ប៉ុន្មានថ្ងៃចុងក្រោយនេះ ហាក់ដូចជាមានការវែកញែកជាខ្លាំងពេញបណ្តាញសង្គមហ្វេកប៊ុក និង TikTok នូវបទ Rap របស់តារា Rappers ខ្មែរ២រូប គឺលោក Vanda និង G-Devith។ កំពូលតារា rap ទាំងពីរដួង ដែលសុទ្ធតែមានហ្វេនៗអ្នកគាំទ្រយ៉ាងសន្ធឹក ត្រូវបានគេមើលឃើញថា
រាជធានីភ្នំពញ ៖ ប៉ុន្មានថ្ងៃចុងក្រោយនេះ ហាក់ដូចជាមានការវែកញែកជាខ្លាំងពេញបណ្តាញសង្គមហ្វេកប៊ុក និង TikTok នូវបទ Rap របស់តារា Rappers ខ្មែរ២រូប គឺលោក Vanda និង G-Devith។ កំពូលតារា rap ទាំងពីរដួង ដែលសុទ្ធតែមានហ្វេនៗអ្នកគាំទ្រយ៉ាងសន្ធឹក ត្រូវបានគេមើលឃើញថា កំពុងតែចេញបទចម្រៀង rap ឌឺដងបាញ់គ្នាដូចគ្រាប់ផ្លោង ខណៈអ្នកគាំទ្ររបស់តារាទាំងពីរ ក៏ហាក់ឈឺចិត្តស្អិតទ្រូងមិនតិចទេ រហូតមានការប្រៀបធៀបថា តើរវាងតារា Rap ទាំងពីរដួង នរណាគួរឱ្យស្រលាញ់ជាង?។
ប្រាកដណាស់ មិនថាវិស័យអ្វីនោះទេ គឺមិនគួរមានការប្រៀបធៀបគ្នានោះទេ តួយ៉ាងដូចជាការប្រៀបធៀបតារារ៉េប វណ្ណា និងតារារ៉េប ជី ដេវីដ ព្រោះអ្នកទាំងពីរសុទ្ធតែមានចំណុចល្អ និងចំណុចខ្លាំងរៀងៗគ្នា។
ទន្ទឹមនឹងនោះ ក្រៅពីការប្រៀបធៀបចំៗរវាងលោក វណ្ណា និង ជី ដេវីដ នោះ ក៏មានការលេងរបៀបកំប្លែងពីបងប្អូនអ្នកប្រើប្រាស់បណ្តាញសង្គមខ្លះ ដោយគាត់ពោលថា មិនជ្រើសរើស វណ្ណា ឬ G-davith ទេ តែគេចង់បាន អ៊ីណូ តារាចម្រៀងថ្គាមធំ សម្លេងស្អក ដែលតែងតែមានក្បាច់រាំប្លែកៗបង្ហាញទស្សនិកជន។
ហាក់មិនចង់ឱ្យប្រិយមិត្តអ្នកគាំទ្រខកចិត្ត អ្វីដែលយើងនឹកស្មានមិនដល់នោះ គឺថាពេលនេះ លោក អ៊ីណូ បានប្រកាសក្តែងៗថា លោកនឹងចេញនូវបទចម្រៀងបែប Rap មួយបទដែលមានចំណងជើងថា «ENO IS BACK» ដែលមានន័យថា «លោក អ៊ីណូ ត្រឡាប់មកវិញហើយ។ លោក អ៊ីណូ បានប្រកាសដំណឹងពីការចេញបទចម្រៀងនេះ ដោយបានបង្ហោះសារនៅលើបណ្តាញសង្គមរបស់លោក ដោយសរសេរសារយ៉ាងខ្លី និងមានខ្លឹមសារថា «រួចរាល់នៅ» ដែលត្រង់នេះ លោកចង់សំដៅថា បងប្អូនទាំងគ្នាត្រៀមខ្លួនហើយឬនៅ ក្នុងការទទួលយកនៅបទថ្មីរបស់លោក ដែលមានចំណងជើង «ENO IS BACK»។
