ខេត្តសៀមរាប ៖ អាជ្ញាធរជាតិអប្សរា សហការជាមួយស្ថានទូតបារាំងប្រចាំនៅព្រះរាជាណាចក្រកម្ពុជា ក្នុងការជួសជុលប្រាសាទបុរាណមេបុណ្យខាងលិច បាននិងកំពុងជួសជុលតួប៉ម ចំនួន០៩ ក្នុងចំណោមតួប៉មទាំងអស់ ចំនួន១២ ឲ្យលេចចេញរូបរាងឡើងវិញ…
ខេត្តសៀមរាប ៖ អាជ្ញាធរជាតិអប្សរា សហការជាមួយស្ថានទូតបារាំងប្រចាំនៅព្រះរាជាណាចក្រកម្ពុជា ក្នុងការជួសជុលប្រាសាទបុរាណមេបុណ្យខាងលិច បាននិងកំពុងជួសជុលតួប៉ម ចំនួន០៩ ក្នុងចំណោមតួប៉មទាំងអស់ ចំនួន១២ ឲ្យលេចចេញរូបរាងឡើងវិញ បន្ទាប់ពីបានរួមគ្នាធ្វើការជួសជុលអស់រយៈពេល០៣ឆ្នាំ កន្លងមកនេះ បើតាមអាជ្ញាធរជាតិអប្សរាចេញផ្សាយនៅថ្ងៃទី០១ វិច្ឆិកា ២០២២ ។
ប្រាសាទមេបុណ្យខាងលិច កសាងឡើងនាពាក់កណ្ដាលសតវត្សរ៍ទី១១ ព្រះបាទឧទយាទិត្យវរ្ម័នទី២ (ឆ្នាំ១០៤៩-១០៦៦) បានស្ថាបនាឡើងតាមរចនាប័ទ្មបាភួន នៅលើកោះតូចមួយ កណ្តាលបារាយណ៍ទឹកថ្លា សំណង់ប្រាសាទមានទំហំ១០០ ម៉ែត្របួនជ្រុង មានកំពែងមួយជាន់ និងមានសំណង់ថ្មភក់រាងមូល ។
ឯកំពែងខាងកើត ស្ថាបត្យករបានរចនាជាថែវរំលេចដោយក្បាច់រចនាយ៉ាងស្អាត មានបង្អួចចំហ និងគោបុរៈចំនួន៣ ដែលធ្វើពីថ្មពណ៌ផ្កាឈូក ដើម្បីឧទ្ទិសថ្វាយព្រះវិស្ណុ ក្នុងព្រហ្មញ្ញសាសនា ដោយយកលំនាំតាមដំណើររឿងកូរសមុទ្រទឹកដោះ នៃការបង្កើតភពថ្មី ។
តាមដំណើររឿងថា ព្រះវិស្ណុទ្រង់ផ្ទំធ្វើសមាធិលើនាគអនន្តៈ បណ្ដែតខ្លួនលើផ្ទៃទឹកសមុទ្រដ៏ធំល្វឹងល្វើយអស់កាលយ៉ាងយូរ ដើម្បីបង្កើតឲ្យមានភពផែនដីថ្មី សម្រាប់សត្វលោករស់នៅ ។ បន្ទាប់មក មានផ្កាឈូកមួយដើមដុះចេញពីផ្ចិតរបស់ព្រះអង្គ ហើយនៅលើផ្កាឈូកនោះមានលេចចេញនូវព្រះព្រហ្ម ដែលទ្រង់កំពុងគង់ធ្វើសមាធិ ដើម្បីបង្កើតភពថ្មីនោះឯង ។
ហេតុនេះហើយទើបព្រះបាទឧទយាទិត្យវរ្ម័នទី២ ស្ថាបនាបដិមាព្រះវិស្ណុផ្ទំ តម្កល់នៅកណ្ដាលប្រាសាទ ដើម្បីឲ្យស្របនឹងតម្រាទេវកថានេះ ៕
ចែករំលែកព័តមាននេះ