ផ្អើលពេញផ្សារប៉ាហ៊ី ភរិយាមន្ត្រីគយភ្ជង់កាំភ្លើង កំចាយស្រីស្នេហ៍លោកប្តី
ខេត្តប៉ៃលិន ៖ ស្ត្រីម្នាក់ដែលគេស្គាល់ថា ជាប្រពន្ធមន្ត្រីគយ បានបើករថយន្តទំនើបមួយគ្រឿងម៉ាកហាយឡែនឌ័រ ពណ៌ខ្មៅ
ខេត្តប៉ៃលិន ៖ ស្ត្រីម្នាក់ដែលគេស្គាល់ថា ជាប្រពន្ធមន្ត្រីគយ បានបើករថយន្តទំនើបមួយគ្រឿងម៉ាកហាយឡែនឌ័រ ពណ៌ខ្មៅ នាំបក្ខពួកចូលទៅឈប់នៅក្បែរផ្សារសាមគ្គីហៅផ្សារប៉ាហ៊ីរួចចុះពីរថយន្តដើរចូលទៅចាប់ក្របួចកអាវស្ត្រីវ័យក្មេងម្នាក់ ដែលគេស្គាល់ថាជាប្រពន្ធចុងរបស់ប្តី ហើយដកកាំភ្លើងខ្លីមិនស្គាល់ម៉ាក១ដើមបង្ហាញ ។ បន្ទាប់មក ក៏ចាប់ផ្តើមវាយនាង និងបង្ខំឱ្យចូលទៅក្នុងរថយន្ត ហើយបើកចេញទៅទិសខាងកើតបាត់ស្រមោលតែម្តង ។ ហេតុការណ៍នេះ បានកើតឡើងកាលពីវេលាម៉ោង៤និង៣០នាទីរសៀលថ្ងៃទី៨ ខែមេសា នៅខាងជើងផ្សារសាមគ្គីហៅផ្សារប៉ាហ៊ី ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
បើតាមប្រភពព័ត៌មានពីប្រជាពលរដ្ឋ និងអាជីវករលក់បន្លែ ត្រី សាច់ តាមដងផ្លូវក្បែរផ្សារខាងលើ បានឱ្យដឹងថា មុនពេលកើតហេតុគេឃើញមានស្ត្រី២នាក់ជិះរថយន្តម៉ាកហាយឡែនឌ័រ ពាក់ផ្លាកលេខ ភ្នំពេញ ២AN-៧៦៨៣ទៅឈប់ចតនៅខាងមុខសាលារៀនឯកជនមួយ ក្បែរផ្សារ ។ បន្ទាប់មក នាំគ្នាចុះពីរថយន្តដើរចូលទៅក្នុងផ្សារត្រីដែលទើបនឹងសាងសង់ថ្មី ហើយក៏ចាប់ស្ត្រីវ័យក្មេងម្នាក់ រួចយកកាំភ្លើងខ្លីមួយដើមមិនស្គាល់ម៉ាកបង្ហាញ និងវាយបញ្ចូលទៅក្នុងរថយន្ត ។ ហេតុការណ៍នេះ ធ្វើឱ្យអ្នកលក់ដូរតាមដងផ្លូវនិងក្នុងផ្សារ មានការភ្ញាក់ផ្អើលយ៉ាងខ្លាំង ប៉ុន្តែពួកគេបានត្រឹមតែឈរមើលប៉ុណ្ណោះ មិនហ៊ានចូលជួយអន្តរាគមន៍ទេ ។ បន្ទាប់មក ស្ត្រីទាំង២នាក់នោះបានបើករថយន្តដឹកស្ត្រីរងគ្រោះចេញទៅទិសខាងកើតបាត់ស្រមោលទៅ ។
ប្រភពដដែលបន្តថា ស្ត្រីវ័យក្មេងអាយុជាង២០ឆ្នាំនេះ ជាអ្នកលក់ដូរសម្លៀកបំពាក់នៅក្នុងផ្សារ ហើយគេសង្ស័យថាជាប្រពន្ធលួចលាក់របស់មន្ត្រីគយម្នាក់នៅស្រុកកំរៀង លុះប្រពន្ធដើមដឹងរឿងក៏នាំបក្ខពួកទៅវាយគំរាមដោយកាំភ្លើងខ្លី ហើយអូសចូលរថយន្តតែម្តង ។
ឯស្ត្រីម្នាក់ក្នុងចំណោម២នាក់នោះដែលមានកាំភ្លើងខ្លីកាន់នៅនឹងដៃ គេសង្ស័យថាជាប្រពន្ធរបស់សមត្ថកិច្ចនៅស្ថាប័នណាមួយជាក់ជាមិនខាន ។ ទោះបីជាយ៉ាងណា ក៏មិនគួរឱ្យស្ត្រីរូបនេះកាន់កាំភ្លើងដោយអត់មានលិខិតស្នាមគ្រប់គ្រងអាវុធជាតិផ្ទុះត្រឹមត្រូវនោះឡើយ ហើយបើសិនជាយកកាំភ្លើងនោះទៅបាញ់សម្លាប់គេ នោះនឹងមានរឿងកើតឡើងកាន់តែធំជាក់ជាមិនខាន ។
ពាក់ព័ន្ធទៅនឹងបញ្ហានេះ លោក លឹម វាសនា អធិការនគរបាលក្រុងប៉ៃលិន បានឱ្យដឹងខុសពីព័ត៌មាននៅក្នុងផ្សារថា ករណីវាយគ្នានៅក្នុងផ្សារសាមគ្គីហៅផ្សារប៉ាហ៊ីនេះ ខាងលោកបានចុះទៅធ្វើការស្រាវជ្រាវរួចរាល់អស់ហើយ អត់ឃើញមានពាក់ព័ន្ធនឹងកាំភ្លើងខ្លីអ្វីនោះទេ។ ចំណែកការវាយតប់គ្នានោះ គឺជាការឈ្លោះទាស់ទែងរវាងបងប្អូនឯង របស់ស្ត្រីលក់ដូរនៅក្នុងផ្សារប៉ុណ្ណោះ ហើយក៏មានការដោះលែងស្ត្រីរងគ្រោះឱ្យត្រឡប់មកវិញហើយដែរ ៕
ចែករំលែកព័តមាននេះ