រាជធានីភ្នំពេញ ៖ ប្រទេសចិនបានបង្ហាញកម្មវិធីមានឈ្មោះថា WeChat និង AliPay ជាកម្មវិធីពហុបំណងអាចជំរុញបដិវត្តន៍ពាណិជ្ជកម្មអេឡិចត្រូនិកនៅកម្ពុជា ។
កម្មវិធីនេះធ្វើឲ្យមានអ្នកចាប់អារម្មណ៍ចង់
រាជធានីភ្នំពេញ ៖ ប្រទេសចិនបានបង្ហាញកម្មវិធីមានឈ្មោះថា WeChat និង AliPay ជាកម្មវិធីពហុបំណងអាចជំរុញបដិវត្តន៍ពាណិជ្ជកម្មអេឡិចត្រូនិកនៅកម្ពុជា ។
កម្មវិធីនេះធ្វើឲ្យមានអ្នកចាប់អារម្មណ៍ចង់ចូលរួមក្នុងបដិវត្តន៍ឌីជីថលចល័តរបស់កម្ពុជា ដែលកំពុងតាមដានយ៉ាងយកចិត្តទុកដាក់លើជោគជ័យដ៏មហិមារបស់ចិន ដោយប្រើប្រាស់ជាមួយឧបករណ៍ចល័តដូចជា WeChat ឬ AliPayជាដើម ដែលជាកម្មវិធីប្រើប្រាស់សម្រាប់ការផ្ញើសារ ទិញទំនិញ និងមុខងារផ្សេងៗ ហើយកម្មវិធីនេះបានវាយលុកទីផ្សារចិន និងទីកន្លែងដទៃទៀត ។
ក្នុងរយៈកាលពីរបីឆ្នាំកន្លងមកនេះ យុវជនកម្ពុជាបានជាប់ចិត្តនឹងបណ្ដាញសង្គម កម្មវិធី Chat និងចែករំលែកព័ត៌មានផ្សេងៗរបស់លោកខាងលិច ដូចជា Facebook, Youtube, Instagram និង What’s App ជាដើម ។
យោងតាមស្ថិតិពីរាជរដ្ឋាភិបាល កម្មវិធីប្រើប្រាស់លើឧបករណ៍ចល័តទាំងនេះ គឺជាឧបករណ៍ទាក់ទាញឲ្យប្រជាជនកម្ពុជាប្រើប្រាស់សេវាអីុនធើរណែតចល័ត ។ បច្ចុប្បន្ន អ្នកប្រើប្រាស់ចំនួន៦,៣លាននាក់មានលទ្ធភាពស្វែងរកទិន្នន័យតាមអីុនធើរណេត ដោយប្រើប្រាស់ឧបករណ៍ចល័តបែបនេះ ។
កាលពីពេលថ្មីៗនេះ ប្រជាជនកម្ពុជាដែលចេះប្រើប្រាស់ប្រព័ន្ធឌីជីថល អាចប្រើប្រាស់សេវាឌីជីថលបង្កើតក្នុងស្រុកកាន់តែច្រើនឡើងៗ។ សេវាទាំងនេះបានចាប់ផ្ដើមផ្លាស់ប្ដូរការរំពឹងទុកចំពោះមុខងារអាចប្រើប្រាស់បាននៅលើទូរស័ព្ទស្មាតហ្វូន ឬ Tablet ។
ប៉ុន្តែប្រព័ន្ធមជ្ឈដ្ឋាននៃសេវាឌីជីថលចល័តរបស់កម្ពុជាមានលក្ខណៈតូចចង្អៀត និងបែកខ្ញែក ហើយការប្រើប្រាស់ក្រដាសប្រាក់នៅតែគ្របដណ្ដប់នៅឡើយ បើនិយាយអំពីការទិញទំនិញ ឬសេវាផ្សេងៗ ។
