ព័ត៌មានបន្ថែមជុំវិញមរណភាពគួរឱ្យភ្ញាក់ផ្អើល ក្នុងតំបន់«ផាប់ស្ទ្រីត»
ខេត្តសៀមរាប ៖ កម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានឃាត់ខ្លួនម្ចាស់ទីតាំងម៉ាស្សា មួយកន្លែង
ខេត្តសៀមរាប ៖ កម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត បានឃាត់ខ្លួនម្ចាស់ទីតាំងម៉ាស្សា មួយកន្លែង នៅក្នុងតំបន់ផាប់ស្ទ្រីត បន្ទាប់ពីហេតុការណ៍ខ្សែភ្លើងឆក់ក្មេងស្រីម្នាក់ បណ្ដាលឱ្យស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោងប្រមាណ១រំលងអធ្រាត្រថ្ងៃទី១៦ ឈានចូលថ្ងៃទី១៧ មេសា ដែលជាថ្ងៃ វរៈឡើងស័ក ក្នុងឱកាសបុណ្យចូលឆ្នាំថ្មី ឆ្នាំរកា នព្វស័ក ព.ស២៥៦១ គ.ស២០១៧ ក្នុងរយៈពេល៣ថ្ងៃ នៅលើទឹកដីប្រវត្តិសាស្ត្រ ខេត្តសៀមរាប ស្ថិតនៅភូមិមណ្ឌល១ សង្កាត់ស្វាយដង្គំ ក្រុងសៀមរាប ។
លោកវរសេនីយ៍ឯក ដួង សុខា នាយការិយាល័យ នគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តបានប្រាប់ថា ម្ចាស់ទីតាំង ម៉ាស្សា មួយកន្លែងត្រូវបានឃាត់ខ្លួន ដោយចោទពីបទឃាតកម្ម ដោយអចេតនា ទៅលើក្មេងស្រីម្នាក់អាយុ១៤ឆ្នាំ ខណៈជនរងគ្រោះកំពុងរាំ និងបាញ់ទឹកលេងនៅចំណុច Pub Street ស្ថិតនៅភូមិមណ្ឌល១ សង្កាត់ស្វាយដង្គំ ក្នុងក្រុងសៀមរាប កាលពីយប់រំលងអធ្រាត្រឈានចូលថ្ងៃទី១៧ ខែមេសា ឆ្នាំ២០១៧ ជាថ្ងៃចុងក្រោយនៃពិធីបុណ្យចូលឆ្នាំថ្មីប្រពៃណីខ្មែរ ។ នៅពេលនេះកំពុងឃុំខ្លួន នៅស្នងការដ្ឋាននគរបាលខេត្តសៀមរាប ចំណែកទីតាំងត្រូវបានបិទជាបណ្តោះអាសន្នផងដែរ ។
លោក ដួង សុខា បន្ថែមថា ករណីនេះពិតជាឆក់ខ្សែភ្លើងប្រាកដមែន ។ តាមការពិនិត្យ នៅកន្លែងកើតហេតុពេលដែលឆក់ ក្មេងស្រីបានកាន់បង្គោលដែក ដែលមានខ្សែភ្លើងលយ ចេញមកចិញ្ចើមផ្លូវសម្រាប់ដោតបំភ្លឺ ស្លាកយីហោម៉ាស្សា ។ លោកបានបន្ថែមទៀតថា តាមការធ្វើកោសល្យវិច័យទៅលើដងខ្លួនជនរងគ្រោះ កម្លាំងការិយាល័យជំនាញបច្ចេកទេស នៅកន្លែងកើតហេតុ គឺបានកំណត់ថា ពិតជាឆក់នៅកន្លែងហាងនោះពិតប្រាកដមែន ។ ដោយសារទីតាំងនោះ មានការធ្វេសប្រហែស ។
