកនេះ។
ទំនាក់ទំនងស្នេហ៍ជាថ្មីឡើងវិញនេះ បានស្តែងអោយមហាជនបានឃើញ បន្ទាប់ពីអ្នកទាំងពីរចូលរួមពិធីមង្គលការក្មួយប្រុសរបស់ ពេជ្រ សោភា ដែលបានរៀបចំឡើងកាលពីពេលថ្មីៗនេះ។
តាមរយៈរូបភាព សកម្មភាពដែលត្រូវបានគេចែកចាយនៅលើបណ្តាញសង្គមនោះ បានឃើញ ពេជ្រ សោភា និងលោក ឆឹម សក្កដា បានចាប់គូគ្នាឡើងកាត់សក់អោយក្មួយ និងបានឈរកៀកកិតគ្នានៅពីមុខរោងការ ដើម្បីស្វាគមន៍ភ្ញៀវដែលបានអញ្ជើញមកថែមទៀតផង។ ហើយអ្វីដែលកាន់តែពិសេសនោះ អ្នកទាំងពីរក៏បានបង្ហាញសកម្មភាពអោបរឹតកៀកកើយគ្នាយ៉ាងស្និទ្ធស្នាលនៅចំពោះមុខភ្លៀវកិត្តិយស និងមិត្តសិល្បៈក្នុងអំឡុងពេលកូនកំលោះ និងកូនក្រមុំដើរចូលទៅក្នុងពិធីកាត់នំទៀតផង។
តាមរយៈសកម្មភាពទាំងអស់នេះ បានធ្វើអោយមហាជនកាន់តែច្បាស់ណាស់ថា ពេជ្រ សោភា និង ឆឹម សក្កដា ពិតជាបង្កាត់ភ្លើងស្នេហ៍ជាមួយគ្នាឡើងវិញ ក្រោយស្នេហារបស់ពួកគេបានដើរដល់ផ្លូវបំបែកអស់រយៈពេលប៉ុន្មានឆ្នាំមកនេះ។
ជាការកត់សម្គាល់ នៅមុនពេលបង្ហាញសកម្មភាពស្និទ្ធស្នាលនាពេលនេះ ទាំង ពេជ្រ សោភា និងលោក ឆឹម សក្កដា បានធ្វើការចែកចាយរូបភាពវីដេអូចាស់ៗដែលពួកគេធ្លាប់សម្តែងរួមគ្នានាពេលកន្លងមក និងសារប្លែកៗមួយចំនួនទៀតនៅលើបណ្តាញសង្គម។ ចំណុចទាំងអស់នេះ ត្រូវបានមហាជនដាក់ការសង្ស័យថា អ្នកទាំងពីរទំនងជាចាប់ផ្តើមកសាងទំនាក់ទំនងស្នេហាជាមួយគ្នាឡើងវិញហើយ ខណៈពេលសកម្មភាពខាងលើនេះ គឺជាចំណុចចាប់ផ្តើម។
មកដល់ពេលនេះ ការសង្ស័យបានលេចចេញជារូបរាងការពិតហើយ បន្ទាប់ពីអ្នកទាំងពីរបានបង្ហាញភាពស្និទ្ធស្នាលជាថ្មីនៅថ្ងៃមង្គលការក្មួយនាពេលនេះ។ យ៉ាងណាទស្សនិកជន ជាពិសេសបណ្តាអ្នកគាំទ្របានចូលរួមសម្តែងការអបអរសាទរសម្រាប់ពន្លកស្នេហ៍របស់ ពេជ្រ សោភា និង ឆឹម សក្កដា ដែលដុះសារជាថ្មីឡើងវិញ។ ហើយគេរំពឹងថា ចំណងស្នេហ៍របស់ពួកគេនឹងអាចឈានដល់មង្គលការជាផ្លូវការនាពេលឆាប់ៗខាងមុខនេះ៕
ចែករំលែកព័តមាននេះ