លោក ថូម៉ាស់ ផូករនី (Tomas Pokorny) អ្នកត្រួសត្រាយផ្លូវដំបូងគេលើវិស័យពាណិជ្ជកម្មអេឡិចត្រូនិកនៅកម្ពុជា ហើយបច្ចុប្បន្នកំពុងដឹកនាំការងារបង្កើតកម្មវិធីប្រើប្រាស់ឧបករណ៍ចល័តថ្មីមួយឈ្មោះថា Pi Pay សង្ឃឹមថា នឹងដាក់ចេញឲ្យប្រើប្រាស់នៅឆ្នាំនេះ ។
លោកមានប្រសាសន៍នៅថ្ងៃទី៣ មេសាថា ៖ « ទីផ្សារនេះនៅមិនទាន់ត្រៀមលក្ខណៈបាន១០០% នៅឡើយទេសម្រាប់ការចាយវាយដោយមិនប្រើក្រដាសប្រាក់ ប៉ុន្តែបើអ្នកគិតដល់ចំនួនក្រុមហ៊ុនថ្មីផ្នែកបច្ចេកវិទ្យាថា តើមានប៉ុន្មាននៅក្នុងទីផ្សារមួយនេះ ដែលផ្ដល់សេវាលើផ្នែកផ្គត់ផ្គង់អាហារ ការទិញទំនិញតាមអនឡាញ ការទូទាត់ ឬសេវាដឹកជញ្ជូនជាដើម ដែលកំណើនទីផ្សារកើតមានតាមរយៈយុវជនប្រើប្រាស់បណ្ដាញសង្គម និងអីុនធើរណេត។ ដូច្នេះ យើងជឿជាក់ថា ដល់ពេលហើយដែលត្រូវចាប់ផ្ដើមដំណើរការអភិវឌ្ឍន៍កម្មវិធីថ្មីបម្រើការធ្វើពាណិជ្ជកម្មអេឡិចត្រូនិកនៅកម្ពុជា ប្រៀបបាននឹងកំពូលកម្មវិធីដូចជា WeChat ដែលបានបម្រើវិស័យនេះក្នុងប្រទេសចិនដូច្នោះដែរ » ។
បុគ្គលនានាស្ថិតក្នុងរង្វង់ទីផ្សារពាណិជ្ជកម្មអេឡិចត្រូនិកក្មេងខ្ចីក្នុងប្រទេសកម្ពុជា បានកោតសរសើរដល់ជោគជ័យនៃកំពូលកម្មវិធីរបស់ចិន ពីព្រោះកម្មវិធីទាំងនោះបានផ្លោះរំលងបច្ចេកវិទ្យាចាស់ ដើម្បីបំពេញតម្រូវការយុវជនជំនាន់ថ្មីកើតមកក្នុងសម័យឌីជីថល ។
ចំណែកលោក កាយ ឡូត ពាណិជ្ជករកម្ពុជាមួយរូប ដែលមានបទពិសោធន៍ជាច្រើនឆ្នាំលើវិស័យធនាគារ ទូរស័ព្ទចល័ត និងសេវាទូទាត់ មានប្រសាសន៍ថា ៖ « កម្មវិធីនានាដូចជា WeChat និង AliPay ជាដើម បានទទួលជោគជ័យដូច្នេះ ក៏ដោយសារតែកម្មវិធីទាំងនេះជួយបម្រើដល់ការរស់នៅបែបទំនើប ទាំងការរស់នៅក្នុងសង្គមអនឡាញ និងពិភពពិត ។ អ្នកអាចប្រើប្រាស់កម្មវិធីទាំងនេះដើម្បីផ្ទេរប្រាក់តាមរយៈប្រព័ន្ធមួយទៅឲ្យមនុស្សណាម្នាក់តាមការចង់បាន ប៉ុន្តែអ្នកក៏អាចប្រើប្រាស់កម្មវិធីនេះនៅក្នុងហាងទំនិញទូទៅ ដើម្បីទិញទំនិញជាក់លាក់ណាមួយ បន្ទាប់មកអ្នកអាចប្រាប់ទៅកាន់មិត្តភក្តិនៅពេលកំពុង Chat អំពីការទិញអាហារថ្ងៃត្រង់ ឬកាបូបដៃ ឬអ្វីៗផ្សេងទៀត ហើយមិត្តភក្តិរបស់អ្នកអាចទិញទំនិញដូចគ្នានេះតាមអីុនធើរណេតក៏បាន ។ ខណៈជីវិតរបស់យើងឆ្លងកាត់ទាំងពិភពពិត និងពិភពនិមិត្ត ដូច្នេះបច្ចេកវិទ្យា ក៏ត្រូវទៅតាមដូច្នេះដែរ » ។