លោកបានបញ្ជាក់ទៀតថា ម្ចាស់ទីតាំងម៉ាស្សាមានឈ្មោះ មាស សុភ័ក្ត ភេទស្រី អាយុ៣៦ឆ្នាំ បច្ចុប្បន្នរស់នៅភូមិវិហារចិន សង្កាត់ស្វាយដង្គំ ក្រុងសៀមរាប ។ ចំណែកក្មេងស្រីមានឈ្មោះ លី មុនីរដ្ឋានី អាយុ១៤ឆ្នាំ ត្រូវជាប្អូនពៅរបស់តារាសម្តែងនាង លី មុនីនាថ មានស្រុកកំណើតនៅភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ ។
គួរឱ្យសោកស្តាយ នេះជាហេតុការណ៍លើកទី១ហើយនៅតំបន់ផាប់ស្ទ្រីតនេះ ។
តារាសម្តែង លី មុនីនាថ ជាបងចេញមុខបកស្រាយចំពោះមហាជន
យោងតាមគេហទំព័រខ្មែរឡូត ចេញផ្សាយកាលពីថ្ងៃទី១៨ មេសា បានសរសេរថា រឿងហេតុនឹកស្មានមិនដល់ ដែលបានកើតឡើងលើប្អូនស្រីបង្កើតរបស់តារាសម្តែងកញ្ញា លី មុនីនាថ បានធ្វើឲ្យកក្រើកពេញបណ្តាញសង្គមហ្វេសប៊ុកយ៉ាងខ្លាំង ដែលមហាជនពិតជាចង់ដឹងពី មូលហេតុច្បាស់ ថាតើដំណើរដើមទងរឿងមួយនេះដូចម្តេចខ្លះ ?
កញ្ញា លី មុនីនាថ បានសរសេរបកស្រាយថា «នាងខ្ញុំឈ្មោះ លី មុនីនាថ សុំជំនួសមុខគ្រួសារនាងខ្ញុំទាំងមូលនៃរឿងរ៉ាវពាក់ព័ន្ធនៃការមរណភាពប្អូនស្រីនាងខ្ញុំឈ្មោះ លី មុនីរដ្ឋានី ដែលមានព័ត៌មានខ្លះមានការភ័ន្តច្រឡំការស្លាប់ដោយសារតែគិតថា ប្អូនស្រីនាងខ្ញុំបានទៅរត់ប្រលែងប៉ាតម្សៅគ្នាជាមួយក្មេងស្ទាវៗ និងបានទៅរត់ជាន់ខ្សែភ្លើង ដោយក្នុងវ័យអាយុ១៤ឆ្នាំ ទើបធ្វើឲ្យប្អូននាងខ្ញុំបាត់បង់ជីវិត ។
នាងខ្ញុំសុំចេញសារមួយបកស្រាយចំពោះមរណភាពរបស់ប្អូនស្រីនាងខ្ញុំឈ្មោះ លី មុនីរដ្ឋានី ទៅដល់បងប្អូនទាំងនៅក្នុងបណ្តាញសង្គម FB បានឱ្យដឹង និងជ្រាបច្បាស់នៅយប់ថ្ងៃទី១៦ មេសា ឆ្នាំ២០១៧ ជាយប់ថ្ងៃចូលឆ្នាំបង្ហើយ ខ្ញុំនិងប្អូនស្រីនាងខ្ញុំរួមទាំងមិត្តភក្តិខ្ញុំចំនួន៧នាក់ទៀត បានទៅលេងកម្សាន្តនៅតំបន់ Pub Street ហើយពួកខ្ញុំបានឈរលេងបាញ់ទឹកជាមួយគ្នានៅមុខហាងមួយកន្លែងមានឈ្មោះថា អង្គរហ៊ើប និងផ្ទះម៉ាស្សា