ក្នុងនាមជាអ្នកដឹកនាំវង់ល្ខោន មានកេរ្តិ៍ឈ្មោះមួយរូបលោក អុល សំអាង បានលើកឡើងថា លោកមិនចង់ឃើញសិល្បៈល្ខោនបាសាក់មហាជន រស់នៅតាមបែបយថាកម្ម ដោយមិនមានការជួយជ្រោមជ្រែង និងគាំទ្រពីភាគីពាក់ព័ន្ធ និងមហាជននោះឡើយ ក្នុងពេល
រាជធានីភ្នំពេញ ៖ ក្នុងនាមជាអ្នកដឹកនាំវង់ល្ខោន មានកេរ្តិ៍ឈ្មោះមួយរូបលោក អុល សំអាង បានលើកឡើងថា លោកមិនចង់ឃើញសិល្បៈល្ខោនបាសាក់មហាជន រស់នៅតាមបែបយថាកម្ម ដោយមិនមានការជួយជ្រោមជ្រែង និងគាំទ្រពីភាគីពាក់ព័ន្ធ និងមហាជននោះឡើយ ក្នុងពេលស្ថានការណ៍ភាពសង្គមកំពុងតែមានភាពរីកចម្រើនផ្នែកបច្ចេកវិទ្យាទំនើបៗផងនោះ ដែលធ្វើឲ្យវិស័យសិល្បៈល្ខោនបាសាក់ ពិបាកទាក់ទាញការចាប់អារម្មណ៍ពីមហាជន។
ប្រធានក្រុមសិល្បៈល្ខោនបាសាក់ អុល សំអាង វង់ទី១ រាជធានីភ្នំពេញ លោក អុល សំអាង បានលើកឡើងប្រាប់កោះសន្តិភាពថា សូមកុំបណ្ដោយឱ្យសិល្បៈល្ខោនបាសាក់មហាជន រស់នៅតាមបែបយថា កម្ម ហើយលោកជឿជាក់ថា បងប្អូនខ្លះធ្លាប់បានដឹង បានស្ដាប់ ឬបានលឺអំពីការពិបាក ឬផលពិបាកក្នុងការគ្រប់គ្រងក្រុមល្ខោនមួយ ឬសិល្បៈមួយក្រុម គឺមានការពិបាកខ្លាំងក្នុងការបង្កើតការគ្រប់គ្រង និងការដឹកនាំក្នុងស្ថានការណ៍សង្គមកំពុងតែមានភាពរីកចម្រើន មានបច្ចេកវិទ្យាទំនើបៗផងនោះ វិស័យសិល្បៈល្ខោនបាសាក់ ក៏មានការពិបាកយ៉ាងខ្លាំងក្នុងការដឹកនាំ ក្នុងការប្រមូលចងក្រងសំដែង។
លោកបញ្ជាក់ថា ទាំងក្រុមរបស់លោក និងក្រុមដទៃទៀត គួរតែត្រូវបានជួយជ្រោមជ្រែងអំពីសំណាក់ថ្នាក់ដឹកនាំក្រសួងពាក់ព័ន្ធ ជាពិសេសលើបណ្ដាញសង្គមព័ត៌មានផ្សេងៗជួយជ្រោមជ្រែងបន្ថែមក្នុងការចុះផ្សព្វផ្សាយពង្រឹង ដើម្បីជាការលើកទឹកចិត្តដល់ក្រុមសិល្បៈល្ខោនបាសាក់។
លោកថា សម្រាប់ក្រុមលោក គឺបានខិតខំយ៉ាងសកម្មពីមួយឆ្នាំទៅមួយឆ្នាំក្នុងការអភិរក្សអភិវឌ្ឍទម្រង់ល្ខោនបាសាក់ឲ្យបានល្អប្រសើរដែលជាសម្បត្តិដូនតាខ្មែរយើង ដែលលោកបានបន្សល់ទុក។
បើតាមលោក អុល សំអាង ថា ការជ្រោមជ្រែងឧបត្ថម្ភទាំងសម្ភារៈ និងបច្ចេកទេសពីសំណាក់អ្នកជំនាញផ្នែកសិល្បៈ គឺជាការលើកទឹកចិត្តផ្ដល់កម្លាំងចិត្ត ជាសមានចិត្ត គឺជាទឹកចិត្តដ៏ប្រពៃថ្លៃថ្លាក្នុងការចូលរួមថែរក្សា រួមសហការការពារដើម្បីកុំឱ្យទម្រង់សិល្បៈល្ខោនបាសាក់ដ៏មានតម្លៃមិនអាចកាត់ថ្លៃបានរបស់ខ្មែរនេះបាត់បង់។
លោកបានលើកឡើងបន្ថែមថា ក្រុមសិល្បៈ អុល សំអាង កំពុងតែខិតខំប្រឹងប្រែងរៀនសូត្រច្នៃប្រឌិតបន្ថែមបង្កើនទេពកោសល្យក្នុងការសម្ដែង ដើម្បីរក្សាបាននូវក្បាច់ក្បូរហួនក្នុងទំរង់ល្ខោនបទចម្រៀង បាសាក់មហោរីច្នៃបទសម័យក្នុងការរំលេចនៅក្នុងទម្រង់ល្ខោនបាសាក់ខ្មែរ។ ចំណែកសំលៀកបំពាក់ គឺជាកត្តាសំខាន់ដែលក្រុមលោកបានខិតខំរិះរកគ្រប់មធ្យោបាយដើម្បីកែច្នៃ និងរក្សាទៅតាមទម្រង់ខ្មែរ ការស្លៀកពាក់រក្សាលក្ខណៈប្រពៃណីជាតិប្រពៃណីខ្មែរ ក្នុងពេលឧបករណ៍តន្ត្រី ក៏ជាកត្តាសំខាន់ដើរតួនាទីយ៉ាងល្អប្រសើរក្នុងការសម្ដែងក្នុងការប្រគំដើម្បីឲ្យទស្សនីយ៍ភាពផ្នែកល្ខោនបាសាក់ រឹតតែមានចំណាប់អារម្មណ៍អំពីទស្សនជនមហាជនប្រជាជនតាមស្រុកស្រែចម្ការ។
លោកបញ្ជាក់ថា ក្រុមសិល្បៈល្ខោនបាសាក់អុលសំអាង ក៏កំពុងតែខិតខំបណ្ដុះបណ្ដាលចែករំលែកដល់បងប្អូនដែលជាអ្នកបន្តវេន ដើម្បីចូលរួមទ្រទ្រង់ផ្សព្វផ្សាយថែរក្សាការពារទុកជាគំរូដ៏ល្អសម្រាប់មនុស្សជំនាន់ក្រោយ និងទៅតាមបែបបទនៃការវិវត្តរបស់សង្គមជាតិ។
ទោះបីជា ក្រុមសិល្បៈ អុល សំអាង ជួបប្រឈមនឹងបញ្ហាខ្លះៗដែលកើតមាននៅក្នុងក្រុមយ៉ាងណាក្តី ក៏ប៉ុន្តែថ្នាក់ដឹកនាំ ក៏ដូចជាសិល្បករក្នុងក្រុម នៅតែក្រាញននៀលតស៊ូ ដើម្បីបន្តវេនប្រឹងប្រែង ខិតខំថែរក្សាការពារទម្រង់ល្ខោនបាសាក់របស់ជាតិខ្មែរយើង ឲ្យកាន់តែមានភាពល្អប្រពៃបែបលក្ខណៈខ្មែរ៕
ចែករំលែកព័តមាននេះ