ទាក់ទងជាមួយនឹងបទមួយនេះ លោក អ៊ីណូ ក៏បានបង្ហើបប្រាប់កម្មវិធី 60Buzz របស់សារព័ត៌ មានកោះសន្តិភាពថា បទចម្រៀងថ្មីរបស់លោកនេះ គឺរៀបរាប់ពីខ្លួនរបស់លោកផ្ទាល់ ជាពិសេសតាមរយៈបទមួយនេះ លោកច្រៀងអរគុណដល់អ្នកគាំទ្រតែម្តង ព្រោះបទ Rap មួយបទនេះជាការស្នើសុំរបស់ហ្វេន ហើយបទមួយនេះទៀតសោត ច្រៀងពីជីវិតរបស់លោកផ្ទាល់ដែលបានចូលសិល្បៈជាង១០ឆ្នាំមកនេះ។ បើតាមការអោយដឹង បទមួយនេះមានរយៈពេលប្រមាណជាជាង៤នាទីទៅ៥នាទី ។
ជាការពិតណាស់ ទាក់ទងជាមួយសារដែលលោកបានបង្ហោះ មានអ្នកគាំទ្រជាច្រើនចូលទៅបញ្ចេញមតិថា «លឿនឡើងមេ កូនចៅចាំស្តាប់» «ប៉ះណា ប៉ះទៅ ប៉ះអាយដល អ៊ីណូ អោយស្ពៃ និងប៉ះ អ៊ីណូ អោយស្ពៃបូកគោអានាង»។ តាមរយៈសារខមិនរបស់ហ្វេន ហាក់ដូចមានគាំទ្រខ្លាំងនៅបទចម្រៀងមួយនេះ ទោះបីជាបទមួយនេះ មិនទាន់ចេញជាផ្លូវការក៏ដោយ ប៉ុន្តែដូចជាមានការគាំទ្រយ៉ាងខ្លាំង ដូច្នេះកុំភ្លេចណាល្ងាចនេះ រង់ចាំនៅបទ Rap ថ្មី របស់លោកអ៊ីណូ។
យ៉ាងណាមិញ ថ្លែងបញ្ជាក់ប្រាប់កម្មវិធី 60Buzz លោក អ៊ីណូ បានគូសបញ្ជាក់ថា «បទ Rap ថ្មីមួយនេះ របស់លោក គឺពុំមានចេនាណាមួយ ច្រៀងឌឺដងផ្លែផ្លាអោយបងប្អូនៗ G-Devith និង Vanda នោះទេ។ ដោយបទមួយនេះ គ្រាន់តែជាការស្នើសុំរបស់ហ្វេនៗ អ្នកគាំទ្រតែប៉ុណ្ណោះ»។
លោកបន្តថា «បទចម្រៀងបែប rap មានចំណងជើងថា «ENO is back» មួយនេះ លោកបានចំណាយពេលរហូតដល់ទៅ១២ថ្ងៃក្នុងការផលិតនៅបទមួយនេះ។ តាមរយៈបទមួយនេះ លោកសង្ឃឹមថា ប្រាកដជាផ្ទុះជាក់ជាមិនខាន ព្រោះនេះជាស្នាដៃដែលលោកបានខំប្រឹងទាំងយប់ទាំងថ្ងៃ ផលិតនៅបទនេះឡើង ដើម្បីហ្វេនៗរបស់លោក។ ជាចុងក្រោយ លោកអ៊ីណូ ក៏បានជូនពរទៅហ្វេនរបស់លោក ទាំងក្នុង និងក្រៅ អោយជួបតែសំណាងល្អ សុខភាពល្អ ចៀសឆ្ងាយពីជំងឺផ្សេងៗ និងហេងៗទាំងអស់គ្នាណា»។
ចែករំលែកព័តមាននេះ