Baray Spa ពួកខ្ញុំលេងរហូតដល់វេលាម៉ោង១១និង៤០នាទីយប់ដោយសារតែលេងហត់ហើយឃ្លានផងក៏បានហៅដំឡូងបំពងមួយចានមកញ៉ាំជាមួយគ្នា និងត្រៀមរៀបចំទៅផ្ទះទៅហើយ ប៉ុន្តែដោយចៃដន្យប្អូននាងខ្ញុំបានទៅច្រត់ដៃទៅលើបង្គោលដែកតូចមួយ ដែលនៅចន្លោះកណ្តាលនៃហាងទាំងពីរនោះ (អង្គរហ៊ើប និងផ្ទះម៉ាស្សា Baray Spa ) តែភ្លាមៗនោះខ្ញុំបានឃើញប្អូនស្រីខ្ញុំឆក់ រួចខ្ញុំក៏ស្ទុះទៅជួយក៏ឆក់រួមទាំងខ្ញុំផងដែរ ហើយពេលនោះមានមិត្តភកិ្តប្រុសម្នាក់មកជួយទាញសង្គ្រោះខ្ញុំនិងប្អូនស្រីខ្ញុំ រួចគេក៏ចាប់បីប្អូនខ្ញុំសង្គ្រោះបឋមហើយក៏ឃើញមិនស្រួលមិត្តភក្តិខ្ញុំទាំងអស់បានជួយ និងចាប់បីប្អូនខ្ញុំរត់យកទៅពេទ្យបង្អែកខេត្តសៀមរាប ។ ខ្ញុំនិងមិត្តខ្ញុំខ្លះបានស្រែក ទៅជួយវែកសុំផ្លូវ ដើម្បីយកប្អូនទៅពេទ្យសង្គ្រោះបន្ទាន់នៅមន្ទីរពេទ្យបង្អែកខេត្តសៀមរាម ហើយខ្ញុំក៏ទូរស័ព្ទទៅបងស្រីបង្កើត ដែលមកលេងនៅសៀមរាបជាមួយមិត្តគាត់ដែរ ប៉ុន្តែដោយអកុសល ប្អូនខ្ញុំបានផុតទៅហើយ ។ ដោយសារតែបងស្រីបង្កើតខ្ញុំមិនអស់ចិត្ត ក៏បានបញ្ចូនទៅមន្ទីពេទ្យរ៉ូយ៉ាល់អង្គរបន្តទៀត ប៉ុន្តែនៅតែមិនអាចជួយប្អូនបាន ។
ជាអកុសលខ្លាំងមែនទែននៅក្នុងឆាកជីវិតនាងខ្ញុំ ដោយនាងខ្ញុំនេះជាបងស្រីមិនអាចជួយប្អូនសោះ ប្អូនខ្ញុំទើបតែមានអាយុ១៣ឆ្នាំ និងឈានចូល១៤ឆ្នាំទៅហើយមិនគួរណាប្អូនកើតរឿងបែបនេះសោះ ។ ជាចុងក្រោយនាងខ្ញុំ លី មុនីនាថ និងគ្រួសារខ្ញុំទាំងមូល សុំសំណូមពរដល់សមត្ថកិច្ចជួយរកយុត្តិធម៌ឲ្យប្អូនស្រីនាងខ្ញុំផង និងសំណូមពរដល់សារព័ត៌មានទាំងអស់ ឈប់ចេញផ្សាយព័ត៌មានមិនពិតទៀត ហើយនៅពេលនេះ ក្រុមគ្រួសារខ្ញុំទាំងមូលកំពុងតែមានទុក្ខធំ ជាទម្ងន់សុំមេត្តាពុកម៉ែបងប្អូន ព្រមទាំងមិត្តភក្តិទាំងអស់ សុំចូលរួមរំលែកទុក្ខដល់ប្អូនស្រីខ្ញុំផង ។ ឥឡូវនេះសពកំពុងតែតម្កល់ធ្វើបុណ្យនៅគេហដ្ឋាន ភូមិមុខខេត្ត សង្កាត់រកាធំ ក្រុងច្បារមន ខេត្តកំពង់ស្ពឺ ៕
ចែករំលែកព័តមាននេះ