ភាគហ៊ុនហុងកុងធ្លាក់ចុះជាង៦% ដោយសារការភ័.យខ្លា.ចអំពីអាណត្តិទី៣ លោក ស៊ី ជីនពីង
ហុងកុង ៖ ភាគហ៊ុនរបស់ហុងកុងបានធ្លាក់ចុះជាង ៦% ដែលតួលេខដ៏អាក្រក់បំផុតរបស់ពួកគេ
ហុងកុង ៖ ភាគហ៊ុនរបស់ហុងកុងបានធ្លាក់ចុះជាង ៦% ដែលតួលេខដ៏អាក្រក់បំផុតរបស់ពួកគេចាប់តាំងពីវិបត្តិហិរញ្ញវត្ថុពិភពលោកឆ្នាំ ២០០៨ ពោលគឺកើតឡើងត្រឹមតែ១ថ្ងៃប៉ុណ្ណោះ បន្ទាប់ពីមេដឹកនាំកំពូលចិន លោក ស៊ី ជីនពីង (Xi Jinping) បានធានាការក្តាប់អំណាចអាណត្តិទី៣របស់គាត់ នៅឯការជួបជុំនយោបាយដ៏ធំមួយ។
វិនិយោគិនបរទេសមានការភ្ញាក់ផ្អើលយ៉ាងខ្លាំង ដោយលទ្ធផលនៃការរុះរើការដឹកនាំរបស់បក្សកុម្មុយនិស្តបានផ្តាច់ភាគហ៊ុនចិន និងប្រាក់យន់ បើទោះបីជាមានការចេញផ្សាយទិន្នន័យ GDP ខ្លាំងជាងការរំពឹងទុកយ៉ាងណាក៏ដោយ។ ពួកគេព្រួយបារម្ភថា ការរឹតបន្តឹងការក្តាប់អំណាចរបស់លោក ស៊ី នឹងនាំទៅដល់ការបន្តគោលនយោបាយដែលមានស្រាប់របស់ទីក្រុងប៉េកាំង និងធ្វើឱ្យសេដ្ឋកិច្ចធ្លាក់ចុះបន្ថែមទៀត។
សន្ទស្សន៍ហ៊ុន Hang Seng (HSI) របស់ហុងកុងបានធ្លាក់ចុះ ៦.៤% កាលពីថ្ងៃទី២៤ ខែតុលា ដែលជាការធ្លាក់ចុះប្រចាំថ្ងៃដ៏ធំបំផុតចាប់តាំងពីខែវិច្ឆិកា ឆ្នាំ២០០៨។ ដែលសន្ទស្សន៍នេះ បានបិទនៅកម្រិតទាបបំផុតចាប់តាំងពីខែមេសា ឆ្នាំ២០០៩។
ប្រាក់យន់របស់ចិនធ្លាក់ចុះយ៉ាងខ្លាំង ដោយឈានដល់កម្រិតទាបថ្មីក្នុងរយៈពេល១៤ឆ្នាំ បើធៀបនឹងប្រាក់ដុល្លារអាមេរិកនៅលើទីផ្សារដីគោក។ ចំណែកនៅលើទីផ្សារឈូងសមុទ្រ ដែលវាអាចធ្វើពាណិជ្ជកម្មបានដោយសេរី រូបិយប័ណ្ណចិនបានធ្លាក់ចុះ ០.៨% ជិតដល់កម្រិតខ្សោយបំផុតក្នុងកំណត់ត្រា ទោះបីជាសេដ្ឋកិច្ចចិនបានកើនឡើង ៣.៩% នៅក្នុងត្រីមាសទី៣ ធៀបនឹងឆ្នាំមុនយ៉ាងណាក៏ដោយ។ នេះបើយោងតាមទន្និន័យរបស់ការិយាល័យស្ថិតិជាតិ។
ការលក់ចេញភាគហ៊ុនយ៉ាងខ្លាំង បានកើតឡើងមួយថ្ងៃបន្ទាប់ពីបក្សកុម្មុយនិស្តចិនកំពុងកាន់អំណាចបានបង្ហាញពីការដឹកនាំថ្មីរបស់ខ្លួនសម្រាប់រយៈពេល៥ឆ្នាំបន្ទាប់។ បន្ថែមពីលើការទទួលបានអាណត្តិទី៣ ដែលមិនធ្លាប់មានពីមុនមកក្នុងនាមជាប្រធានបក្ស លោក ស៊ី បានប្រមូលផ្តុំក្រុមដឹកនាំថ្មី រួមជាមួយនឹងក្រុមអ្នកស្មោះត្រង់ដ៏រឹងមាំបំផុតរបស់គាត់។
មន្ត្រីជាន់ខ្ពស់មួយចំនួនដែលគាំទ្រទំនាក់ទំនងទីផ្សារ និងការបើកសេដ្ឋកិច្ចត្រូវបានបាត់ខ្លួនពីក្រុមដឹកនាំកំពូលថ្មី ដែលបង្កជាការព្រួយបារម្ភបន្ថែមអំពីទិសដៅអនាគតរបស់ចិន ជាមួយសហរដ្ឋអាមេរិក ដែលជាដៃគូប្រជែងរបស់ខ្លួន។ ដោយអ្នកដែលត្រូវបានជម្រុះចេញរួមមាន លោកនាយករដ្ឋមន្ត្រី Li Keqiang អនុនាយករដ្ឋមន្ត្រី លោក Liu He និងទេសាភិបាលធនាគារកណ្តាល លោក Yi Gang៕ (ដកស្រង់ចេញពី CNN)
ចែករំលែកព័តមាននេះ