ថ្វីដ្បិតតែឱកាសដាក់ចេញឲ្យប្រើប្រាស់នូវកំពូលកម្មវិធីបែបនេះក្នុងទីផ្សារកម្ពុជាហាក់កើនឡើងក្តី ប៉ុន្តែបញ្ហាប្រឈមនៅតែមាន ពោលគឺកម្ពុជា ជាទីផ្សារតូចមួយប្រើប្រាស់រូបិយប័ណ្ណពីរ ជាមួយកត្តាប្រជាជនមានគម្លាតពីគ្នាយ៉ាងច្បាស់រវាងអ្នកមានចំណេះដឹងផ្នែកឌីជីថល និងគ្មានចំណេះដឹងផ្នែកឌីជីថល ។
អ្នកតាមដានប្រព័ន្ធសង្គមក៏បាននិយាយថា «ទីផ្សារបែកខ្ញែក» សម្រាប់វិស័យសេវាកម្មឌីជីថលនៅកម្ពុជា អាចរាំងស្ទះដល់ការអភិវឌ្ឍ ដោយសារតែមានជម្រើសផ្សេងៗជាច្រើនសម្រាប់អតិថិជនប្រើប្រាស់ ដូចជា ប្រព័ន្ធទូរគមនាគមន៍ចល័តដែលផ្ដល់សេវាទូទាត់ និងផ្ទេរប្រាក់ ឬធនាគារប្រកួតប្រជែងជាមួយគ្នា ឬក៏ប្រជែងនឹងខ្លួនឯង ដោយផ្ដល់នូវប័ណ្ណឥណទានខុសៗគ្នា កម្មវិធីប្រើប្រាស់លើឧបករណ៍ចល័ត និងការផ្ទេរប្រាក់តាមម៉ាស៊ីន ATM ជាដើម ។
លោក ផូករនី អ្នកដឹកនាំក្រុមការងារបង្កើតកម្មវិធី Pi Pay មានប្រសាសន៍ថា ៖ « គន្លឹះដើម្បីជោគជ័យនៅទីនេះ ប្រហែលជាត្រូវប្រើវិធីសាស្ត្រចាប់ដៃគូជាមួយអ្នកផ្ដល់សេវាផ្សេងៗគ្នា ជាជាងប្រើប្រាស់វិធីសាស្ត្រប្រកួតប្រជែង»។
លោកបន្ថែមថា ៖ « ហេតុអ្វីបានជាយើងមិនបង្កើតកម្មវិធីមួយរបស់កម្ពុជា ដែលអាចផ្ទេរប្រាក់ទៅកាន់ប្រព័ន្ធផ្ទេរប្រាក់ផ្សេង ផ្ទេរប្រាក់ទៅម៉ាស៊ីន ATM របស់ធនាគារនានា ហើយត្រូវបានទទួលយកទៅប្រើប្រាស់ដោយអាជីវកររាប់ពាន់នាក់ចេះប្រើប្រាស់ប្រព័ន្ធលក់ដូរ ដែលអាចប្រើប្រាស់ជាមួយប័ណ្ណដទៃទៀត ឬការទូទាត់តាមអីុនធើរណេតជាដើម ។ យើងត្រូវការបច្ចេកវិទ្យាដែលគាំទ្រ ឬពង្រឹងការរស់នៅរបស់យើង រាប់ចាប់ពីការកសាងបណ្ដាញសង្គម រហូតដល់ការទិញទំនិញ និងការគ្រប់គ្រងលុយកាក់របស់យើងផងដែរ » ៕
ចែករំលែកព័តមាននេះ