ខេត្តស្វាយរៀង ៖ នៅព្រឹកថ្ងៃទី១៣ ខែមេសា ឆ្នាំ២០១៧ ស្នងការដ្ឋាននគបាលខេត្ត បង្ហាញមុខសញ្ញាមុខក្រុមចោរដល់មហាជន ដើម្បីចូលរួមទប់ស្កាត់ និងបង្ក្រាប។ នេះជាមុខសញ្ញាក្រុមចោរដែលតែងតែ
ខេត្តស្វាយរៀង ៖ នៅព្រឹកថ្ងៃទី១៣ ខែមេសា ឆ្នាំ២០១៧ ស្នងការដ្ឋាននគបាលខេត្ត បង្ហាញមុខសញ្ញាមុខក្រុមចោរដល់មហាជន ដើម្បីចូលរួមទប់ស្កាត់ និងបង្ក្រាប។ នេះជាមុខសញ្ញាក្រុមចោរដែលតែងតែលួចឆ្មក់ធ្វើសកម្មភាពបន្លំលូកហោប៉ៅ លួចទូរស័ព្ទដៃ លួចកាបូបលុយ លួចកាច់សោ.កម៉ូតូ និងលួចរបស់របរផ្សេងៗក្នុងពិធីបុណ្យទានធំៗតាមបណ្តាខេត្តនានាក្នុងព្រះរាជាណាចក្រកម្ពុជា។
ដូច្នេះក្នុងកម្មវិធីសង្ក្រាន្តស្វាយរៀង នៅថ្ងៃទី១៤, ១៥, ១៦ មេសា នេះ ក្រុមចោរទាំងអស់នេះអាចនឹងបង្ហាញខ្លួនធ្វើសកម្មភាពបទល្មើសព្រហ្មទណ្ឌ ប្រសិនបើបានមហាជនជួបក្រុមចោរទាំងនេះ សូមទាក់ទងមកលេខទូរស័ព្ទនៃស្នងការដ្ឋាននគរបាលខេត្តស្វាយរៀង 0977780007 ។លោកនាយការិយាល័យព្រហ្មទណ្ឌកម្រិតធ្ងន់ 0972943333។ លោកនាយការិយាល័យព្រហ្មទណ្ឌកម្រិតស្រាល 0886171551។
សំណូមពរបងប្អូនទាំងអស់ចូលរួមជួយសហការជាមួយកងកម្លាំងមានសមត្ថកិច្ច ដើម្បីរក្សាសន្តិសុខសណ្តាប់ធ្នាប់ជូនប្រជាពលរដ្ឋក្នុងខេត្តស្វាយរៀងទាំងមូលឲ្យមានប្រសិទ្ធភាពខ្ពស់។
បើតាមលោកវរសេនីយ៍ទោ ខឹម ឡៃ នាយការិយាល័យព្រហ្មទណ្ឌកម្រិតស្រាលស្នងការរដ្ឋាននគបាលខេត្តបានឲ្យដឹងថា ក្នុងកម្មវិធីសង្ក្រាន្តស្វាយរៀង ឬបុណ្យចូលឆ្នាំថ្មីប្រពៃណីជាតិខ្មែររយៈពេលបីថ្ងៃ គឺថ្ងៃ១៤-១៥-១៦ មេសានេះ លោកអភិបាលនៃគណៈអភិបាលខេត្ត និងជាមេបញ្ជាការឯកភាពខេត្ត បានរៀបចំកម្លាំងការពារសុវត្ថិភាព សន្តិសុខ សណ្តាប់ធ្នាប់ សរុបចំនួន៤៥៣នាក់ រួមមានកម្លាំងនគរបាលខេត្ត២១៥នាក់ កងរាជអាវុធហត្ថចំនួន១២៤នាក់ ទាហានតំបន់ប្រតិបត្តិការសឹករងខេត្ត៨៥នាក់ ។
ក្រុងស្វាយរៀងមាននគរបាលក្រុងប៉ុស្តិ៍រដ្ឋបាលសង្កាត់ និងប្រជាការពារ ក៏បានដាក់ពង្រាយកម្លាំងការពារដែរ និងក្រុមគ្រូពេទ្យសង្គ្រោះមានចំនួន២៩នាក់។ ចំណែកសហភាពសហព័ន្ធយុវជនកម្ពុជាខេត្តស្វាយរៀង បានរៀបចំសមាជិកគណៈកម្មការដឹកនាំដំណើរការសង្ក្រាន្តស្វាយរៀង ដែលមកពីបណ្តាស្រុកក្រុងទាំង៨នៃខេត្តស្វាយរៀងមានចំនួនជិត១ម៉ឺននាក់ ដើម្បីឲ្យមានដំណើរការល្អក្នុងការដឹកនាំលេងល្បែងប្រជាប្រីយប្រពៃណីជាតិខ្មែរយើងឲ្យប្រជាពលរដ្ឋ ជាពិសេសយុវជនបានចូលរួមសប្បាយរីករាយក្នុងពិធីសង្ក្រាន្តនៃទឹកដីខេត្តស្វាយរៀង។ ហើយការរៀបចំសង្ក្រាន្តស្វាយរៀង មាន០៣ទីតាំង គឺទី១-នៅសួនកុមារ ទី២-នៅខាងមុខសាលាខេត្ត និងទី៣-នៅវត្តព្រៃឆ្លាក់ និងមានកន្លែងតាំងពិព័រណ៍ ស្តង់លក់ទំនិញ២កន្លែងនៅរង្វង់មូលវិមានឯករាជ្យ និងនៅមាត់ទន្លេឆ្នេរទន្លេវ៉ៃគោរាប់រយស្តង់ ដូច្នេះសង្ឃឹមថា មានប្រជាពលរដ្ឋ មន្ត្រីរាជការចូលរួមកម្សាន្តរាប់ម៉ឺននាក់នៅសង្ក្រាន្ត២០១៧នេះ៕
ចែករំលែកព័តមាននេះ